1 SAMUELE 14

₁Jaana ga dirala ya re ka tsatsi lengwe Jonathane, morwa Saule, a raya lekau le le mo tsholelang dibolao tsa gagwe a re: “Ntlo, a re kgabaganyetse kwa setlhopheng sa masole a Bafilisitia se se kwa moseja.” Mme a se ka a bolelela rraagwe. ₂Saule a nna kwa sekhutlong sa Gibea fa tlase ga setlhare sa mogaranata se se mo Migerone; batho ba o ne a na nabo ya bo e ka ne e le ba ba 600; ₃le Ahija, morwa Ahitube, mogoloa Ikabote, morwa Finease morwa Eli, moperesiti wa ga Jehofa mo Shilo, a apere sekhutlana. Batho ba bo ba sa itse fa Jonathane a tsamaile.

₄Fa gare ga diphata tse Jonathane o batlang go kgabaganyetsa kwa setlhopheng sa masole a Bafilisitia ka tsone, ga bo go le lefika le le dikgaga ka fa ntlheng nngwe, le lefika le le dikgaga ka fa ntlheng e nngwe; leina la lengwe e ne e le Bosese, le leina la le lengwe Sene. ₅Lefika le lengwe la bo le eme ka fa ntlheng ya botsheka fa pele ga Mikemaša, le lengwe ntlheng ya borwa fa pele ga Geba.

₆Jonathane a raya lekau le le mo tsholelang dibolao tsa gagwe, a re: “Ntlo, a re kgabaganyetse kwa setlhopheng sa ba ba sa rupang bale; e ka tla ya re gongwe Jehofa a re direla, gonne Jehofa ga a kgorelediwe go boloka ka bontsi le fa e le ka bobotlana.”

₇Motshola dibolao tsa gagwe a mo raya a re: “Dira gotlhe mo go mo pelong ya gago; fapoga fela, bona, ke na nao ka fa pelong ya gago.”

₈Foo Jonathane a re: “Bona, re tlaa kgabaganyetsa kwa banneng bale, mme re tlaa ba itshenolela. ₉E tlaa re fa ba re raya ba re re eme gore ba tle kwa go rona, foo re tlaa ema felong ga rona, re sa ye kwa go bone. ₁₀Mme fa ba re raya ba re: ‘Tlhatlogelang kwano go rona’; foo re tlaa tlhatloga; gonne Jehofa o tlaa bo a ba tsentse mo seatleng sa rona; se e tlaa nna sesupo go rona.”

₁₁Mme ba itshenolela setlhopha sa masole a Bifilisitia ka bobedi jwa bone; Bafilisitia ba re: “Bonang, Bahebere ba tswa mo mesimeng kwa ba ne ba iphitlhile gone.” ₁₂Banna ba setlhopha sa masole ba fetola Jonathane le motshola dibolao tsa gagwe ba re: “Tlhatlogelang kwano go rona, re tlaa lo supetsa sengwe.” Jonathane a raya motshola dibolao tsa gagwe a re: “Tlhatloga morago ga me, gonne Jehofa o ba tsentse mo seatleng sa Iseraele.” ₁₃Jonathane a palama ka diatla le dinao, le motshola dibolao tsa gagwe morago ga gagwe. Mme ba wa fa pele ga Jonathane; motshola dibolao tsa gagwe a ba fofotsa fa morago ga gagwe. ₁₄Polao eo ya ntlha e Jonathane le motshola dibolao tsa gagwe ba ne ba e dira, e ne e le ya batho e ka ne e le 20, mo sebakeng se se kanang ka ntlhanngwe ya tema ya dikgomo. ₁₅Ga bo go le thoromo mo bothibelelong, mo nageng, le mo bathong botlhe; ba setlhopha sa masole, le ba bonokwane le bone ba roroma; lefatshe la reketla; ga nna thoromo e kgolo thata.

₁₆Balebedi ba ga Saule mo Gibea wa Benjamine ba leba; mme bonang, bontsi jwa bo bo swalala, ba falalela kwa le kwa. ₁₇Foo Saule a raya batho ba o ne a na nabo a re: “Balang jaana, lo bone yo o duleng mo go rona.” E rile ba sena go bala, bonang, Jonathane le motshola dibolao tsa gagwe ba bo ba seyo. ₁₈Saule a raya Ahija a re: “Lere kwano letlole la Modimo.” Gonne letlole la Modimo le ne le le gone ka baka loo le na le bana ba Iseraele. ₁₉Ga dirala ya re Saule a sa ntse a bua le moperesiti, pheretlho e e mo bothibelelong jwa Bafilisitia ya tswelela ya gola; Saule a raya moperesiti a re: “Gona letsogo la gago.” ₂₀Saule le batho botlhe ba o nang nabo ba phuthega mmogo, ba tla tlhabanong, mme bonang, tšhaka ya motho mongwe le mongwe ya ekelwa mongwe ka ene, ga nna pheretlhego e kgolo thata. ₂₁Jaana Bahebere ba ba ntseng le Bafilisitia gale, ba ba ileng nabo mo bothibelelong ba tswa mo lefatsheng mo tikologong; le bone ba retologa ba ya go pata Baiseraele, ba ba nang le Saule le Jonathane. ₂₂Le bone batho botlhe ba Iseraele ba ba iphitlhileng mo lefatsheng la Eferaime la makgabana, e rile ba utlwa fa Bafilisitia ba tshabile, le bone ba bakonatelela ka thata mo tlhabanong. ₂₃Jalo Jehofa a golola Iseraele ka tsatsi leo; mme tlhabano ya kgabaganya ka fa Bethafene.

₂₄Batho ba Iseraele ba ne ba pitlagana ka tsatsi leo, gonne Saule a ne a ikanisa batho a re: “Go hutsege motho yo o tlaa jang dijo go ya maitseboeng, go tsamaya ke itefetsa mo babeng ba me.” Jalo go se ka ga nna le ope mo bathong botlhe yo o utlwang dijo. ₂₅Batho botlhe ba tla mo sekgweng, mme ga bo go le dinotshe fa fatshe. ₂₆E rile batho ba tla mo sekgweng, bonang, dinotshe tsa bo di rotha, ope a se ka a isa letsogo mo ganong; gonne batho ba boifa ikano. ₂₇Jonathane ga a ka a utlwa rraagwe a laya batho ka ikano eo; ka ntlha ya gone moo a ntsha thupa e e mo seatleng sa gagwe, a e tsenya mo lomepeng lwa dinotshe, a isa letsogo mo ganong; mme matlho a gagwe a bonesega. ₂₈Foo mongwe wa batho a bua a re: “Rraago o ne a laya ka thata ka ikano a re: ‘Go hutsege motho yo o tlaa jang dijo gompieno.’ Mme batho ba ne ba lapile.”

₂₉Foo Jonathane a re: “Rre o tshwentse lefatshe; a ko lo bone jaaka matlho a me a bonesitswe, ka ke utlwile go le gonnyennyane ga dinotshe tse. ₃₀Go ne go tlaa nna molemo bogolo jang fa batho ba ka bo ba jele thopo ya baba ba bone gompieno e ba e fitlhetseng, ka e le fa polao mo Bafilisiteng e ka bo e nnile kgolo thata.”

₃₁Ba bolaya Bafilisitia ka tsatsi leo go tswa Mikemaša go ya Aijalone. Batho ba ne ba lapile thata. ₃₂Batho ba phomegela thopo, ba gapa dinku, dikgomo, le dinamane, ba di bolaela fela fa fatshe; mme batho ba di jela le madi a tsone. ₃₃Foo ba bolelela Saule ba re: “Bona, batho ba leofela Jehofa ka ba jela le madi.” Mme a re: “Lo dirile ka bonongwane; hidikololelang lentswe le legolo kwano go nna gompieno.” ₃₄Saule a re: “Phatlalalelang mo bathong lo ba reye lo re: ‘A mongwe le mongwe a nteretse kgomo ya gagwe, le mongwe le mongwe nku ya gagwe, lo di bolaele fa, lo je; lo se ka lwa leofela Jehofa ka go jela le madi.’ ” Batho botlhe, mongwe le mongwe a tla le kgomo ya gagwe bosigo joo, ba di bolaela gone. ₃₅Saule a agela Jehofa sebeso; ya bo e le sone sebeso sa ntlha se o se agetseng Jehofa.

₃₆Saule a re: “A re fologeng re lateleng Bafilisitia bosigo, re ba thopeng go ya boseng, mme re se ka ra tlogela motho ope wa bone.” Ba re: “Dira se o se bonang se le molemo, le fa e ka bo e le eng.” Foo moperesiti a re: “A re atameleng kwano Modimong.”

₃₇Saule a lopa kgakololo mo Modimong a re: “A ke ke fologe ke latele Bafilisitia? A o tlaa ba tsenya mo seatleng sa Baiseraele?” Mme ga o a ka wa mo fetola ka tsatsi leo. ₃₈Saule a re: “Atamelang kwano lona bagolwane lotlhe ba batho, lo itse, lo bo lo bone kwa boleo jo bo ne bo le gone gompieno. ₃₉Gonne jaaka Jehofa a tshedile, yo o gololang Iseraele, le fa bo ka ne bo le mo go Jonathane morwaake, ruri o tlaa swa.” Mme go ne go se motho ope mo bathong botlhe yo o mo fetolang. ₄₀Foo a raya Baiseraele botlhe a re: “Lona lo nneng ntlheng nngwe, nna le Jonathane morwaake re tlaa nna ntlheng e nngwe.” Batho ba raya Saule ba re: “Dira se o se bonang se le molemo.”

₄₁Ke gone Saule a raya Jehofa Modimo wa Iseraele a re: “Supa tshiamo.” Mme Jonathane le Saule ba tlhaolwa ke bola, mme batho bone ba falola. ₄₂Saule a re: “Thelang bola gare ga me le Jonathane morwaake.” Mme Jonathane a tlhaolwa. ₄₃Foo Saule a raya Jonathane a re: “Mpolelela se o se dirileng,” Jonathane a mmolelela a re: “Ruri ka utlwa dinotshenyana ka ntlha ya thupa e e neng e le mo seatleng sa me; mme bona, ke na le go swa fela.”

₄₄Saule a re: “A Modimo o dire jalo le go feta foo; gonne ruri o tlaa swa, Jonathane.”

₄₅Mme batho ba raya Saule ba re: “A Jonathane o tlaa swa, yo o dirileng kgololo e kgolo e mo Iseraele? A go se nne jalo; jaaka Jehofa a tshedile, ga go ketla go wela moriri le fa e le o le mongwe fela wa tlhogo ya gagwe fa fatshe; gonne o dirile le Modimo gompieno.” Mme batho ba rekolola Jonathane gore a se swe.

₄₆Foo Saule a tlhatloga a lesa go latela Bafilisitia; mme Bafilisitia ba ya magabone.

₄₇Jaana e rile Saule a sena go tsaya bogosi jwa Iseraele, a tlhabana le baba ba gagwe botlhe mo ntlheng tsotlhe, e bong le Moabe, le bana ba Amone, le Etome, le dikgosi tsa Soba, le Bafilisitia; mme gongwe le gongwe kwa o retologelang gone, a ba tshwenye. ₄₈A dira ka bopelokgale, a kgemetha Baamaleke, a golola Iseraele mo seatleng sa bone ba ba ba thopang.

₄₉Jaana bomorwa Saule e ne e le Jonathane, le Išifi, le Melekišue; maina a bomorwadie ba babedi e ne e le a: Leina la wa ntlha e le Merabe, leina la yo mmotlana Mikale. ₅₀Leina la mosadi wa ga Saule e ne e le Ahinoame morwadia Ahimaase. Leina la molaodi wa ntwa ya gagwe, e le Abenere morwa Nere, rrangwanaagwe Saule. ₅₁Kiše e ne e le rraagwe Saule; mme Nere rra Abenere e le morwa Abiele.

₅₂Go ne go le ntwa e e botlhoko le Bafilisitia ka metlha yotlhe ya ga Saule; mme e ne e tle e re Saule a bona motho yo o senatla, kgotsa motho yo o pelokgale, a mo itseele a ye kwa go ene.