1 DIKGOSI 15

₁Jaana e rile ka ngwaga wa 18 wa kgosi Jeroboame morwa Nebate, Abijame a simolola go busa mo Juta. ₂A busa ka dinyaga di le tharo mo Jerusalema; leina la ga mmaagwe e ne e le Maaka morwadia Abišalome. ₃A sepela mo maleong otlhe a rraagwe o ne a a dirile pele ga gagwe; pelo ya gagwe e sa itekanelana le Jehofa Modimo wa gagwe, jaaka pelo ya ga Dafite rraagwe. ₄Mme le fa go ntse jalo ka ntlha ya ga Dafite, Jehofa Modimo wa gagwe a mo naya lobone mo Jerusalema, go tla a emisa morwawe morago ga gagwe, le go tlhomamisa Jerusalema; ₅gonne Dafite o ne a dira se se siameng mo matlhong a ga Jehofa, a se ka a fapoga mo go sepe se o se mo laoletseng ka metlha yotlhe ya botshelo jwa gagwe, fa e se mo tirong ele ya ga Uria wa Mohite. ₆Jaana ga bo go le ntwa gare ga Rehoboame le Jeroboame ka metlha yotlhe ya botshelo jwa gagwe. ₇Ditiro tse dingwe tsa ga Abijame, le tsotlhe tse o ne a di dira, a ga di a kwalwa mo lokwalong lwa ditirafalo tsa dikgosi tsa Juta? Mme go ne go le ntwa gare ga Abijame le Jeroboame.

₈Abijame a robala le borraagwe, mme ba mo fitlha mo motseng wa ga Dafite. Asa morwawe a busa mo boemong jwa gagwe.

₉E rile ka ngwaga wa 20 wa ga Jeroboame kgosi ya Iseraele, Asa a simolola go busa mo Juta. ₁₀A busa ka dinyaga di le 41 mo Jerusalema. Leina la ga mmaagwe e ne e le Maaka morwadia Abišalome. ₁₁Asa a dira se se siameng mo matlhong a ga Jehofa, jaaka Dafite rraagwe a ne a dira. ₁₂A tlosa Basotoma mo lefatsheng, a ba a tlosa medimo yotlhe ya disetwa e borraagwe ba ne ba e dirile. ₁₃Le ene Maaka mmaagwe a mo tlosa mo bohumagading, ka gonne a diretse Modimako setshwantsho se se maswe thata; Asa a rema setshwantsho sa gagwe a se fisa fa molatswaneng wa Kiterone. ₁₄Mafelo a a tlotlometseng ga a ka a tlosiwa; mme le fa go ntse jalo pelo ya ga Asa e ne e itekanelanye le Jehofa ka metlha yotlhe ya gagwe. ₁₅Dilo tse rraagwe o ne a di tshwaile, le dilo tse o di tshwaileng ka esi, selefera, le gouta, le dilwana, a di isa mo ntlong ya ga Jehofa.

₁₆Go ne go le ntwa gare ga Asa le Baaše kgosi ya Iseraele ka metlha yotlhe ya bone. ₁₇Baaše kgosi ya Iseraele a bololela Juta, a aga Rama, gore a tle a se ka a leseletsa ope go tswa le fa e le go tsena kwa go Asa kgosi ya Juta. ₁₈Foo Asa a tsaya selefera sotlhe le gouta tse di setseng mo dikhumong tsa ntlo ya ga Jehofa, le dikhumo tsa ntlo ya kgosi, a di tsenya mo diatleng tsa batlhanka ba gagwe; kgosi Asa a di isa kwa go Benehatate morwa Taberimone morwa Hesione, kgosi ya Siria, yo o ne a agile mo Damaseko, a re: ₁₉“Go na le kgolagano gare ga me nao, gare ga rre le rraago; bona, neo ya selefera le gouta ke eo; ya o senye kgolagano ya gago le Baaša kgosi ya Iseraele gore a tle a tloge fa go nna.”

₂₀Benehatate a reetsa kgosi Asa, a roma balaodi ba dintwa tsa gagwe ba ya go tlhasela metse ya Iseraele, ba kgemetha Ijone, le Dane, le Abele wa Bethemaaka, le lefatshe lotlhe la Kinerothe, le lefatshe lotlhe la Nafetali. ₂₁Ga dirala ya re Baaša a utlwa, a khutlela Rama go tlhola a o aga, mme a aga mo Tiresa.

₂₂Foo kgosi Asa a opela Bajuta botlhe mokgosi; a se ka a nteela ope kwa ntle; ba tlosa maje a Rama le dikgong tsa gone tse Baaša o ne a aga ka tsone, mme kgosi Asa a aga ka tsone Geba wa Benjamine le Misepa.

₂₃Ditiro tse dingwe tsa ga Asa, le bonatla jwa gagwe jotlhe, le tsotlhe tse o ne a di dira, le metse e o ne a e aga, a ga di a kwalwa mo lokwalong lwa ditiralelo tsa dikgosi tsa Juta? Mme e rile mo lobakeng lwa botsofe jwa gagwe a nna le bolwetse jwa dinao. ₂₄Asa a robala le borraagwe, mme a fitlhwa le borraagwe mo motseng wa ga Dafite rraagwe. Jehošafate morwawe a busa boemong jwa gagwe.

₂₅Natabe morwa Jeroboame a simolola go busa Baiseraele ka ngwaga wa bobedi wa ga Asa kgosi ya Juta, a busa Baiseraele ka dinyaga di le pedi. ₂₆A dira se se bosula mo matlhong a ga Jehofa, a sepela mo tseleng ya ga rraagwe, le mo boleong jwa gagwe jo o ne a leofisa Baiseraele ka jone.

₂₇Baaša morwa Ahija wa ntlo ya ga Isakare, a mo rera; mme Baaša a mo kgemetha kwa Gibethone o e neng e le wa Bafilisitia; gonne Natabe le Baiseraele botlhe ba bo ba tlhasetse Gibethone. ₂₈Fela mo ngwageng wa boraro wa ga Asa kgosi ya Juta, Baaša a bolaya Natabe, mme a busa mo boemong jwa gagwe. ₂₉Ga tloga ga dirala ya re a sena go nna kgosi, a bolaya botlhe ba ntlo ya ga Jeroboame; ga a ka a tlogelela Jeroboame le fa e le a le mongwe fela yo o tswang mowa, ga tsamaya a mo senya; ka fa polelong ya ga Jehofa, e o kileng a e bua ka Ahija wa Mošilone, motlhanka wa gagwe. ₃₀Ka ntlha ya maleo a ga Jeroboame a o ne a a leofa, le a o ne a leofisa Baiseraele ka one; ka ntlha ya tlhotlheletso ya gagwe e o ne a tlhotlheletsa Jehofa, Modimo wa Iseraele mo bogaleng ka yone.

₃₁Jaana ditiro tse dingwe tsa ga Natabe le tsotlhe tse o ne a di dira, a ga di a kwalwa mo lokwalong lwa ditirafalo tsa dikgosi tsa Iseraele? ₃₂Go ne go le ntwa gare ga Asa le Baaša kgosi ya Iseraele ke metlha yotlhe ya bone.

₃₃E rile ka ngwaga wa boraro wa ga Asa kgosi ya Juta, Baaša morwa Ahija a simolola go busa Baiseraele botlhe mo Tiresa, mme a busa ka dinyaga di le 24. ₃₄A dira se se bosula mo matlhong a ga Jehofa, a sepela mo tseleng ya ga Jeroboame, le mo boleong jwa gagwe jo o ne a leofisa Iseraele ka jone.