Badisa ba dikgoro tsa Tempele
1Ba ba laoletsweng makoko a diphapaano tsa balebedi ba mejako: Ba Bakora; Mešelemia morwa Kore, wa bomorwa Asafe. 2Mešelemia o ne a na le bana ba basimane: Sekaria motsalwapele, wa bobedi Jediaele, wa boraro Sebadia, wa bone Jetheniele, 3wa botlhano Elame, wa borataro Johanane, wa bosupa Elioenai.
4Obete-etome o ne a na le bana ba basimane: Shemaia motsalwapele, wa bobedi Josabate, wa boraro Joa, wa bone Sakare, wa botlhano Nethanele, 5Wa borataro Amiele, wa bosupa Isakare, wa bo 8, Peulethai; gonne Modimo o ne a mo segofatsa.
6Le ene Shemaia morwawe a bona bana ba basimane ba ba busang ntlo ya rraabo: gonne e le diganka tse di pelokgale. 7Bomorwa Shemaia: Otheni, Refaele, Obete, Elesabate yo bomonnawe e ne e le batho ba ba pelokgale.
8Ba botlhe e ne e le bomorwa Obete-etome, bone le bomorwaa bone, le bana ba ga rraabo, banna ba ba nonofileng mo thateng ya go direla, ba ga Obete-etome ba le 62.
9Mešelemia o ne a na le bana ba basimane le bomonnawe, e le batho ba ba pelokgale ba le 18.
10Le ene Hosa wa bana ba ga Merari, o na a na le bana ba basimane; yo mogolo Shimeri (gonne le fa e ne e se ene motsalwapele, rraagwe a mmaya yo mogolo;) 11wa bobedi Hilekia, wa boraro Tebalia, wa bone Sekaria; bomorwa Hosa le bomonnawe ba le mmogo ba ne ba le 13.
12Makoko a diphapaano tsa balebedi ba mejako e ne e le bone bao, e bong banna ba batona, ba na le ditebelo jaaka bomonnaa bone tsa go direla mo ntlong ya ga Jehofa. 13Mme ba thela bola, bannye le bagolo, ka fa matlong a borraabo, ba thelela kgoro nngwe le nngwe. 14Ntlha ya botlhabatsatsi bola jwa e laolela Shelemia. Foo ka ga Sekaria morwawe, a le mogakolodi yo o botsetseleko, ba mo thelela bola; mme bola jwa gagwe jwa mo laolela ntlha ya botsheka. 15Jwa laolela Obete-etome ntlha ya borwa; jwa neela bomorwawe ntlo ya polokelo. 16Jwa laolela Shupime le Hosa ntlha ya bophirimatsatsi fa kgorong ya Shalekethe, fa morathong o o tlhatlogang, tebelo e ne e lebaganye le tebelo. 17Ntlheng ya botlhabatsatsi go no go le Balefi ba le barataro, ntlheng ya botsheka ba le bane ka tsatsi lengwe le lengwe, ntlheng ya borwa ba le bane ka tsatsi lengwe le lengwe, le ntlo ya polokelo ba le babedi, le babedi. 18Jwa laolela Parebare ntlha ya bophirimatsatsi, ba le bane ka fa morathong, le ba le babedi ka fa Parebare. 19A ke one makoko a diphapaano tsa balebedi ba mejako; ba bomorwa Bakora, le ba bomorwa Merari.
Ditiro tse dingwe tsa Tempele
20Mo go ba Balefi, Ahija a laola mabolokelo a dikhumo tsa ntlo ya Modimo, le mabolokelo a dikhumo tse di tshwaetsweng Modimo. 21Bomorwa Latane; bomorwa Bagerešone ba e ne e le boora Latane, ditlhogo tsa mantlo a borraabo mo go boora Latane wa Mogerešone; Jehiele. 22Bomorwa Jehiele: Sethame, le Joele monnawe ba laola mabolokelo a ntlo ya ga Jehofa.
23Mo go Baamerame ba Baisehare ba Baheberone, Bausiela:
24Shebuele morwa Gerešome morwa Moše, e ne e le molaodi wa mabolokelo. 25Le bomonnawe; mo go Eliesere ga tswa Rehabia morwawe, Ješaia morwawe, Jorame morwawe, Sikeri morwawe, Shelomothe morwawe. 26Shelomothe yoo le bomonnawe ba ne ba laola mabolokelo otlhe a dilo tse di tshwaetsweng Modimo, tse kgosi Dafite le ditlhogo tsa makgotla a borraabo, balaodi ba makgolo a masome le ba makgolo, le balaodi ba ntwa, ba di tshwaetseng Modimo. 27Mo dilong tse di gapilweng mo ntweng ba tshwaya tse di tlaa baakanyang ntlo ya ga Jehofa. 28Le tsotlhe tse Samuele molebi, le Saule morwa Kiše, le Abenere morwa Nere, le Joabe morwa Seruia ba di tshwaetseng Modimo; le fa e ka bo e le mang yo o ne a tshwaetse Modimo sengwe, se ne se le mo seatleng sa boShelemothe le bomonnawe.
Ditiro tse dingwe tsa Balefi
29Mo go Baisehare, Kenania le bomorwawe ba ne ba laoletswe tiro e e kwa ntle mo go Baiseraele, go nna maotlana le baatlhodi.
30Mo go Baheberone, Hašabia le bomonnawe, batho ba ba bopelokgale, ba le 1 700, e le balebedi ba Baiseraele kwa moseja ga Joretane ntlheng ya bophirimatsatsi; mo tirong yotlhe ya ga Jehofa, le mo tirelong ya kgosi. 31Mo go Baheberone, Jerija e ne e le yo mogolo, e bong wa Baheberone, ka fa makgotleng a bone ka mantlo a borara. Ya re ka ngwaga wa 40 wa puso ya ga Dafite, ba ne ba batlwa, mme ga fitlhelwa mo go bone diganka tse di pelokgale kwa Jasere wa Gileate. 32Le bomonnawe, batho ba bopelokgale, ba le 2 700, ditlhogo tsa makgotla a borara, ba kgosi Dafite o ne a ba dira balebedi mo go Barubene, le mo go Bagate le mo go ba ntlhanngwe ya lotso lwa ga Manase, mo tirong nngwe le nngwe e e leng ya Modimo le mo ditirong tsa kgosi.
