1 BAKORINTHE 14

₁Latelang lorato; le fa go ntse jalo lo eletse thata dineo tsa semowa, bogolo gore lo ranole. ₂Gonne yo o tšhomang, ga a bue le batho, fa e se le Modimo; gonne ga go motho ope yo o mo utlwang; mme ka mowa o bua masaitsiweng. ₃Yo o ranolang o bua le batho kagelelo, le kgomotso, le nametso. ₄Yo o tšhomang o a ikagelela; mme yo o ranolang o agelela phuthego.

₅Jaana ke rata lwa bo lo bua dipuo di sele lotlhe, mme bogolo gore lo ranole. Yo o ranolang o mogolo go feta yo o tšhomang fa a sa phutholole, gore phuthego e bone kagelelo. ₆Jaana, bagaetsho, fa ke ka tla mo go lona ke tšhoma, ke tlaa lo naya thuso yang, fa ke sa bue le lona ka mokgwa wa tshenolo, kgotsa wa kitso, kgotsa wa go ranola, kgotsa wa thuto?

₇Le tse e leng dilo tse di sa utlweng, tse di nang le mantswe, gongwe e le lotlhaka, kgotsa harepa, fa di sa farologane melodi, go tlaa itsiwe jang se se kaiwang ke go poroma ga lotlhaka kgotsa harepa? ₈Gonne fa lonaka lo ntsha poromo e e sa tlhomamang, mang yo o tlaa ipaakanyetsang go ya ntweng? ₉Go ntse jalo le lona, fa lo sa bue ka loleme puo e e bofefo go utlwiwa, go tlaa itsiwe jang se se buiwang? Gonne lo tlaa bo lo buela mo sebakeng fela. ₁₀Le gale, go mantswentswe a a kanakana mo lefatsheng, mme go bo go se lepe le le se nang se le se kayang. ₁₁Ke gone ka re, fa ke sa itse se lentswe le se kayang, ke tlaa bo ke le motho seeng mo go yo o buang, le yo o buang o tlaa bo a le motho seeng mo go nna. ₁₂Go ntse jalo le lona, e re ka lo tlhoafaletse dineo tsa semowa, lo leke gore lo totele kagelelo ya phuthego.

₁₃Ke gone, a yo o tšhomang a rapele gore a ke a phutholole. ₁₄Gonne fa ke rapela ka tšhomi, mowa wa me o a rapela, mme tlhaloganyo ya me ga e na sepe. ₁₅Go ka tweng? Ke tlaa rapela ka mowa, ke ba ke rapela le ka tlhaloganyo, ke tlaa opela ka mowa, ke ba ke opela le ka tlhaloganyo. ₁₆Fa o leboga ka mowa, yo o emeng mo bonnong jwa yo o sa rutegang, o tlaa bua jang a re: “Amen,” mo go lebogeng ga gago, ka a sa itse se o se buang? ₁₇Le gale wena o leboga sentle, mme yo mongwe ga a agelelwe.

₁₈Ke leboga Modimo, ke bua dipuo di sele bogolo go lona lotlhe. ₁₉Le fa go ntse jalo, mo phuthegong, ke rata ka bua mantswe a le matlhano ka tlhaloganyo ya me, gore ke tle ke rute le ba bangwe, bogolo go go bua mantswe a le 10 000 ka dipuo di sele.

₂₀Bagaetsho, se nneng banyana mo tlhaloganyong; le fa go ntse jalo, mo kilong lo nne banyana, mme mo tlhaloganyong lo nne banna. ₂₁Go kwadilwe mo molaong ga twe: “Ke tlaa bua le batho ba ka banna ba dipuo di sele, le ka melomo ya baeng; mme ga ba ketla ba nkutlwa le ka mokgwa o o ntseng jalo,” go bua Morena. ₂₂Ke gone ka re, dipuo di sele ke sesupo, e seng mo go ba ba dumelang, e leng mo go ba ba sa dumeleng; mme go ranola ke sesupo, e seng mo go ba ba sa dumeleng, e leng mo go ba ba dumelang.

₂₃Ke gone, fa phuthego yotlhe e phuthegile, mme botlhe ba bua ka dipuo di sele, mme go tsena batho ba ba sa rutegang, le ba ba sa dumelang, a ga ba ketla ba re lo a tsenwa? ₂₄Mme fa botlhe ba ranola, mme go tsena mongwe yo o sa dumeleng, kgotsa yo o sa rutegang, o tlhajwa ke botlhe, o sekisiwa ke botlhe; ₂₅maoma a pelo ya gagwe a a senolwa; jalo o tlaa wela fa fatshe ka sefatlhogo, a obamela Modimo, a bolela fa Modimo o le mo go lona ruri.

₂₆Go ka tweng bagaetsho? E re fa lo phuthega, mongwe le mongwe o a ba a na le sefela, le thuto, le tshenolo, le puo, a na le phuthololo. A dilo tsotlhe di direlwe kagelelo. ₂₇E re fa go na le go buiwa ka tšhomi, a go bue ba le babedi kgotsa ba le bararo, e seng go fetisa mo; a ba bue ka go fapaana, mme a mongwe a phutholole. ₂₈Fa go se na mophutholodi, a ba didimale fela mo phuthegong; a go ipolelele ene ka esi, le Modimo a bue le one. ₂₉A baranodi ba bue ba le babedi kgotsa bararo, a ba bangwe ba farologanye. ₃₀Fa tshenolo e dirafalela yo mongwe yo o dutseng teng, a yole wa pele a didimale. ₃₁Gonne lotlhe lo ka ranola ka monokela, gore botlhe ba ithute, le gore botlhe ba gomodiwe; ₃₂mewa ya baranodi e laolwe ka baranodi. ₃₃Gonne Modimo ga se Modimo wa tlhakatlhakano, fa e se wa kagiso fela, jaaka go ntse mo diphuthegong tsotlhe tsa baitshepi. ₃₄A basadi ba didimale mo diphuthegong; gonne ga ba a leselediwa go bua; mme a ba nne mo boingotlong, jaaka go bua le one molao. ₃₅Fa ba rata go itse sengwe, a ba botse banna ba bone kwa gae; gonne ke ditlhong fa mosadi a ka bua mo phuthegong.

₃₆Ao! A lefoko la Modimo le simogile la tswa mo go lona? Kgotsa a le tletse lona lo le losi? ₃₇Fa motho mongwe a ithaya a re ke moranodi, kgotsa ke wa semowa, a ke a ele tlhoko dilo tse ke di lo kwalelang, gore ke taolo ya Morena. ₃₈Fa motho mongwe a se na kitso, a a nne a se na kitso fela.

₃₉Ke gone bagaetsho, lo tlhoafalele thata go ranola, mme lo se ka lwa itsa go bua ka dipuo di sele. ₄₀A dilo tsotlhe di dirwe sentle fela, le ka thulaganyo.