Zakariya 12

₁Mahungu hi lawa, ri nga rito ra HOSI Xikwembu ehenhla ka Vaisraele: Xikwembu lexi vumbeke matilo, lexi xi andlaleke ni misava, xona lexi hanyisaka munhu, xi vurisa sweswo xi ri: ₂“Vonani, muti wa Yerusalema ndzi ta wu endla xinwelo xa vhinyo leyo bava; vanhu va matiko lama rhendzelaka Yerusalema, va ta yi nwa va dedeleka. Loko valala lava va rhendzela muti wa Yerusalema va lwa na wona, va ta hlasela ni va le Yuda. ₃Hi siku rero, muti wa Yerusalema ndzi ta wu endla ribye lero tika; vanhu hinkwavo lava va nga ta ringeta ku ri tlakula, ri ta va tsandza, ri va vavisa swinene. Kutani matiko hinkwawo ya misava ma ta ri hlengela. ₄Hi siku rero, ndzi ta tshukisa tihanci ta vanhu va matiko, hinkwato ndzi ti dlaya mahlo, vagadi va tona ndzi va hlanganisa tinhloko; kambe ndzi ta pfula mahlo, ndzi languta va le Yuda. ₅Kutani varhangeri va vona va ta byelana va ku: ‘Vaaki va Yerusalema va tiyisiwa hi HOSI ya matimba hinkwawo, xi nga Xikwembu xa vona!’

₆“Hi siku rero, varhangeri va ka Yuda ndzi ta va endla ndzilo lowu pfurhaka exihlahleni; va ta fana ni langavi leri vuvumelaka etinhlangeni, kutani va ta herisa tinxaka hinkwato leti ti va rhendzeleke hi matlhelo hinkwawo. Kambe loko wu ri muti wa Yerusalema, wona wu ta tshama wu hlayisekile kwala wu nga kona.”

₇HOSI Xikwembu xi ta rhanga xi nyika mavuthu ya va ka Yuda matimba yo hlula valala, leswaku vatukulu va Davhida ni vaaki va Yerusalema va nga tluli va le Yuda hi ku dzuneka. ₈Enkarhini wolowo, HOSI Xikwembu xi ta sirhelela vaaki va Yerusalema, leswaku lava tsaneke exikarhi ka vona va ta tiya ku fana na Davhida. Loko va ri vatukulu va Davhida, vona va ta rhangela tiko ku fana ni ntsumi ya Xikwembu, kumbe ku fana ni Xikwembu hi xiviri.

₉Xikwembu xi ri: “Hi siku rero ndzi ta lavisisa vanhu hinkwavo lava lwaka na Yerusalema leswaku ndzi va herisa. ₁₀Kutani ndzi ta chela moya wa vukhongeri ni wa tintswalo eka vatukulu va Davhida ni ka vaaki va Yerusalema. Va ta languta eka mina hikwalaho ka loyi va n'wi tlhaveke, kutani va ta n'wi rila ku fana ni loko munhu a tlhaveka a rila n'wana wa yena loyi a a ri yexe, kumbe n'wana wa yena wa mativula. ₁₁Ku rila loku ku nga ta va kona eYerusalema, ku ta va ku ringana ni xirilo lexi endleriwaka Hadada-Rimoni erivaleni ra le Megido. ₁₂Tiko ri ta va enkosini: Ndyangu wun'wana ni wun'wana wu ta rila wu ri woxe. Va ka Davhida va ta rila va ri voxe, vasati va vona va rila va ri etlhelo. Va ka Natani va ta rila va ri voxe, vasati va vona va rila va ri etlhelo. ₁₃Va ka Levhi va ta rila va ri voxe, vasati va vona va rila va ri etlhelo. Va ka Ximeyi va ta rila va ri voxe, vasati va vona va rila va ri etlhelo. ₁₄Ni mindyangu leyin'wana hinkwayo yi ta rila, vavanuna va rila va ri voxe, ni vasati va vona va rila va ri etlhelo.