Samuele o bua le batho
1Samuele a raya Baiserale botlhe a re: “Bonang, ke reeditse lentswe la lona mo go tsotlhe tse lo di buileng le nna, mme ke lo diretse kgosi. 2Jaana, bonang, kgosi e fa pele go lona; nna ke tsofetse, ke thuntse; bomorwaake ba na le lona; nna ke ntse ka sepela fa pele ga lona, go tswa bokaung jwa me nako e sa le eno. 3Ke nna yono; supang ka ga me fa pele ga Jehofa le fa pele ga Motlodiwa wa gagwe; ke gapetse mang kgomo? Kgotsa ke gapetse mang esela? Kgotsa ke tsieditse mang? Kgotsa ke patikile mang? Kgotsa ke tshotse mo go mang tuelo ya gore ke iphoufatse ka yone? Mme ke tlaa e busetsa kwa go lona.”
4Ba re: “Ga o a re tsietsa le fa e le go re patika, le gone ga o a tsaya sepe mo seatleng sa ope.”
5A ba raya a re: “Jehofa ke mosupi ka ga lona, motlodiwa wa gagwe le ene ke mosupi monomotlha, fa lo sa bone sepe mo seatleng sa me.” Mme ba re: “Ee, o mosupi.”
6Samuele a raya batho a re: “Ke Jehofa yo o ne a tlhoma Moše le Arone, a ntsha borraa lona mo lefatsheng la Egepeto. 7Ke gone jaana, emang fela, gore ke ganetsanye le lona fa pele ga Jehofa ka ga ditiro tsotlhe tsa tshiamo tsa Jehofa, tse o di diretseng lona le borraa lona. 8E rile Jakobe a sena go fitlha mo Egepeto, borraa lona ba goela kwa go Jehofa, foo Jehofa a roma Moše le Arone, ba ba ntshitseng borraa lona mo Egepeto ba ba agisa mo felong fa. 9Mme ba tloga ba lebala Jehofa Modimo wa bone, a ba rekisetsa mo seatleng sa ga Sisera, molaodi wa ntwa ya ga Hasore, le mo seatleng sa Bafilisitia, le mo seatleng sa kgosi ya Moabe, ba tlhabana nabo. 10Mme ba goela kwa go Jehofa ba re: ‘Re leofile ka re latlhile Jehofa, re bile re diretse boBaale le boAšetarothe. Re golole mo seatleng sa baba ba rona, mme re tlaa go direla.’ 11Mme Jehofa a roma Jerubaale, le Betane, le Jefetha, le Samuele, a lo golola mo seatleng sa baba ba lona mo ntlheng tsotlhe, lwa aga ka thagamo. 12E rile lo bona fa Nahaše kgosi ya bana ba ga Amone a lo bololetse lwa nthaya lwa re: ‘Nnyaa, mma re busiwe ke kgosi;’ le mororo Jehofa Modimo wa lona e ne e le ene kgosi ya lona.
13“Mme jaana bonang kgosi e lo e itshenketseng, e lo e lopileng; bonang, Jehofa o lo tlhometse kgosi. 14E tlaa re fa lo boifa Jehofa, lo mo direla, lo reetsa lentswe la gagwe, lo sa tsuololele taolo ya ga Jehofa, fa lona le kgosi e e lo busang lo sala Jehofa Modimo wa lona morago, go tlaa nna molemo. 15Mme fa lo gana go reetsa lentswe la ga Jehofa, lo tsuololela taolo ya ga Jehofa, foo seatla sa Jehofa se tlaa tlhabana le lona, jaaka se tlhabana le borraa lona. 16Ke gone jaana emang fela, lo bone selo se segolo se, se Jehofa o tlaa se dirang fa pele ga matlho a lona. 17A ga se thobo ya mabele a masesane gompieno? Ke tlaa biletsa kwa go Jehofa, gore a lere tumo ya maru le pula; mme lo tlaa itse, lo bo lo bona fa boikepo jwa lona bo le bogolo, jo lo bo dirileng mo ponong ya ga Jehofa ka go lopa kgosi.”
18Jalo Samuele a biletsa kwa go Jehofa; mme Jehofa a tlisa tumo ya maru le pula ka tsatsi leo; mme batho botlhe ba boifa Jehofa le Samuele thata. 19Batho botlhe ba raya Samuele ba re: “Rapelela batlhanka ba gago mo go Jehofa Modimo wa gago, gore re se swe; gonne re okeditse maleo otlhe a rona ka bosula jo, jwa go lopa kgosi.”
20Samuele a raya batho a re: “Se boifeng; ruri lo dirile bosula jotlhe jo; le fa go ntse jalo, lo se ka lwa fapoga mo go saleng Jehofa morago; lo direleng Jehofa ka pelo yotlhe ya lona. 21Le gone lo se ka lwa fapoga, gonne foo lo ne lo tlaa ba lo latela dilo tsa lefela fela, tse di sa ka keng tsa thusa le fa e le go golola, gonne di lefela fela. 22Gone Jehofa ga a ketla a latlha batho ba gagwe ka ntlha ya leina la gagwe le legolo, ka gobo go kgatlhile Jehofa go lo itirela tšhaba ya gagwe ka esi. 23Gape ka ga me, a go nne kgakala le nna go leofela Jehofa ka go bakela go lo rapelela; ke tlaa lo ruta tsela e e molemo, le e e siameng. 24Boifang Jehofa fela, lo mo direle ka boammaaruri, ka pelo yotlhe ya lona; lo gopole go re, dilo dikgolo jang tse o di lo diretseng. 25Mme e tlaa re fa lo ntse lo ikepa lo tlaa nyelediwa, lona le kgosi ya lona.”
