1 DITIRAFALO 22

₁Foo Dafite a re: “E ke yone ntlo ya ga Jehofa Modimo, le se ke sone sebeso sa tshupelo e e fisiwang ya Baiseraele.”

₂Dafite a laola gore go phuthwe baeng ba ba mo lefatsheng la Iseraele; a laola baagi gore ba betle maje a a baakantsweng a go aga ntlo ya Modimo. ₃Dafite a baakanya tshipi ka botlalo ya go dira dimapo tsa ditswalo tsa mejako, le tsa malomagano; le kgotlho ka botlalo jo bo sa itsiweng bokete; ₄le ditlhare tsa masetara tse di se nang palo; gonne Basitone le bone Bature ba ne ba lere ditlhare tsa masetara kwa go Dafite ka botlalo. ₅Dafite a re: “Solomone morwaake o sa le lekau le le nana, mme ntlo e e agelwang Jehofa e tshwanetse go nna bontle jo bo feteletseng, e nne e e itsegeng le e e galalelang mo mafatsheng otlhe tikologong; mme ka re ke rata go e baakanyetsa dilo.” Mme Dafite a baakanya ka botlalo a ise a swe.

₆Foo a bitsa Solomone morwawe, a mo laola gore a agele Jehofa Modimo wa Iseraele ntlo. ₇Dafite a raya Solomone morwawe a re: “Ka ga me, go ne go le mo pelong ya me go agela leina la ga Jehofa Modimo wa me ntlo. ₈Mme lefoko la ga Jehofa la tla kwa go nna la re: ‘O tsholotse madi a le magolo bobe, o dirile dintwa tse dikgolo; ga o agele leina la me ntlo, ka o tsholotse madi a le matona mo lefatsheng mo ponong ya me. ₉Bona, o tlaa tshola ngwana wa mosimane, yo o tlaa nnang motho wa boikhutso. Ke tlaa mo naya boikhutso mo babeng botlhe ba gagwe tikologong; gonne leina la gagwe e tlaa nna Solomone, mme ke tlaa naya Baiseraele kagiso le boiketlo mo metlheng ya gagwe. ₁₀Ene o tlaa agela leina la me ntlo; o tlaa nna morwaake, mme ke tlaa nna rraagwe; ke tlaa tlhomamisa setulo sa bogosi jwa gagwe mo go Baiseraele ka bosakhutleng.’

₁₁“Jaana morwaaka, a Jehofa a nne nao, o tlhogonolofale, o age ntlo ya ga Jehofa Modimo wa gago, jaaka a buile ka ga gago. ₁₂Se le sosi fela ke se, a Jehofa a go neye bonokopela le tlhaloganyo, a go laye ka ga Baiseraele; gore o tshegetse molao wa ga Jehofa Modimo wa gago. ₁₃Foo o tlaa tlhogonolofala fa o tlhokomela go dira melao le dikatlholo tse Jehofa o ne a di laolela Moše ka ga Baiseraele. O nne thata le pelokgale. O se ka wa boifa le fa e le go rerega. ₁₄Jaana bona, mo bobotlaneng jwa me ke baakanyeditse ntlo ya ga Jehofa dikelokerama tsa gouta di le 3 400 000 le dikilokerama tsa selefera di le 34 000 000; kgotlho yone le tshipi ke mo go se nang selekanyo sa bokete; gonne go eme ka letlotlo; dikgong le tsone le maje ke a baakantse; o ka nna wa go oketsa fela. ₁₅Gape o na le badiri ba le bantsi, baremi le badiri ka maje le dikgong, le batho botlhe ba ba matsetseleko mo tirong nngwe le nngwe. ₁₆Gouta, le selefera, le kgotlho, le tshipi ga di na palo; nanoga o dire, Jehofa a nne nao.”

₁₇Le gone Dafite a laola dikgosana tsotlhe tsa Iseraele, gore di thuse Solomone morwawe a re: ₁₈“A Jehofa Modimo wa lona ga a a nna le lona? A ga a a lo naya boikhutso ka ntlha tsotlhe? Gonne banni ba lefatshe o ba ntsentse mo seatleng, lefatshe le fenyegile fa pele ga Jehofa le fa pele ga batho ba gagwe. ₁₉Jaana tlhomamisang pelo ya lona le mowa wa lona mo go batleng Jehofa Modimo wa lona; ke gone nanogang, lo age ntlo e e itshepileng ya ga Jehofa Modimo, go tla lo lere letlole la kgolagano ya ga Jehofa, le dilwana tse di itshepileng tsa Modimo, mo ntlong e e tlaa agelwang leina la ga Jehofa.”