Vutlhari 13

₁Hinkwavo lava nga tivangiki Xikwembu va velekiwa va ri swiphukuphuku;

va vona swilo leswinene leswi nga kona, kambe va tsandzeka ku tiva Xikwembu lexi hanyaka.

Va xiyaxiya swivumbiwa swa xona, kambe va ala ku pfumela eka muvumbi wa swona.

₂Va ehleketa leswaku swikwembu leswi fumaka misava i ndzilo kumbe moya kumbe xidzedze;

i tinyeleti leti fambaka etilweni kumbe maboboma ya mati kumbe dyambu ni n'weti.

₃Loko va pfumela leswaku swilo leswi swi va swikwembu, hileswi swi va tsakisaka swinene hi ku saseka ka swona,

a va ta fanela ku twisisa leswaku N'wini wa swona, ú swi tlula ngopfu hi vunene,

hikuva hi yena mutumbuluxi wa vuxongi ni muendli wa byona.

₄Loko va hlamala ku vona matimba ni mintirho ya swona,

a va ta fanela ku twisisa leswaku loyi a swi vumbeke ú swi tlula swinene hi matimba.

₅Vukulukumba ni ku saseka ka swivumbiwa,

swi pfuna ku twisisa mutumbuluxi wa swona.

₆Kasi vanhu lava a va faneli ku soriwa ku tlula mpimu,

hikuva kumbexana va hambuka endleleni

va ri karhi va lava Xikwembu, va navela ku xi kuma.

₇Ni ku hanya exikarhi ka swivumbiwa swa xona, va tshama va ri karhi va swi xiyaxiya,

kutani va tshemba eka leswi va swi vonaka hikuva swi sasekile.

₈Hambiswiritano va ni nandzu.

₉Leswi va nga ni matimba ya ku xiyaxiya swivumbiwa,

va tsandzeka ha yini ku hatlisa va kuma N'wini wa swilo leswi hinkwaswo?

₁₀Va hluphekile swinene vanhu lava tshembaka swilo leswi kalaka vutomi,

lava gandzelaka leswi swi endleke hi mavoko ya vanhu,

lava tirhelaka swifaniso swa swiharhi swa nsuku ni silivhere leswi endliweke hi vutshila,

kumbe maribye lama nga pfuniki nchumu lama vatliweke khale.

₁₁Mutivi wa ku tsema mirhi a nga tsema murhi lowu fanelaka,

a khwamula mahanti ya wona,

kutani a vatla hi vutshila xibya lexi pfunaka eku hanyeni ka muti.

₁₂A tshivela ndzilo hi mavatlo ya murhi lowu a wu tirhiseke,

kutani a tiswekela swakudya, a dya a xurha.

₁₃Kambe hi rikunyi leri nga pfuniki nchumu, lero gombonyoka ra swikhutu,

a hungasa hi ku ri vatla hi vutshila,

a humesa eka rona xifaniso xa munhu,

₁₄kumbe xa xiharhi lexi nga pfuniki nchumu.

A xi sasekisa hi pende leyo tshwuka,

a funengeta ha yona swivati hinkwaswo swa xona.

₁₅Kutani a endlela xifaniso lexi evutshamo lebyi byi xi ringaneke,

a byi veka ekhumbini ni ku byi bohelela kona hi nsimbhi.

₁₆A vona leswaku xi nga tshuki xi wa, hi ku tiva leswaku xi nge tiyimisi,

xo va xifaniso ntsena, xi lava ku yimisiwa.

₁₇Kambe a nga khomiwi hi tingana ku khongela xilo lexi xo kala vutomi,

a xi kombela ku hlayisa vukati bya yena ni vana ni hinkwaswo leswi nga swa yena.

₁₈Ku titwa kahle emirini wa yena a khongela xilo xo hava ntamu,

vutomi a byi kombela eka lexi pfumalaka byona

ni ku pfuniwa eka lexi nga riki na vutivi.

Eka lexi nga fambiki a khongelela minkateko eriendzweni ra yena.

₁₉Ku engetela xuma xa yena ni ku katekisiwa eka bindzu ni le mintirhweni ya mavoko ya yena,

a kombela xilo lexi mavoko ya xona ma nga hava matimba.