1Ga dirala ya re ka metlha eo Bafilisitia ba phuthela mephato ya bone go ya ntweng, go ya go tlhabana le Baiseraele. Akiše a raya Dafite a re: “O bo o itse fa o bolola le nna mo ntweng, wena le banna ba gago.”
2Dafite a raya Akiše a re: “Ka re, o tlaa itse se motlhanka wa gago o tlaa se dirang.” Akiše a raya Dafite a re: “Ke tlaa go dira modisa wa tlhogo ya me ka bosakhutleng.”
Saule o ya go bua le badimo le bomaitseanape ba Enetore
3Jaana Samuele o ne a sule, mme Baiseraele botlhe ba mo leletse; ba mo fitlhile mo Rama, e bong mo motseng wa ga gabo. Saule o ne a tlositse ba ba buang le badimo le ba e leng baitseanape mo lefatsheng.
4Bafilisitia ba phuthega ba fitlha ba thibelela mo Shuneme; Saule a phutha Baiseraele botlhe, ba thibelela mo Gileboa. 5E rile Saule a bona ntwa ya Bafilisitia a boifa, pelo ya gagwe ya roroma thata. 6E rile Saule a botsa mo go Jehofa, Jehofa a se ka a mo araba, le fa e le ka ditoro, le fa e le ka Urime, le fa e le ka baperofeti. 7Foo Saule a raya batlhanka ba gagwe a re: “Mpatlelang mosadi mongwe yo o buang le badimo gore ke tle ke ye kwa go ene ke ye go mmotsa.” Batlhanka ba gagwe ba mo raya ba re: “Bona, kwa Enetore go na le mosadiyo o buang le badimo.”
8Saule a iphetola, a apara diaparo di sele, a ya, ene le banna ba le babedi ba ya nae, mme ba fitlha kwa mosading yoo go le bosigo; mme a re: “Ke a go rapela, a ko o ntshwabele, o mpolelele ka mowa wa sedimo, o tle o ntlhatlosetse mongwe fela yo ke tlaa mo go umakelang.”
9Mosadi a mo raya a re: “Bona, o a itse se Saule o se dirileng, jaaka a tlositse bone ba ba buang le badimo, le baitseanape mo lefatsheng; mme o beelelang botshelo jwa me seru go tla o mpolaya?”
10Mme Saule a mo ikanela ka Jehofa a re: “Jaaka Jehofa a tshedile, ga o ketla o diralelwa ke petso epe ka ga selo se.”
11Foo mosadi a re: “Ke tlaa go tlhatlosetsa mang?” A re: “O tle o ntlhatlosetse Samuele.”
12E rile mosadi a bona Samuele, a gala ka lentswe le legolo; mme mosadi a bua le Saule a re: “O ntsieleditseng? Gonne o Saule.”
13Kgosi ya mo raya ya re: “O se ka wa boifa; gonne o bona eng?” Mme mosadi a raya Saule a re: “Ke bona modimo mongwe o tlhatloga o tswa mo mmung.”
14A mo raya a re: “Popego ya one e ntse jang?” Mosadi a re: “Go tlhatloga monnamogolo; o khurumeditswe ka kobo.” Saule a lemoga fa e le Samuele, mme a inamela fa fatshe ka sefatlhogo, a ikoba.
15Samuele a raya Saule a re: “Ana o ntlhokiseditseng boiketlo ka go ntlhatlosa?” Saule a mo fetola a re: “Ke pitlaganye thata; gonne Bafilisitia ba nkepela dira, Modimo o ntlogetse, ga o tlhole o nkaraba le fa e le ka baperofeti, le fa e le ka ditoro; ke gone ka moo ke biditseng wena, gore o tle o nkitsise se ke tlaa se dirang.”
16Samuele a re: “Ke ka ntlha yang o botsa nna, ka e le fa Jehofa a go tlogetse, o bile o ntse mmaba wa gago? 17Jehofa o itiretse jaaka a ne a bua ka nna; gape Jehofa o rutlile bogosi mo seatleng sa gago, o bo neile wa gaeno, e bong Dafite. 18E re ka o se ka wa akela lentswe la ga Jehofa, wa ba wa se ka wa dirafatsa bogale jo bogolo jwa gagwe mo go Baamaleke, ke gone ka moo Jehofa o go diretseng selo se gompieno. 19Gape le Baiseraele, Jehofa o tlaa ba tsenya nao mo seatleng sa Bafilisitia; e tlaa re ka moso wena le bomorwao lo bo lo nna le nna; Jehofa o tlaa tsenya le lone lesomosomo la Iseraele mo seatleng sa Bafilisitia.”
20Foo Saule a tloga a wa a namalala fa fatshe, a boifa thata, ka ntlha ya mafoko a ga Samuele; ga bo go se na thata mo go ene; gonne a tlhotse a bile a letse a sa je dijo. 21Mosadi a tla kwa go Saule, a bona fa a tlaletswe thata, mme a mo raya a re: “Bona lelata la gago le reeditse lentswe la gago, mme ka baya botshelo jwa me mo seatleng sa me, ke reeditse mafoko a gago a o ne o a bua le nna. 22Jaana ka re: Ke a go rapela, le wena o reetse lentswe la lelata la gago, o mme ke beye dijonyana fa pele ga gago; mme o je, gore o bone thata fa o tsamaya.”
23Mme a gana, a re: “Ga ke je.” Batlhanka ba gagwe ba na le mosadi ba mo patelela ka thata; mme a reetsa lentswe la bone. A namologa fa fatshe, a dula fa bolaong. 24Mosadi a bo a na le namane e e nonneng mo ntlong; mme a akofa, a e tlhaba; a tsaya setou, a se duba, a se besa senkgwe se se sa bedisiwang. 25A di baya fa pele ga Saule le fa pele ga batlhanka ba gagwe; mme ba ja. Foo ba nanoga ba tsamaya bosigo joo.
