2 DITIRAFALO 14

₁Jalo Abija a robala le borraagwe, ba mo fitlha mo motseng wa ga Dafite, mme Asa morwawe a busa mo boemong jwa gagwe. Ya re mo metlheng ya gagwe lefatshe la bona boiketlo ka dinyaga di le some. ₂Asa a dira se se molemo le se se siameng mo matlhong a ga Jehofa Modimo wa gagwe. ₃Gonne o ne a tlosa dibeso tsa seeng, le mafelo a a tlotlometseng, a thubaka maje a a metloutlo, a rema Medimako. ₄A laola Bajuta gore ba batle Jehofa Modimo wa borraabo, le go dira molao le taolo. ₅Le gone a tlosa mafelo a a tlotlometseng le ditshwantsho tsa letsatsi mo metseng yotlhe ya Juta, mme bogosi jwa iketla fa pele ga gagwe. ₆A aga metse e e thekeleditsweng mo Juta, gonne lefatshe le ne le iketlile, mme a se ka a bona ntwa epe ka dinyago tseo, ka gonne Jehofa o na a mo neile boikhutso. ₇Gonne o ne a raya Bajuta a re: “A re ageng metse e, mme re direng dithako mo tikologong ya yone, le dikago tse di godileng tsa phemelo, le ditswalo le mephakalego; lefatshe le sa ntse le le fa pele ga rona, ka re batlile Jehofa Modimo wa rona, re mmatlile, mme o re neile boikhutso ka ntlha tsotlhe. Mme ba aga ba kokotlegela.” ₈Asa o ne a na le ntwa ya banna ba ba tsholang dithebe le marumo, ba ba tswang mo Juta ba le 300 000; le ba ba tswang mo go Benjamine ba le 280 000, ba ba tsholang dithebe ba itse go fula ka bora; ba botlhe e le diganka tse di pelokgale.

₉Mme ba bololelwa ke Sera wa Moethiopia a na le ntwa e le 1 000 000, le dikara di le 300; a fitlha mo Mareša. ₁₀Foo Asa a ya go mo kgatlhantsha, mme ba aba tlhabano mo molapong wa Sefatha kwa Mareša. ₁₁Asa a goela kwa go Jehofa Modimo wa gagwe a re: “Jehofa, ga go na ope kwa ntle ga gago yo o thusang, gare ga mothata le yo o se nang nonofo; re thuse Jehofa Modimo wa rona, gonne re ikaegile mo go wena, re bololetse bontsi jo ka leina la gago. Jehofa, ke wena Modimo wa rona, a motho a se go fenye.”

₁₂Jalo Jehofa a kgemetha Baethiopia fa pele ga Asa, le fa pele ga ba Juta, mme Baethiopia ba tshaba. ₁₃Asa le batho ba a nang nabo a ba konatelela ba ya go fitlha kwa Gerare, mme Baethiopia ba wa ka bontsi jo bogolo; ya ba ya nna motlhakola o o diphepa, gonne ba ne ba thubegile fa pele ga Jehofa, le fa pele ga ntwa ya gagwe; mme ba tsaya thopo e le kgolo thata. ₁₄Ba kgemetha metse yotlhe e e mo tikologong ya Gerare, gonne poifo ya ga Jehofa ya tla mo go bone, mme ba thopa metse yotlhe, gonne go le thopo e le kgolo mo go yone. ₁₅Ba kgemetha le yone megope ya dikgomo, ba ba ba gapa dinku di le dintsi le dikamela, mme ba boela Jerusalema.