Badiredi ba kgolagano e ntšha
1A re bile re simolola gape go iphaka? Kgotsa a le rona re tlhoka jaaka bangwe dikwalo tse di re fakang, tsa go ya kwa go lona ka tsone, kgotsa tsa go tswa kwa go lona? 2Ke lona lokwalo lwa rona, lo lo kwadilweng mo pelong tsa rona, e le lo lo itsiweng lo balwa ke batho botlhe; 3ka lo bonatshegile fa lo le lokwalo lwa ga Keresete, lo lo dirilweng ka rona, lo lo kwadilweng e seng ka enke, e le ka Mowa wa Modimo o o tshedileng; e seng mo matlapeng a a dimatla, e le mo dimatleng tse e bong dipelo tsa nama. 4Re na le boikanyo jo bo ntseng jalo ntlheng ya Modimo ka Keresete.
5E seng gore re lekanye ka rosi, go raya sepe jaaka e kete se tswa mo go rona; mme go lekana ga rona go tswa mo Modimong; 6o le one o re neileng go lekana jaaka re le badiredi ka kgolagano e ntšha; e e seng ya ditlhaka tsa lokwalo fela, mme e le ya mowa; gonne ditlhaka tsa lokwalo di a bolaya, mme mowa o a tshedisa.
7Fa tirelo ya loso, e e kwadilweng, ya setwa mo matlapeng, fa e tsile ka kgalalelo, bana ba Iseraele ba ba ba tla ba retelelwa ke go leba sefatlhogo sa ga Moše ka tlhomamo, ka ntlha ya kgalalelo ya sefatlhogo sa gagwe; eo ya bo e le kgalalelo e e fetang fela. 8Tirelo ya mowa yone e tlaa tlhoka jang go nna le kgalalelo bogolo? 9Gonne e re fa tirelo ya tshekiso e le kgalalelo, bogolo jang tirelo ya tshiamiso e gaisa ka kgalalelo. 10Gonne ruri se se kileng sa dirwa kgalalelo, ga se a dirwa kgalalelo ka mokgwa o, wa go re se a bonya fa pele ga kgalalelo e e gaisang. 11Gonne fa se se fetang se ne se ntse ka kgalalelo, bogolo thata se se salang se eme mo kgalalelong.
12Ke gone, e re ka re na le tsholofelo e e ntseng jalo, re bua ka tshosologo e kgolo, 13re sa etse Moše, yo o ne a baya losire mo sefatlhogong sa gagwe, gore bana ba Iseraele ba se ka ba leba ka tlhomamo bokhutlo jwa se se neng se feta. 14Megopolo ya bone e ne e kgwaraladitswe; gonne le gompieno, fa go balwa kgolagano e kgologolo, losire loo fela lo bo lo sa ntse lo setse, lo sa tlosiwe; mme losire loo lo tlositswe mo go Keresete. 15Le gompieno, fa Moše a balwa, losire longwe lo sirile dipelo tsa bone, 16mme e tle e re fa motho a sokologela mo Moreneng, losire lo tlosiwe. 17Jaana Morena ke ene Mowa, mme kwa Mowa wa Morena o teng, ke teng kwa go nang le kgololesego. 18Mme rona rotlhe, ka difatlhogo tse di sirologileng, ka re tsabakela ka kgalalelo ya Morena, jaaka seipone, re a fetoga, re nna jaaka sone setshwano seo sa kgalalelo e e isang kgalalelong, e le mo go tswang mo Moreneng yo e leng ene Mowa.
