Mathata a a amanang le nyalo
1Jaana ka ga dilo tse lo kwadileng ka ga tsone; go molemo mo monneng gore a se ka a ama mosadi. 2Le fa go ntse jalo, ka ntlha ya maakafalo, a monna mongwe le mongwe a nne le mosadi wa gagwe, le mosadi mongwe le mongwe a nne le monna wa gagwe. 3A monna a neele mosadi tshwanelo ya gagwe; mosadi le ene a direle monna jalo. 4Mosadi ga a na taolo mo mmeleng wa gagwe, fa e se monna fela; go ntse jalo, monna ga a na taolo mo mmeleng wa gagwe, fa e se mosadi fela. 5Lo se ka lwa ikgogonelana, fa e se ka go dumalana ka sebaka, gore lo tle lo ineele mo thapelong, lo itse go ba lo kopana gape, gore Satane a se bone kgoro ya go lo raela ka go retelelwa ga lona ke go itshoka.
6Golo mo, ke go ipoledisa fela, ke sa re ke buisiwa ke taolo. 7Le fa go ntse jalo ke rata batho botlhe ba ka bo ba ntse fela jaaka nna. Motho mongwe le mongwe o na le neo ya gagwe e e tswang Modimong, mongwe ka mokgwa o, yo mongwe ka o sele.
8Ke raya ba ba iseng ba nyale, le basadi ba batlholagadi, ka re, go ka nna molemo mo go bone fa ba nna fela jaaka nna. 9Mme fa ba retelel wa ke go itshoka, a ba nyale; gonne go molemo go nyala bogolo go go babalelwa.
10Ba ba nyalanyeng ke a ba laya, mme e be e se nna, e le Morena, gore a mosadi a se tlogele monna wa gagwe. 11Mme fa a mo tlogela, a a nne fela a sa nyalwe; fa go sa nna jalo, a a letlane le monna wa gagwe; gape monna a se tlogele mosadi wa gagwe.
12Ba bangwe ba rewa ke nna, e seng Morena, go re, fa monna yo e leng modumedi a na le mosadi yo o sa dumeleng, fa mosadi a itumela go aga nae, monna a se mo tlogele. 13Le mosadi yo o nang le monna yo o sa dumeleng, fa monna a itumela go aga nae, a mosadi a se tlogele monna wa gagwe. 14Gonne monna yo o sa dumeleng o itshepisiwa ka mosadi, le mosadi yo o sa dumeleng o itshepisiwa ka monna yo o leng modumedi; fa go ne go sa nna jalo bana ba lona ba ka bo ba sa itsheka; mme jaanong ba itshepile. 15Le fa go ntse jalo fa yo o sa dumeleng a tsamaya, a a tsamaye; go le monna wa modumedi, go le mosadi wa modumedi, ga ba mo kgolegong ka mo go ntseng jalo; mme Modimo o re biditse gore re nne mo kagisong. 16Gonne wena mosadi, o itse jang fa e tlaa re gongwe o se ketla o boloka monna wa gago? Le wena monna, o itse jang fa e tlaa re gongwe o se ketla o boloka mosadi wa gago?
Botshelo jo Morena o bo laotseng
17Fela jaaka Morena a abetse motho mongwe le mongwe, jaaka Modimo o biditse mongwe le mongwe, a a sepele fela jalo. Ke laya diphuthego tsotlhe jalo. 18Fa motho a biditswe a rupile, a a se eletse bokgola. Fa mongwe a biditswe a sa rupa, a a se rupe. 19Go rupa ga se sepe, le go tlhoka go rupa ga se sepe, fa e se go tshegetsa ditaolo tsa Modimo go le gosi fela. 20A mongwe le mongwe a nne mo boemong jo o biditsweng a le mo go jone. 21Fa o biditswe o le motlhanka, o se ka wa re sepe ka gone. Mme fa o ka gololwa, o go sole molemo bogolo. 22Gonne yo o biditsweng mo Moreneng a le motlhanka, ke mogololesegi wa Morena; go ntse fela jalo, yo o biditsweng a se mo botlhankeng, ke motlhanka wa ga Keresete. 23Lo rekilwe ka tlhwatlhwa; lo se ka lwa tswa batlhanka ba batho. 24Bagaetsho, boemo jo motho mongwe le mongwe o biditsweng a le mo go jone, a nne mo go jone a na le Modimo.
Batlholagadi le ba ba sa nyalwang
25Jaana ka ga makgarebane ga ke na taolo ya Morena, mme ke atlhola jaaka mongwe yo o bonyeng boutlwelobotlhoko mo Moreneng, gore ke nne boikanngo.
26Ka re, ke gopola gore go molemo ka ntlha ya pitlagano ya gompieno; ka re, go molemo mo mothong go nna jaaka a ntse. 27A o golagantswe le mosadi? O se ka wa batla go gololwa. A o golotswe mo mosading? Se batle mosadi. 28Le fa o ka nyala, o tlaa bo o sa leofa; le fa kgarebana e ka nyalwa, e tlaa bo e sa leofa. Le fa go ntse jalo, ba ba ntseng jalo, ba tlaa bona pitlagano mo nameng; mme ke ne ke rata go lo rekegela.
29Ke bua lefoko le, bagaetsho, ke re, lobaka lo khutshwafetse, gore e tle e re mo lobakeng lo lo tlang, go le ba ba nang le basadi ba nne jaaka fa ba ka bo ba se na nabo; 30go le ba ba lelang, ba nne jaaka ba ka bo ba sa lele; go le ba ba itumelang, ba nne jaaka ba ka bo ba sa itumele; go le ba ba rekang; ba nne jaaka ba ka bo ba se na sepe; 31go le ba ba ipapalelang ka lefatshe, a ba se fetise selekanyo, gonne mokgwa wa lefatshe leno o a feta.
32Ke rata lwa bo lo se na ditlhodiego. Yo o sa nyalang o tlhokometse dilo tsa Morena, ka fa o ka kgatlhang Morena ka teng. 33Mme yo o nyetseng o tlhokometse dilo tsa lefatshe, ka fa o ka kgatlhang mosadi wa gagwe ka teng. 34Go bile go na le tshwanologo mo mosading yo o nyetsweng le kgarebane. Yo o sa nyalwang o tlhokometse dilo tsa Morena, gore a nne boitshepo mo mmeleng le mo moweng; mme yo o nyetsweng o tlhokometse dilo tsa lefatshe, ka fa o ka kgatlhang monna wa gagwe ka teng.
35Ke bua jalo go lo thusa; e seng gore ke lo thaise ka kgole, mme e le gore ke lo gopodise se se tshwanetseng, le gore lo direle Morena ka mo go sa akgaakgegeng.
36Fa motho mongwe a gopola gore o direla kgarebane ya gagwe ka fa go sa tshwanelang, fa a tlodilwe ke lobaka lwa gagwe lwa go nyalwa; mme fa go tshwanetse jalo, a a dire ka fa a ratang ka teng; ga a loefe; a ba nyalane. 37Yo o tlhomameng mo pelong ya gagwe, a sa pitlaganngwe ke sepe, mme a na le boitaolo ka ga go rata ga gagwe, fa a tlhomamisitse mo pelong ya gagwe gore o tlaa ikganelela ngwana wa gagwe wa kgarebane, o tlaa bo a dira sentle. 38Jalo go le yo o neelang ngwana wa gagwe wa kgarebane nyalo, o dira sentle; mme yo o sa mo neeleng nyalo, o tlaa bo a dira sentle bogolo.
39Mosadi yo o nyetsweng o golegilwe ka lobaka lo monna wa gagwe o sa tshedileng ka lone; mme fa monna a sule o golotswe, o ka nyalwa ke yo o mo ratang; mme e be e le mo Moreneng fela. 40Ka fa tshekatshekong ya me, o tlaa bona boitumelo bogolo fa a nna jaaka a ntse; mme ke a gopola gore Mowa wa Modimo le one o na le nna.
