Josia o ja Moletlo wa Tlolaganyo
1Josia a direla Jehofa tlolaganyo mo Jerusalema; ba tlhaba tlolaganyo ka letsatsi la 14 la kgwedi ya ntlha. 2A tlhoma baperesiti mo ditebelong tsa bone, a ba nametsa pelo mo tirelong ya ntlo ya ga Jehofa. 3A raya Balefi ba ba rutang Baiseraele botlhe ba ba itshepetseng Jehofa, a re: “Bayang letlole le le itshepileng mo ntlong e Solomone morwa Dafite kgosi ya Iseraele o ne a e aga; ga go ketla go tlhola go le morwalo mo maruding a lona. Jaanong lo direle Jehofa Modimo wa lona le batho ba gagwe Baiseraele. 4Lo ipaakanye ka fa mantlong a borra ba lona ka makoko a diphapaano tsa lona, ka fa go kwaleng ga Dafite kgosi ya Iseraele, le ka fa go kwaleng ga Solomone morwawe. 5Lo eme mo felong ga boitshepo ka fa dikgaoganong tsa makgotla a bana ba borraeno, e bong bana ba batho fela, mme a kgaogano nngwe le nngwe ya makgotla a borara e nne le setlhophana sa Balefi. 6Lo tlhabe tlolaganyo, lo iitshepise, lo bo lo baakanyetse bana ba rraeno go dira ka fa lefokong la ga Jehofa le le tsileng ka Moše.”
7Josia a ntshetsa bana ba bone ba e leng batho fela, dikwanyana le dipotsane tsa letsomane, tsotlhe e le tsa ditshupelo tsa tlolaganyo, a di naya botlhe ba ba gone, go ya go fitlha mo palong ya 30 000, le tsa dikgongwana di le 3 000; tseo e le tsa dithuo tsa kgosi. 8Dikgosana tsa yone tsa naya batho le baperesiti le Balefi dimpho tsa peleego. Hilekia le Sekaria le Jehiele, balaodi ba ntlo ya Modimo, ba naya baperesiti dihutshane di le 2 600, le dikgomo di le 300, tsa go nna ditshupelo tsa tlolaganyo. 9Konania le ene, le Shemaia le Nethanele bomonnawe, le Hašabia le Jeiele le Josabate, ditlhogo tsa Balefi, ba naya Balefi dihutshane di le 5 000, le dikgomo di le 500, tsa go nna ditshupelo tsa tlolaganyo. 10Jalo tirelo ya baakanngwa, mme baperisiti ba ema mo bonnong jwa bone, le Balefi ka fa makokong a diphapaano tsa bone, ka fa taolong ya kgosi. 11Ba tlhaba tlolaganyo, mme baperesiti ba kgatsha madi a ba a amogetseng mo seatleng sa bone, mme Balefi ba di humolotsa. 12Ba tlosa ditshupelo tse di fisiwang, gore ba tle ba abele batho ka fa dikgaoganong tsa makgotla a borra ba bana ba bone, go tla ba isetsa Jehofa tshupelo, jaaka go kwadilwe mo lokwalong lwa ga Moše. Ba dira jalo le ka dikgomo. 13Ba besa tlolaganyo ka molelo ka fa molaong o o tlhomilweng; mme ditshupelo tse di itshepileng ba di apaya ka dipitsa, le ka dipitsa tse di tona, le ka tse di dikhaetla, ba di isa ka bonako kwa baneng botlhe ba batho. 14Morago ga moo ba baakanya ga bone, le ga baperesiti; gonne baperesiti bomorwa Arone ba ne ba tshwerwe ke tiro ya go isa ditshupelo tse di fisiwang le mafura, ga tsamaya bosigo jwa tsena; ke gone ka moo Balefi ba baakanya ga bone, le ga baperesiti bomorwa Arone. 15Baopedi bomorwa Asafe ba ba ne ba le mo bonnong jwa bone, ka fa taolong ya ga Dafite, le Asafe, le Hemane, le Jeduthune mmonedi wa kgosi; le balebedi ba dikgoro ba bo ba le fa kgorong nngwe le nngwe, go se na sepe se se tshwanetseng go ba tlogedisa tirelo ya bone, gonne Balefi, bomonnaa bone ba ba baakanyetsa. 16Jalo tirelo yotlhe ya ga Jehofa ya baakanngwa ka tsatsi leo fela, go dira tlolaganyo le go isa ditshupelo tse di fisiwang mo sebesong sa ga Jehofa, ka fa taolong ya kgosi Josia. 17Bana ba Iseraele ba ba teng ba dira tlolaganyo ka lobaka loo, le modiro wa senkgwe se se sa bedisiwang ka malatsi a supa. 18E sa le ka motlha wa ga Samuele moperofeti go ne go ise go ko go dirwe tlolaganyo epe jaaka yone mo Iseraele; mme go se ka ga nna dikgosi dipe tsa Iseraele tse di dirileng tlolaganyo e e etsang e Josia o ne a e dira, le baperesiti, le Balefi, le Bajuta botlhe ba Iseraele ba ba gone, le banni ba Jerusalema. 19Modiro oo wa dirwa ka ngwaga wa 18 wa puso ya ga Josia.
Bokhutlo jwa puso ya ga Josia
20Mme e rile morago ga moo gotlhe fela, Josia a sena go baakanya tempele, Neko kgosi ya Egepeto a bolola a ya go tlhasela Karakemiše o o fa nokeng ya Euferatese; mme Josia a mmololela. 21Mme a roma barongwi kwa go ene, a re: “Ke dirang ka wena, wena kgosi ya Juta? Ga ke a bololela wena gompieno, ke bololetse ntlo e ke nang le ntwa nayo; Modimo o ntaotse gore ke itlhaganele; khutla, o se ka wa itlhakanya le Modimo o o emeng le nna, o ka tla wa go senya.” 22Le fa go ntse jalo Josia a gana go mo thuhulela sefatlhogo, a ikgakisa, gore a tle a tlhabane nae; a se ka a reetsa mafoko a ga Neko a a duleng mo molomong wa Modimo, mme a tla go tlhabanela mo molapong wa Megito.
23Bahudi ka bora ba hula kgosi Josia; kgosi ya raya batlhanka ba yone ya re: “Ntlosang gonne ke tlhabilwe mo go botlhoko.” 24Jalo batlhanka ba gagwe ba mo ntsha mo kareng, ba mo tsenya mo kareng ya bobedi e o ne a na nayo, ba mo isa Jerusalema; mme a swa, a fitlhwa mo diphupung tsa borraagwe. Mme Bajuta le ba Jerusalema botlhe ba lelela Josia.
25Jeremia a lelela Josia, le baopedi botlhe ba banna le ba basadi ba bua ka ga Josia mo dilelong tsa bone, nako e sa le eno; mme ba di dira molao o o tlhomameng mo Iseraele: mme bonang, di kwadilwe mo dikhutsafalong.
26Jaana ditiro tse dingwe tsa ga Josia, le ditiro tsa gagwe tse di molemo, jaaka se se kwadilweng mo molaong wa ga Jehofa, 27le ditiro tsa gagwe tsa ntlha le tsa morago, bonang, di kwadilwe mo lokwalong lwa dikgosi tsa Iseraele le Juta.
