1 DITIRAFALO 10

₁Jaana Bafilisitia ba tlhabana le Baiseraele; mme banna ba Iseraele ba tshaba fa pele ga Bafilisitia, mme ba wa ba bolaetswe mo thabeng ya Gileboa. ₂Bafilisitia ba konatelela Saule le bomorwawe ka thata; Bafilisitia ba bolaya Jonathane, le Abinatabe, le Malekišue bomorwa Saule. ₃Tlhabano ya pitlaganya Saule thata, bahudi ka bora ba mo tshwara; a nna mo tlalelong ka ntlha ya bahudi ka bora. ₄Foo Saule a raya motshola dibolao wa gagwe a re: “Somola tšhaka ya gago o mphololetse ka yone; nka tla ka sotlwa ke ba ba sa rupang ba.” Motshola dibolao wa gagwe a gana; gonne a boifa thata. Ke gone ka moo Saule a tsaya tšhaka ya gagwe a wela mo go yone. ₅Ya re motshola dibolao wa gagwe a bona fa Saule a sule, le ene a wela mo tšhakeng ya gagwe a swa. ₆Mme Saule a swa le bomorwawe ba bararo; le ba ntlo ya gagwe botlhe ba swa mmogo. ₇E rile banna botlhe ba Iseraele ba ba mo molapong ba bona fa go tshajwa, le go re Saule le bomorwawe ba sule, ba tlogela metse ya bone ba tshaba; mme Bafilisitia ba tla ba aga mo go yone.

₈Ga dirala ka moso, e rile Bafilisitia ba tla go apola ba ba bolailweng, ba fitlhela Saule le bomorwawe ba ole mo thabeng ya Gileboa. ₉Ba mo apola, ba ba ba tsaya tlhogo ya gagwe le dibolao tsa gagwe, ba roma kwa lefatsheng la Bafilisitia tikologong, ba isa mafoko ao mo medimong ya bone ya disetwa, le mo bathong. ₁₀Ba tsenya dibolao tsa gagwe mo ntlong ya medimo ya bone, ba gokela tlhogo ya gagwe mo ntlong ya ga Dagone. ₁₁E rile ba Jabeše-gileate botlhe ba utlwela tsotlhe tse Bafilisitia ba di diretseng Saule, ₁₂foo banna botlhe ba ba diganka ba nanoga, ba ya ba tlosa serepa sa ga Saule, le direpa tsa bomorwawe, ba di isa kwa Jabeše, ba fitlha marapo a bone fa tlase ga mooka mo Jabeše, ba ikitsa go ja ka malatsi a supa.

₁₃Jalo Saule a swela tlolo ya gagwe e o kileng a e direla Jehofa, ka ntlha ya lefoko la ga Jehofa le o se kang a le tshegetsa; le ka gonne o ne a lopa kgakololo mo go mongwe yo o buang le badimo, gore a tle a botse ka gone. ₁₄A se ka a botsa mo go Jehofa; ke gone ka moo a mmolaya, mme a sokololela bogosi kwa go Dafite morwa Jese.