Vutlhari 16

₁A swi fanerile leswaku vanhu lava va biwa hi swivumbiwa leswi,

ni ku xanisiwa hi papa lerikulu ra mabawa.

₂We HOSI Xikwembu, a wu lathisanga vanhu va wena hi ndlela leyi,

kambe u va kombisile tintswalo.

U va rhumerile switsatsatsa leswaku nyama ya swona yi va swakudya leswo nandziha ngopfu,

yi va xurhisa.

₃U endlile hinkwaswo leswi leswaku Vaegipta, hambiloko va twa ndlala, va nga koti ku dya,

hikwalaho ka swivumbiwa leswo nyenyetsa leswi rhumiweke eka vona.

Kambe vanhu va wena va khomiwile hi ndlala nkarhinyana ntsena,

kutani va dya swakudya swo nandziha ngopfu.

₄A swi fanerile leswaku vaxanisi lava va vavisiwa hi ku pfumala lokukulu,

loko vanhu va wena va ri karhi va kombiwa

hilaha valala va vona va xanisiwaka hakona.

₅Loko tinyoka to chavisa swinene ti lumetela vanhu va wena,

ti va dlaya hi vuxungu bya tona,

vukari bya wena a byi va herisanga.

₆Khombo leri ri yile mahlweni nkarhinyana ntsena

leswaku ri va xitsundzuxo eka vona.

Kutani va nyikiwile xikombiso xo hanyisa

lexi xi va tsundzuxaka swileriso swa nawu wa wena.

₇Un'wana ni un'wana loyi a xi languteke a ponisiwa, ku nga ri hileswi a swi vonaka,

kambe a kutsuriwa hi wena, Muponisi wa vanhu hinkwavo.

₈Hi ku endla leswi, u khorwisile valala va hina,

leswaku hi wena ntsena loyi a ponisaka eka hinkwaswo leswo biha.

₉Va dlayiwile hi ku lumiwa hi tinjiya ni mabawa,

kutani ndlela ya ku va tshungula a yi kumiwanga,

hikuva a va fanele ku biwa hi swivumbiwa leswi.

₁₀Kambe hambiloko vanhu va wena va lumiwile hi tinyoka ta vuxungu, a ti va dlayanga,

hikuva u va twele vusiwana, u va pfuna ni ku va avanyisa.

₁₁Va lumiwile leswaku va tsundzuka swileriso swa wena,

kutani va hatla va kutsuriwa, leswaku va nga ku rivali,

va nga tshiki ni tintswalo ta wena.

₁₂A va hanyisiwanga hi timitsu kumbe mafurha,

kambe hi rito ra wena HOSI Xikwembu, leri nga rito leri horisaka vanhu hinkwavo.

₁₃Hi wena ntsena loyi a hanyisaka ni ku lovisa vanhu,

hi wena loyi a va nghenisaka ni ku va humesa exivandleni xa vafi.

₁₄Muhomboloki ú kota ku dlaya munhu,

kambe a tsandzeka ku n'wi pfuxa,

ni ku n'wi humesa exivandleni xa vafi.

₁₅We HOSI Xikwembu, ku hava loyi a nga chupukaka emavokweni ya wena.

₁₆Vahomboloki lava va ku fularheleke,

va biwile hi matimba ya voko ra wena,

va xupuriwa hi swimbhembhe swo chavisa ngopfu ni xihangu,

ni ku herisiwa hi ndzilo.

₁₇Leswi hlamarisaka hi leswaku ndzilo a wu pfurha swinene hambi ku ri ematini

lama a ma fanele ku wu tima,

hikuva swivumbiwa hinkwaswo swi lwela lavo lulama.

₁₈Nkarhi wun'wana ndzilo wu ve wu timeka,

leswaku wu nga hisi swivumbiwa leswi rhumiweke ku xanisa vahomboloki.

Vona, loko va vona leswi humeleleke, va ta tiva

leswaku va avanyisiwa hi Xikwembu.

₁₉Nkarhi wun'wana ndzilo, hambiloko wu ri exikarhi ka mati, a wu pfurha ku tlula mpimo,

kutani wu herisa swibyariwa hinkwaswo etikweni ra vahomboloki.

₂₀We HOSI Xikwembu, khombo leri a ri banga vanhu va wena,

kambe u va nyikile xinkwa xa tintsumi.

U va phamele xinkwa lexi humaka etilweni, va dya va xurha va nga endlanga nchumu,

kutani ku nandziha ka xona ku va tsakisa hinkwavo.

₂₁Leswi swi kombisile leswaku u hlayisa vana va wena hi rirhandzu lerikulu.

Xinkwa lexi xi xurhisile hinkwavo lava va xi dyeke,

xi hundzuluxiwile leswaku xi nandzihela munhu un'wana ni un'wana.

₂₂Gwitsi ni gamboko a swi n'okanga, hambiloko swi hisiwa hi ndzilo.

Leswi swi kombile vanhu va wena leswaku swibyariwa etikweni ra valala va vona,

swi herisiwa hi ndzilo lowo pfurhaka exikarhi ka ximbhembhe ni xihangu.

₂₃Loko ndzilo lowu wu fikile eka vanhu va wena lavo lulama,

wu hungutile matimba ya wona, leswaku va ta kuma swakudya.

₂₄Ntumbuluko, hi ku yingisa wena Mutumbuluxi wa wona,

wu tirhisa matimba ya wona ku ba vahomboloki,

kambe wu komba lava va ku tshembaka musa ni tintswalo.

₂₅Ntumbuluko wu nyikiwa swivumbeko swo hambana-hambana,

ku komba hilaha wena u pfunaka hakona lava va ku khongelaka.

₂₆We HOSI Xikwembu, leswi swi humelele leswaku vanhu lava u va rhandzaka,

va dyondza leswaku leswi swi xurhisaka a hi leswi va swi tshovelaka ntsena,

kambe i rito ra wena leri hlayisaka lava va ku tshembaka.

₂₇Swakudya leswi nga herisiwangiki hi ndzilo,

swi n'okile loko dyambu ri tlhava ri swi kufumeta.

₂₈Leswi swi hi dyondzisa leswaku hi fanele hi pfuka nimpundzu swinene hi ku nkhensa,

ni ku ku khongela loko dyambu ri xa.

₂₉Ku tshemba ka loyi a tsandzekaka ku nkhensa,

ku nyamalala tanihi gwitsi,

ku khuluka ku kotisa mati lama nga tirhisiwiki.