1 DITIRAFALO 15

₁Dafite a itirela mantlo mo motseng wa ga Dafite; a baakanyetsa letlole la Modimo felo, mme a le tlhomela mogope. ₂Foo Dafite a re: “Letlole la Modimo ga le a tshwanela go rwalwa ke ope fa e se ke Balefi fela, gonne ke bone ba Jehofa o ba itshenketseng go tla ba rwala letlole la Modimo, le go mo direla ka bosakhutleng.” ₃Mme Dafite a phuthela Baiseraele botlhe kwa Jerusalema, gore go leriwe letlole la ga Jehofa mo felong ga lone, fa o ne a go le baakanyeditse. ₄Dafite a phutha bomorwa Arone, le Balefi. ₅Ba bomorwa Kohathe: Uriele e le yo mogolo, le bana ba ga rraagwe ba le 120; ₆ba bomorwa Merari: Asaia e le yo mogolo, le bana ba ga rraagwe ba le 220; ₇ba bomorwa Gerešome: Joele e le yo mogolo le bana ba ga rraagwe ba le 130; ₈ba bomorwa Elisafane; Shemaia e le yo mogolo, le bana ba ga rraagwe, ba le 200; ₉ba bomorwa Heberone: Eliele e le yo mogolo, le bana ba ga rraagwe, ba le 80; ₁₀ba bomorwa Usiele: Aminatabe a le yo mogolo, le bana ba ga rraagwe, ba le 112.

₁₁Dafite a bitsa baperesiti Satoke le Abiathare, le Balefi, e bong Uriele, le Asaia le Joele, Shemaia, Eliele le Aminatabe. ₁₂Mme a ba raya a re: “Ke lona ditlhogo tsa matlo a borara ba Balefi; iitshepiseng lona le bana ba rraa lona gore lo tle lo ise letlole la ga Jehofa Modimo wa Iseraele, kwa felong fa ke go le baakanyeditseng. ₁₃Gonne e re ka lo se ka lwa le rwala pele, Jehofa Modimo wa rona o ne a re phomegelela, gonne ga re a ka ra mmatla ka fa molaong.”

₁₄Jalo baperesiti le Balefi ba iitshepisa go tla ba isa letlole la ga Jehofa Modimo wa Iseraele. ₁₅Mme bana ba Balefi ba sikara letlole la Modimo mo maruding a bone, disikaro di le mo go lone, jaaka Moše a laotse ka fa lefokong la ga Jehofa.

₁₆Dafite a bua le bagolo ba Balefi, gore ba tlhome bana ba ga rraabo go nna baopedi, ba na le diletso tsa kopelo, disaletere, le diharepe le disemebala, ba dira modumo o mogolo, gore ba tsholetse mantswe ka boitumelo. ₁₇Jalo Balefi ba tlhoma Hemane morwa Joele; le ba bana ba ga rraagwe, Asafe morwa Berekia; le ba bomorwa Merari bana ba ga rraabo, ba tlhoma Ethane morwa Kušaia; ₁₈ba tlhoma nabo bomorwa rraabone ba thulagano ya bobedi, e bong Sekaria, Bene, le Jaasiele, le Shemi-ramothe, le Jehiele, le Uni, le Eliabe, le Benaia, le Maaseia, le Matithia, le Elifelehu, le Mikeneia, le Obete-etome le Jeiele, balebedi ba mejako. ₁₉Jalo baopedi, Hemane le Asafe le Ethane ba tlhongwa, ba na le disemebala tsa kgotlho tsa go dira modumo o mogolo; ₂₀le Sekaria, le Asiele, le Shemi-ramothe, le Jehiele, le Uni, le Eliabe, le Maaseia le Benaia, ba na le disaletere tse di laeletsweng Alamothe; (ke gore Basetsana); ₂₁le Matithia, Elifelehu, le Mikeneia, le Obete-etome, le Jeiele le Asasia, ba na le diharepe tse di laeletsweng Sheminithe, (ekete ke gore, Mantswe a banna) go tla ba tlhabeletsa.

₂₂Kenania, mogolo wa Balefi, o ne a laola kopelo, a ba ruta ka ga kopelo ka a le setswerere. ₂₃Berekia le Elekana ya bo e le balebedi ba mojako ba letlole. ₂₄Shebania le Jošafate, le Nathanele, le Amasai, le Sekaria, le Benaia le Eliesere e le baperesiti, ba letsa dinaka fa pele ga letlole la Modimo. Obete-etome le Jehia e ne e le balebedi ba mojako ba letlole.

₂₅Jalo Dafite le bagolwane ba Iseraele, le balaodi ba dikete, ba ya go ntsha letlole la kgolagano ya ga Jehofa kwa ntlong ya ga Obete-etome ka boitumelo. ₂₆Ga dirala, ya re Modimo o thusa Balefi ba ba rweleng letlole la kgolagano ya ga Jehofa, ba isa ditlhabelo, e bong dikgomo di supa le diphelefu di supa. ₂₇Dafite o ne a apere kobo ya leloba le le boleta, le Balefi botlhe ba ba rweleng letlole, le baopedi, le Kenania mong wa kopelo a bile a na le baopedi; Dafite a apere sekhutlana sa leloba. ₂₈Jalo Baiseraele botlhe ba tsaya letlole la kgolagano ya ga Jehofa ka go thela lošalaba, le ka modumo wa lofare, le ka dinaka le disemebala, ba tsosa modumo o mogolo ka disaletere le diharepe.

₂₉Ga dirala ya re letlole la kgolagano ya ga Jehofa le tla mo motseng wa ga Dafite, Mikale morwadia Saule a bo a lebile ka fensetere, a bona kgosi Dafite a bina a letsa, mme a mo nyatsa mo pelong ya gagwe.