1 BAKORINTHE 1

₁Ke nna Paulo, yo ke biditsweng go nna moaposetole wa ga Jesu Keresete ka go rata ga Modimo, ke na le Sosethenese mokaulengwe wa rona.

₂Re kwalela phuthego ya Modimo e e kwa Korinthe, e bong bone ba ba itshepisitsweng mo go Keresete Jesu, ba biditswe go nna baitshepi, ba na le botlhe mo mafelong a otlhe ba ba bitsang leina la Morena wa rona Jesu Keresete, Morena wa bone le wa rona. ₃Ka re, a tshegofatso e nne le lona, le kagiso e e tswang mo Modimong Rraetsho, le mo go Morena Jesu Keresete.

₄Ke leboga Modimo wa me ka metlha yotlhe ka ga lona, ka ntlha ya tshegofatso ya Modimo e lo e neilweng mo go Keresete Jesu; ₅ka lo humisitswe mo go ene mo dilong tsotlhe, mo puong yotlhe, le mo kitsong yotlhe; ₆fela jaaka tshupo ya ga Keresete e tlhomamisitswe mo go lona. ₇Lwa ba lwa tla lwa se ka lwa tlhaela mo neong epe; lo ntse lo lebeletse tshenolo ya Morena wa rona Jesu Keresete; ₈yo o bileng a tlaa lo tlhomamiseletsa le kwa bokhutlong, gore lo nne lo se na ka fa lo ka nyadiwang ka teng mo letsatsing la Morena wa rona Jesu Keresete. ₉Modimo o boikanngo, o lo bileditsweng bolekaneng le Morwa one Jesu Keresete Morena wa rona ka one.

₁₀Jaana bagaetsho, ke a lo rapela, ka leina la Morena wa rona Jesu Keresete, gore lo nne puo nngwe fela lotlhe, le gore go se nne dikgaogano mo go lona; mme lo ko lo itekanele mmogo, le mo mogopolong o le mongwe fela, le mo tshekatshekong e le nngwe fela. ₁₁Gonne bagaetsho, ke boleletswe ka ga lona, ke ba e leng ba ntlo ya ga Keloe, fa go na le dikgang mo go lona. ₁₂Ke bua jaana ka re, mongwe le mongwe wa lona o tlaa re: “Nna ke oo rra Paulo, le nna ke oo rra Apolose, le nna ke oo rra Kefase, mme nna ke oo rra Keresete.” ₁₃A Keresete o kgaoganye? A Paulo o lo bapoletswe? Kgotsa a lo kolobeditswe mo ineng la ga Paulo?

₁₄Ke leboga Modimo ka gobo ke se ka ka kolobetsa ope wa lona, fa e se Kerisepo le Gaio; ₁₅gore go se nne motho ope yo o tlaa reng, lo kolobeditswe mo ineng la me. ₁₆Ka ba ka kolobetsa le ba ntlo ya ga Setefanase. Kwa ntle ga bao, ga ke itse fa ke kolobeditse ope o sele. ₁₇Gonne Keresete ga a a ka a nthoma gore ke ye go kolobetsa, fa e se gore ke ye go rera Mafoko a a Molemo; mme e be e se ka botlhale jwa puo, e se re kgotsa mokgoro wa ga Keresete wa dirwa lefela fela.

₁₈Gonne lefoko la mokgoro ke dinyana mo go ba ba senyegang; mme mo go rona ba re bolokwang, ke nonofo ya Modimo. ₁₉Gonne go kwadilwe ga twe: “Ke tlaa senya botlhale jwa matlhale, le matsetseleko a ba ba ikelelelang ke tlaa a gana.” ₂₀Motlhalefi o kae? Mokwadi o kae? Moganedi wa lefatshe leno o kae? A Modimo ga o a ntsha botlhale jwa lefatshe dinyana fela?

₂₁Gonne e rile ka lefatshe, ka botlhale jwa lone, le se ka la lemoga Modimo mo botlhaleng jwa Modimo, ga kgatlha Modimo go boloka ba ba dumelang ka dinyana tsa thero. ₂₂Ka Bajuta ba lopa ditshupo, le Bagerika ba batla botlhale; ₂₃mme rona re rera Keresete a bapotswe, e le sekgopiso mo Bajuteng, mme mo go Baditšhaba e le dinyana fela; ₂₄mo go ba ba biditsweng, Bajuta le Bagerika, re rera Keresete, e le nonofo ya Modimo, le botlhale jwa Modimo. ₂₅Ka gobo dilo tsa Modimo tse di kaiwang dinyana, di botlhale bogolo go batho; le tsa Modimo tse di kaiwang bokoa, di nonofile bogolo go batho.

₂₆Gonne bagaetsho, a lo ko lo lebeng go bidiwa ga lona, jaaka go se bantsi ba ba botlhale ka fa nameng, go se bantsi ba ba nonofileng, go se bantsi ba ba tlotlegang, ba ba biditsweng; ₂₇Modimo o itshenketse dilo tse di kaiwang dinyana ke lefatshe, gore o tlhabise ba ba botlhale ditlhong; e bile gape Modimo o itshenketse dilo tse di kaiwang bokoa ke lefatshe, gore o tlhabise dilo tse di nonofileng ditlhong. ₂₈Le tse di kaiwang matlakala a lefatshe, le dilo tse di nyatsegang, Modimo o di itshenketse, ee, le dilo tse di seyong, gore o nyeletse dilo tse di teng; ₂₉gore go se ka ga ikgantsha nama epe fa pele ga Modimo. ₃₀Mme lona lo ba one mo go Keresete Jesu, yo o re diretsweng botlhale jo bo tswang Modimong, le tshiamo, le boitshepiso, le thekololo; ₃₁e le gore go nne jaaka go kwadilwe ga twe: “Yo o ikgantshang, a a ikgantshe ka Jehofa.”