Tobiti 7

₁Loko Tobiya ni ntsumi Rafaele va fika emutini wa Ekibatana, Tobiya a ku ka Rafaele: “Azariya makwerhu, hatlisa u ndzi yisa ndzi ya vonana na Raguwele.” Kutani ntsumi yi yisa Tobiya endlwini ya Raguwele, loyi va nga kuma a tshame kusuhi ni nyangwa ya xivava xa yena. Rafaele na Tobiya va rhangela ku n'wi xeweta, kutani Raguwele a hlamula a ku: “Vamakwerhu nghenani, ma amukeriwa endlwini ya mina.”

Kavaloko Raguwele a nghenisa Rafaele na Tobiya endlwini ya yena, ₂kutani a ku ka nsati wa yena Edina: “Xana wa swi vona leswaku jaha leri ri fana ni makwerhu Tobiti ke?”

₃Edina a vutisa Rafaele na Tobiya a ku: “Xana mi huma kwihi?” Vona va ku: “Hi Vaisraele va nyimba ya Neftali, kambe sweswi hi tshama evukhumbini eNinivha.”

₄Edina a ku ka vona: “Xana ma n'wi tiva makwerhu Tobiti xana?” Vona va ku: “Ha n'wi tiva swinene.”

Edina a ku ka vona: “Xana wa ha pfuka?”

₅Vona va ku: “Wa hanya, naswona ú pfukile.”

Kutani Tobiya a ku: “Tobiti i tata wa mina.” ₆Kwalaho Raguwele a suka a yima, kutani hi mihloti ya ntsako a ntswontswa Tobiya. ₇Kutani a ku: “N'wananga, Xikwembu a xi ku katekise. Tata wa wena i wanuna wo lulama ni ku fundzheka. I khombo lerikulu loko munhu wo tshembeka ni ku hanana a fe mahlo!” Kutani a n'wi angarha, a ri karhi a rila. ₈Nsati wa yena Edina ni n'wana wakwe Sara na vona va rilela Tobiti.

Kutani Raguwele a amukela Rafaele na Tobiya hi malwandla; a va dlayela khuna ro huma entlhambini wa yena wa tinyimpfu. Loko va hlambile ni ku tshama hansi leswaku va ta dya, Tobiya a vutisa Rafaele a ku: “Azariya makwerhu, xana u ta n'wi kombela rini Raguwele leswaku a ndzi nyika Sara ku va nsati wa mina ke?”

₉Kambe Raguwele a twa leswi Tobiya a swi vutiseke Rafaele, kutani a ku ka Tobiya: ₁₀“Dyana, u va u nwa ni ku tsaka madyambu lawa. Hi wena u nga xaka ra ka hina ra xiviri, kutani hi wena ntsena loyi a nga ni fanelo ya ku teka n'wana wa mina. Hikokwalaho a ndzi nga pfumeleli wanuna un'wana ku n'wi teka. Kambe n'wananga, ndzi fanele ku ku byela ntiyiso. ₁₁Ndzi vile ndzi nyiketile n'wana wa mina eka vavanuna va 7 va xaka ra ka hina hi ku landzelana. Kambe un'wana ni un'wana wa vona ú file hi vusiku bya nkhuvo wa vukati loko a nghena ekamarini ra Sara. Kambe n'wananga, sweswi dyana, u va u nwa. HOSI Xikwembu xi ta mi sirhelela hivumbirhi bya n'wina.”

Kutani Tobiya a ku: “Ndzi nga ka ndzi nga dyi hambi ku ri ku nwa, loko u nga si ndzi tshembisa leswaku u ta ndzi nyika Sara ku va nsati wa mina.”

₁₂Raguwele a ku ka yena: “Ndzi ta endla tano. Ndzi ta ku nyika Sara hi ku landza nawu wa Muxe. Xikwembu-xa-le-henhla-henhla xi lavile vukati lebyi. Hikokwalaho, teka Sara a va nsati wa wena. Ku sungula sweswi, mi nuna ni nsati. Sara ú ta va nsati wa wena hilaha ku nga heriki. Xikwembu-xa-le-henhla-henhla a xi mi sirhele hivumbirhi bya n'wina vusikwini lebyi. A xi mi twele vusiwana ni ku mi komba musa.”

₁₃Kavaloko Raguwele a vitana n'wana wa yena Sara. Loko Sara a nghenile laha va nga kona, a n'wi khoma hi voko, kutani a n'wi nyika Tobiya a ku: “N'wi teke a va nsati wa wena hi ku landza swiletelo swa nawu wa Muxe. N'wi teke u famba na yena eka tata wa wena. Xikwembu-xa-le-henhla-henhla a xi mi tsakise vutomi bya n'wina hinkwabyo.”

₁₄Kutani Raguwele a byela nsati wa yena Edina ku n'wi tisela xitsalelo xa dzovo, leswaku a ta tsala eka xona ntwanano wa vukati. Edina a n'wi tisela xitsalelo xa kona, kutani Raguwele a tsala ntwanano lowu eka xona. A tsala leswaku Sara a nyikiwa Tobiya hi ku ya hi swiletelo swa nawu wa Muxe. ₁₅Kwalaho va sungula ku dya.

₁₆Raguwele a tlhela a vitana nsati wa yena Edina a ku: “Nkatanga, lunghisa kamari lerin'wana, u heleketa Sara kona.”

₁₇Edina a ya endla hilaha Raguwele a n'wi leriseke hakona. Loko a heta ku endla swona, a heleketa Sara ekamarini ra kona. Kutani Sara a sungula ku rila. Kambe Edina a khongotela Sara a ku ka yena: ₁₈“N'wananga, namuntlha Xikwembu-xa-le-henhla-henhla xi ta ku tsakisa. Hikokwalaho ke, tiya nhlana, u nga vileri.” Kutani Edina a huma ekamarini.