1 DIKGOSI 22

₁Ga feta dinyaga di le tharo go sena ntwa gare ga Basiria le Baiseraele. ₂Mme ga dirala ya re ka ngwaga wa boraro, Jehošafate kgosi ya Juta a etela kgosi ya Iseraele.

₃Kgosi ya Iseraele ya raya batlhanka ba yone ya re: “A lo a itse fa Ramothe-gileate e le wa rona, mme re ntse fela re sa o gape mo seatleng sa kgosi ya Siria?” ₄A raya Jehošafate a re: “A o tlaa bolola le nna re ya go tlhabana kwa Ramothe-gileate?” Jehošafate a raya kgosi ya Iseraele a re: “Nna ke ntse fela jaaka wena, le batho ba me ba ntse jaaka batho ba gago, le dipitse tsa me jaaka dipitse tsa gago.” ₅Jehošafate a raya kgosi ya Iseraele a re: “Ke a go rapela, botsa lefoko la ga Jehofa gompieno.”

₆Foo kgosi ya Iseraele ya phutha baperofeti, e ka ne e le banna ba le 400, a ba raya a re: “A ke bolole ke ye go tlhasela Ramothe-gileate, kgotsa ke nne fela?” Mme ba re: “Tsamaya; gonne Jehofa o tlaa o tsenya mo seatleng sa kgosi.”

₇Jehošafate a re: “A ga go na moperofeti wa ga Jehofa fano gape, yo re ka botsang mo go ene?”

₈Kgosi ya Iseraele ya raya Jehošafate ya re: “Go sa na le monna mongwe yo re ka botsang mo go Jehofa ka ene, Mikaia morwa Imela; mme ke a mo ila; gonne ga a ke a bolela molemo ka ga me, fa e se bosula fela.” Jehošafate a re: “A kgosi e se re jalo.”

₉Foo kgosi ya Iseraele ya bitsa molaodisiwa mongwe, a mo raya a re: “Itlhaganele o ye go mpiletsa Mikaia morwa Imela.”

₁₀Mme jaana kgosi ya Iseraele le Jehošafate kgosi ya Juta, mongwe le mongwe a bo a dutse mo setulong sa gagwe sa bogosi, ba kgabile ka dikobo tsa bone, ba le mo patlelong fa botsenong jwa kgoro ya Samaria; mme baperofeti botlhe ba bo ba bolela fa pele ga bone. ₁₁Setekia morwa Kenana a itirela dinaka tsa tshipi, mme a re: “Jehofa o bua jaana a re: ‘O tlaa kgorometsa Basiria ka tse, go tsamaya ba nyelela.’ ” ₁₂Baperofeti botlhe ba bolela jalo ba re: “Ya kwa Ramothe-gileate, mme o tlhogonolofale; gonne Jehofa o tlaa o tsenya mo seatleng sa kgosi.”

₁₃Morongwa yo o ne a ile go bitsa Mikaia a bua nae, a re: “A ko o bone, mafoko a baperofeti a bolelela kgosi molemo ka molomo o le mongwe fela; ke a go rapela, a lefoko la gago le tshwane le lefoko la mongwe wa bone, o bolele molemo fela.”

₁₄Mme Mikaia a re: “Jaaka Jehofa a tshedile, se Jehofa o se mpolelelang ke tlaa bua sone fela.”

₁₅Ya re a sena go tla kgosing, kgosi ya mo raya ya re: “Mikaia, a re ye go tlhasela fela kwa Ramothe-gileate, kgotsa re nne fela?” Mme a mo fetola a re: “Ya, o tlhogonolofale; mme Jehofa o tlaa o tsenya mo seatleng sa kgosi.”

₁₆Kgosi ya mo raya ya re: “Ke tlaa go ikanisa ga kae, gore o se bue sepe le nna fa e se boammaaruri fela mo ineng la ga Jehofa.”

₁₇A re: “Ke ne ka bona Baiseraele botlhe ba falaletse mo dithabeng, jaaka dinku tse di se nang modisa; Jehofa a re: ‘Ba, ga ba na mong; a mongwe le mongwe wa bone a boele kwa ntlong ya gagwe ka kagiso.’ ”

₁₈Kgosi ya Iseraele ya raya Jehošafate ya re: “A ga ke a go bolelela fa a se ketla a bolela molemo ka ga me, fa e se bosula fela?”

₁₉Mme a re: “Ke gone, wena, utlwa lefoko la ga Jehofa; ka bona Jehofa a dutse mo setulong sa gagwe sa bogosi, mme lesomosomo lotlhe la legodimo la bo le eme fa go ene ka fa tsogong le legolo, le ka fa go la molema. ₂₀Jehofa a re: ‘E mang yo o tlaa tsietsang Ahabe gore a tle a ye kwa Ramothe-gileate, mme a wele gone?’ Mongwe a bua jaana, yo mongwe a bua ka go sele. ₂₁Ga tswa mowa mongwe wa ya go ema fa pele ga Jehofa wa re: ‘Ke nna ke tlaa mo fepisang.’ ₂₂Jehofa a o raya a re: ‘Kang?’ Wa re: ‘Ke tlaa tswa ke nna mowa o o akang mo melomong ya baperofeti botlhe ba gagwe.’ Mme a re: ‘O tlaa mo fepisa, le gone o tlaa mo fenya; tswa o ye o dire jalo.’

₂₃“Ke gone bona, Jehofa o tsentse mowa o o akang mo melomong ya baperofeti botlhe ba, ba gago; Jehofa o buile bosula ka ga gago.”

₂₄Foo Setekia morwa Kenana a atamela, mme a faphola Mikaia mo lesameng a re: “Ana mowa wa Modimo o dule mo go nna ka tsela efe wa ya go bua le wena?”

₂₅Mikaia a re: “Bona, o tlaa bona ka tsatsi leo, motlhang o tsenang mo ntlwaneng e e kwa teng o ya go iphitlha gone.”

₂₆Kgosi ya Iseraele ya re: “Tshwarang Mikaia, lo mmusetse kwa go Amone molaodi wa motse, le kwa go Joaše morwa kgosi; ₂₇lo re: ‘Kgosi ya re: Tsenyang seo se sa motho mo ntlong ya kgolegelo, lo mo otle ka dijo tsa patikego le ka metsi a patikego, go tsamaya ke tla ka kagiso.’ ”

₂₈Mikaia a re: “E tlaa re fa o ka boa le fa e le motlha mongwe ka kagiso, Jehofa o tlaa bo a sa bua ka nna.” Mme a re: “Utlwang lona lotlhe ditšhaba.”

₂₉Jalo kgosi ya Iseraele le Jehošafate kgosi ya Juta ba ya kwa Ramothe-gileate. ₃₀Mme kgosi ya Iseraele ya raya Jehošafate ya re: “Ke tlaa ikgakisa, ke itse go tsena mo tlhabanong, wena o apare dikobo tsa gago.” Kgosi ya Iseraele ya ikgakisa, ya tsena mo tlhabanong.

₃₁Kgosi ya Siria e ne e laotse balaodi ba ba 32 ba dikara tsa gagwe, a re: “Lo se ka lwa tlhabana le ope monnye le fa e le mogolo, fa e se le kgosi ya Iseraele e le yosi fela.” ₃₂Ga dirala ya re balaodi ba dikara ba bona Jehošafate, ba re: “E tlaa bo e le ene kgosi ya Iseraele.” Mme ba fapoga ba ya go tlhabana nae; mme Jehošafate a goa. ₃₃Ga dirala ya re balaodi ba dikara ba bona fa e se kgosi ya Iseraele, ba bowa kwa go mo konateleleng. ₃₄Monna mongwe a fula fela ka bora, ka phaphauletso, a betsa kgosi ya Iseraele fa malokolong a moitshomelo wa phemelo; ka ntlha ya moo a raya mokgweetsi wa kara ya gagwe a re: “Retolola letsogo la gago o nntshe mo ntweng; gonne ke tlhabilwe mo go botlhoko.”

₃₅Tlhabano ya gakala ka tsatsi leo; mme kgosi ya tshegediwa mo kareng ya gagwe go tlhabanwa le Basiria, mme a tla a swa maitsebowa; mme madi a tshologela mo khuting ya kara a tswa mo nthong. ₃₆Ya re letsatsi le kotlomela mokgosi wa lela wa ya le ntwa yotlhe, ga twe: “A mongwe le mongwe a ye motseng wa ga gabo, le mongwe le mongwe lefatsheng la ga gabo.”

₃₇Jalo kgosi ya swa, ya isiwa kwa Samaria; ba fitlha kgosi mo Samaria. ₃₈Ba tlhatswa kara fa lekadibeng la Samaria; mme dintša tsa tlhabuketsa madi a gagwe; (aitse basadi ba diaka ba ne ba tle ba itlhapise gone); jaaka lefoko la ga Jehofa le o kileng a le bua.

₃₉Ditiro tse dingwe tsa ga Ahabe, le tsotlhe tse o ne a di dira, le ntlo ya naka tsa tlou e o ne a e aga, le metse yotlhe e o ne a e aga, a ga go a kwalwa mo lokwalong lwa ditirafalo tsa dikgosi tsa Iseraele? ₄₀Jalo Ahabe, a robala le borraagwe; mme Ahasia morwawe a busa mo boemong jwa gagwe.

₄₁Jehošafate morwa Asa a simolola go busa Bajuta ka ngwaga wa bone wa ga Ahabe kgosi ya Iseraele. ₄₂E rile Jehošafate a simolola go busa a bo a le dinyaga di le 35; a busa ka dinyaga di le 25 mo Jerusalema. Leina la ga mmaagwe e ne e le Asube morwadia Shilefi. ₄₃A sepela mo tseleng yotlhe ya ga Asa rraagwe; ga a ka a fapoga mo go yone, a ntse a dira se se molemo mo matlhong a ga Jehofa, le fa go ntse jalo mafelo a a tlotlometseng a se ka a tlosiwa; batho ba nna ba isa ditlhabelo ba fisa maswalo mo mafelong a a tlotlometseng. ₄₄Jehošafate a dira kagiso le kgosi ya Iseraele.

₄₅Ditiro tse dingwe tsa ga Jehošafate, le bonatla jwa gagwe jo o ne a bo bonatsa, le jaaka a ne a tlhabana, a ga go a kwalwa mo lokwalong lwa ditiralelo tsa dikgosi tsa Juta? ₄₆Le masalela a basotoma a a ne a setse mo metlheng ya ga Asa rraagwe, a a tlosa mo lefatsheng.

₄₇Ga bo go se na kgosi epe mo Etome; molaodisiwa e le ene kgosi.

₄₈Jehošafate a dira dikepe tsa Tarešiše tsa go ya go tsaya gouta kwa Ofire: mme ga di a ka tsa ya; gonne dikepe di ile tsa thubega kwa Esione-gebere. ₄₉Foo Ahasia morwa Ahabe a raya Jehošafate a re: “A batlhanka ba me ba ye le batlhanka ba gago mo dikepeng.” Mme Jehošafate a gana.

₅₀Jehošafate a robala le borraagwe, a fitlhwa le borraagwe mo motseng wa ga Dafite rraagwe; Jehorame morwawe a busa mo boemong jwa gagwe.

₅₁Ahasia morwa Ahabe a simolola go busa Baiseraele mo Samaria ka ngwaga wa lesome le bosupa wa ga Jehošafate kgosi ya Juta, a busa Baiseraele ka dinyaga di le pedi. ₅₂Mme a dira se se bosula mo ponong ya ga Jehofa, a sepela mo tseleng ya ga rraagwe, le mo tseleng ya ga Jeroboame morwa Nebate, yo o ne a leofisa Baiseraele. ₅₃A direla Baale, a mo obamela, mme a tlhotlheletsa Jehofa Modimo wa Iseraele mo bogaleng, jaaka tsotlhe tse rraagwe o kileng a di dira.