2 DITIRAFALO 33

₁E rile Manase a simolola go busa a bo a le dinyaga di le 12; mme a busa ka dinyaga di le 55 mo Jerusalema. ₂Mme a dira se se bosula mo ponong ya ga Jehofa, ka fa dilong tse di makgapha tsa ditšhaba tse Jehofa o ne a di kgoromeletsa ntle fa pele ga bana ba Iseraele. ₃Gonne o ne a ba a aga mafelo a a tlotlometseng a Hesekia rraagwe o ne a a rutlile; a agela boBaale dibeso, a dira Medimako, a obamela bontsi jotlhe jwa legodimo, a bo direla. ₄A aga dibeso mo ntlong ya ga Jehofa, e Jehofa o ne a bua ka ga yone a re: “Leina la me le tlaa nna mo Jerusalema ka bosakhutleng.” ₅A agela bontsi jotlhe jwa legodimo dibeso mo malwapeng a mabedi a ntlo ya ga Jehofa. ₆Le gone a ralatsa bana ba gagwe molelo mo mogogorong wa morwa Hinome, a swaba ka maru, a dira ka mereo, a dira ka boloi, a bua le bone ba ba buang le badimo, le ba e leng baitseanape. A dira bosula bo le botona mo ponong ya ga Jehofa, go mo tlhotlheleletsa bogaleng. ₇Setshwantsho se se setilweng sa modimo wa sesetwa se o se dirileng, a se tlhoma mo ntlong ya Modimo, e Modimo o kileng wa bua ka ga yone le Dafite le Solomone morwawe, wa re: “Mo ntlong e, le mo Jerusalema, o ke o itshenketseng mo ditsong tsotlhe tsa Iseraele, ke tlaa baya leina la me gone ka bosakhutleng. ₈Le gone ga nketla ke tlhola ke sutisa lonao lwa Baiseraele mo lefatsheng le ke le laoletseng borraeno, ke raya fa ba tlhokomela go dira tsotlhe tse ke di ba laoletseng ka Moše, e bong molao otlhe le ditao, le ditaolelo.” ₉Mme Manase a timetsa Bajuta le banni ba Jerusalema, ba ba ba tla ba dira bosula bogolo go ba merafe e Jehofa o kileng a e senya fa pele ga bana ba Iseraele.

₁₀Jehofa a bua le Manase le batho ba gagwe, mme ga ba a ka ba tlhokomela. ₁₁Ke gone ka moo Jehofa a lere mo go bone balaodi ba ntwa ya kgosi ya Asiria; bao ba tshwara Manase ka dikgoge, ba mo golega ka mefiri, ba mo isa kwa Babilone. ₁₂Mme ya re a le mo pitlaganong, a rapela Jehofa Modimo wa gagwe, a ikokobetsa thata fa pele ga Modimo wa borraagwe. ₁₃A o rapela; mme wa rapelesega, wa utlwa mokokotlelo wa gagwe, wa ba wa mo lere gape kwa Jerusalema mo bogosing jwa gagwe. Foo Manase a itse fa Jehofa e le ene Modimo. ₁₄Jaana morago ga moo a agela motse wa ga Dafite lorako lo lo ka kwa ntle, go pota Gihone ntlheng ya bophirimatsatsi, mo molapong, go ya go fitlha fela kwa botsenong jwa kgoro ya ditlhapi; a lo potolosa Ofele, a o goletsa kwa godimo thata. A tsenya balaodisiwa ba ntwa ba ba pelokgale mo metseng yotlhe e e thekeleditsweng ya Juta. ₁₅A tlosa medimo ya seeng, le modimo wa sesetwa mo ntlong ya ga Jehofa, le dibeso tsotlhe tse o kileng a di aga mo thabaneng ya ntlo ya ga Jehofa, le mo Jerusalema, a di latlhela kwa ntle ga motse. ₁₆A aga sebeso sa ga Jehofa, a isa mo go sone ditlhabelo tsa ditshupelo tsa kagiso le tsa tebogo, a laola gore Bajuta ba direle Jehofa Modimo wa Iseraele. ₁₇Le fa go ntse jalo batho ba fela ba isa ditlhabelo mo mafelong a a tlotlometseng, mme ya bo e le go isetsa Jehofa Modimo wa bone fela.

₁₈Jaana ditiro tse dingwe tsa ga Manase, le morapelo wa gagwe mo Modimong wa gagwe, le mafoko a baboni ba ba buileng nae mo ineng la ga Jehofa Modimo wa Iseraele, bonang, a kwadilwe mo ditirong tsa dikgosi tsa Iseraele. ₁₉Le morapelo wa gagwe, le jaaka Modimo o ne wa mo rapelesegela, le boleo jotlhe jwa gagwe, le tlolo ya gagwe, le mafelo kwa o ne a aga mafelo a a tlotlometseng gone, a tlhoma Medimako le ditshwantsho tse di setilweng, pele a ise a ikokobetse; di kwadilwe mo polelong ya ga Hosai. ₂₀Jalo Manase a robala le borraagwe, mme ba mo fitlha mo ntlong ya gagwe; mme Amone morwawe a busa mo boemong jwa gagwe.

₂₁Amone o rile a simolola go busa a bo a le dinyaga di le 22; mme a busa ka dinyaga di le pedi mo Jerusalema. ₂₂A dira se se bosula mo ponong ya ga Jehofa, jaaka go ne go dira Manase rraagwe: Amone a isetsa ditshwantsho tsotlhe tse di setilweng tse Manase rraagwe o kileng a di dira ditlhabelo, mme a di direla. ₂₃Ga a ka a ikokobetsa fa pele ga Jehofa, jaaka go kile ga ikokobetsa Manase rraagwe; mme ene Amone yo, a fela a tswelela go tlola bogolo.

₂₄Batlhanka ba gagwe ba mo rera, ba mmolaela mo ntlong ya gagwe. ₂₅Mme batho ba lefatshe ba bolaya bone botlhe ba ba rerileng kgosi Amone, mme batho ba lefatshe ba dira Josia morwawe kgosi mo boemong jwa gagwe.