1 DIKGOSI 11

₁Jaana kgosi Solomone a rata basadi ba le bantsi ba ditšhaba tsa seeng, kwa ntle ga morwadia Faro, e le basadi ba Bamoabe, ba Baamone, ba Baetome, ba Basitone le ba Bahite. ₂E le ba merafe e Jehofa o ne a bua ka ga yone le bana ba Iseraele, a re: “Lo se ka lwa ya mo go bone, le bone ba sa ka ba tla mo go lona; gonne ruri ba tlaa faposetsa dipelo tsa lona kwa medimong ya bone.” Solomone a ngaparela bone bao mo loratong. ₃O ne a na le basadi ba le 700, bomorwadia dikgosi, le bagadingwana ba le 300; mme basadi ba gagwe ba faposa pelo ya gagwe. ₄Gonne ga dirala e rile Solomone a sena go tsofala basadi ba gagwe ba faposetsa pelo ya gagwe kwa medimong e sele; pelo ya gagwe ya se ka ya nna boitekanelo mo go Jehofa Modimo wa gagwe, jaaka pelo ya ga Dafite rraagwe e ne e ntse. ₅Gonne Solomone a latela Ašetorethe modimo wa sesadi wa Basitone, le Milekome makgapha a Baamone. ₆Solomone a dira se se bosula mo ponong ya ga Jehofa, a se ka a sala Jehofa morago ka botlalo jaaka Dafite rraagwe a ne a dira. ₇Foo Solomone a agela Kemose, makgapha a Bamoabe, felo fa go tlotlometseng mo thabaneng e e lebaganyeng le Jerusalema, le Moleke, makgapha a bana ba Amone, a mo agela jalo. ₈Basadi ba gagwe ba seeng a ba direla jalo botlhe, ba ba fisetsang medimo ya bone maswalo, ba e isetsa ditlhabelo.

₉Jehofa a nna bogale le Solomone, ka pelo ya gagwe e fapogile Jehofa, Modimo wa Iseraele, yo o ne a mmonaletse gabedi, ₁₀a mo laotse ka ga sone selo se, gore a se ka a latela medimo e sele; mme ga a ka a tshegetsa se Jehofa o se laotseng. ₁₁Ka ntlha ya gone moo Jehofa a raya Solomone a re: “E re ka selo se se dirwa ke wena, mme wa se ka wa tshegetsa kgolagano ya me, le melao ya me, e ke e go laoletseng, ruri ke tlaa rutla bogosi mo go wena, ke bo naya motlhanka wa gago. ₁₂Le fa go ntse jalo mo metlheng ya gago ga nketla ke se dira, ka ntlha ya ga Dafite rraago; ke tlaa bo rutla mo seatleng sa ga morwao. ₁₃Le fa go ntse jalo ga nketla ke rutla bogosi jotlhe; ke tlaa naya morwao lotso lo le longwe fela, ka ntlha ya ga Dafite motlhanka wa me, le ka ntlha ya Jerusalema felo fa ke go itshenketseng.”

₁₄Jehofa a tsosetsa Solomone mmaba, e bong Hatate wa Moetome; o ne a le wa losika lwa kgosi kwa Etome. ₁₅Gonne ga dirala e rile Dafite a le kwa Etome, Joabe molaodi wa ntwa a ile go fitlha ba ba bolailweng, a bolaile lonna lotlhe mo Etome; ₁₆(gonne Joabe le Baiseraele botlhe ba nna gone ka dikgwedi di le thataro ga tsamaya a phimola lonna lotlhe mo Etome); ₁₇Hatate a tshaba, ene le Baetome bangwe batlhanka ba ga rraagwe ba na nae, ba re ba ya Egepeto; Hatate a bo a sa ntse a le ngwanyana. ₁₈Ba nanoga mo Midiane ba fitlha mo Parana; ba tsaana le banna bangwe mo Parana ba ya nabo, ba fitlha Egepeto, kwa go Faro kgosi ya Egepeto; ene a mo naya ntlo, a mo laolela dijo, a mo abela lefatshe. ₁₉Hatate a bona botsalano jo bogolo mo matlhong a ga Faro, a ba a tla a mo tseisa monnawe mosadi wa gagwe, e bong monnawe Tahepenese mohumgadi wa kgosi. ₂₀Monnaa Tahepenese a bona bana le Hatate, e bong Genubathe morwawe, yo Tahepenese o mo kgwiseditseng mo ntlong ya ga Faro; mme Genubathe a nna mo ntlong ya ga Faro mo go bomorwa Faro.

₂₁E rile Hatate a utlwa a le kwa Egepeto fa Dafite a robetse le borraagwe, le Joabe molaodi wa ntwa a sule, Hatate a raya Faro a re: “Mma ke tsamaye ke ye lefatsheng la gaetsho.”

₂₂Foo Faro a mo raya a re: “O tlhokileng mo go nna fa e bo ne ne fano o senka go ya lefatsheng la gaeno?” A mo fetola a re: “Ga se sepe; le fa go ntse jalo, a ko o mme ke tsamaye fela.”

₂₃Modimo wa tsosetsa Solomone mmaba yo mongwe, e bong Resone morwa Eliate, yo o ne a tshabile morena wa gagwe Hatatesere kgosi ya Soba. ₂₄A iphuthela banna, a nna molaodi wa setlhopha, jale ka Dafite a bolaya bone ba Soba; ba ya Damaseko ba aga gone, mme ba busa mo Damaseko. ₂₅A nna mmaba wa Iseraele ka metlha yotlhe ya ga Solomone kwa ntle ga bosenyi jo Hatate o bo dirang; a ila Baiseraele mo go feteletseng, mme a busa Siria.

₂₆Jeroboame morwa Nebate, Moeferaime wa Sereta, motlhanka mongwe wa ga Solomone, yo leina la ga mmaagwe e ne e le Serua motlholagadi, le ene a tlhabana le kgosi. ₂₇Se ke sone se o ne a tlhabana le kgosi ka ga sone: Solomone a aga Milo, a thiba diphatlha tsa motse wa ga Dafite rraagwe. ₂₈Monna yoo Jeroboame ya bo e le seganka se se pelokgale; Solomone a bona lekau leo fa e le le le sa lapeng mo tirong, a mo naya tebelo ya tiro yotlhe ya ba ntlo ya ga Josefe. ₂₉Ga dirala ya re fa Jeroboame a tswa mo Jerusalema ka baka loo, Ahija moperofeti wa Mošilo a mo fitlhela mo tseleng; Ahija a bo a apere seaparo se seša; mme ba bo ba le bosi mo nageng bone boo babedi. ₃₀Ahija a tshwara seaparo se seša se se mo go ene, a se gagola a se tebeleganya gasome le bobedi. ₃₁A raya Jeroboame a re: “Tsaya dibata di le some, gonne Jehofa, Modimo wa Iseraele o bua jaana a re: ‘Bona, ke tlaa rutla bogosi mo seatleng sa ga Solomone, ke go neye ditso di le some. ₃₂Ene o tlaa bona lotso lo le longwe fela ka ntlha ya ga Dafite motlhanka wa me, le ka ntlha ya Jerusalema, motse o ke o itshenketseng mo ditsong tsotlhe tsa Iseraele. ₃₃Ka ntlha ya gobo ba ntatlhile, ba obametse Ašetorethe modimo wa sesadi wa Basitone, le Kemoše modimo wa Moabe, le Milekome modimo wa bana ba Amone; ga ba a sepela mo ditseleng tsa me go dira se se siameng mo matlhong a me, le fa e le go tshegetsa melao ya me le dikatlholo tsa me, jaaka Dafite rraagwe a ne a dira. ₃₄Le fa go ntse jalo ga nketla ke tsaya bogosi jotlhe mo seatleng sa gagwe; ke tlaa mo dira kgosana ka metlha yotlhe ya botshelo jwa gagwe, ka ntlha ya ga Dafite motlhanka wa me, yo ke ne ka mo itshenkela, ka a ne a tshegeditse ditaolo tsa me, le melao ya me; ₃₅ke tlaa tlosa bogosi mo seatleng sa ga morwawe, mme ke tlaa bo go naya, e bong ditso di le some. ₃₆Ke tlaa naya morwawe lotso lo le longwe fela, gore Dafite motlhanka wa me a tle a dire le lobone ka metlha yotlhe fa pele ga me mo Jerusalema, motse o ke o itshenketseng go tla ke baya leina la me gone. ₃₇Ke tlaa go tsaya, mme o tlaa busa ka fa go tsotlhe tse mowa wa gago o di eletsang, o tlaa nna kgosi ya Iseraele. ₃₈Go tlaa dirala go re e tlaa re fa o reetsa tsotlhe tse ke di go laolelang, o ba o sepela mo ditseleng tsa me, o dira sone se se siameng mo matlhong a me, go tshegetsa melao ya me, le ditaolo tsa me, jaaka Dafite motlhanka wa me a ne a dira; foo ke tlaa nna nao, ke tlaa go agela motse o o tlhomameng, jaaka ke o agetse Dafite, mme ke tlaa go naya Baiseraele. ₃₉Ka ntlha ya gone moo ke tlaa patika losika lwa ga Dafite, mme e seng ka bosakhutleng.’ ”

₄₀Ke gone Solome a leka go bolaya Jeroboame; mme Jeroboame a tloga a tshabela kwa Egepeto, kwa go Shišake kgosi ya Egepeto, mme a nna mo Egepeto Solomone a ba a tla a swa.

₄₁Jaana ditiro tse dingwe tsa ga Solomone, le tsotlhe tse o ne a di dira, le botlhale jwa gagwe, a ga di a kwalwa mo lokwalong lwa ditiro tsa ga Solomone? ₄₂Lobaka lo Solomone o busitseng Baiseraele botlhe ka lone mo Jerusalema e ne e le dinyaga di le 40. ₄₃Solomone a robala le borraagwe, mme a fitlhwa mo motseng wa ga Dafite rraagwe; mme Rehoboame morwawe a busa mo boemong jwa gagwe.