Siraka 8

₁U nga tshuki u kanetana ni munhu wa xiyimo xa le henhla,

a nga ta ku xanisa.

₂U nga tshuki u holovisana ni mufuwi,

a nga ta xava vanhu leswaku va ku hundzukela,

hikuva nsuku wu lovisile lavo tala,

wu onhile ni miehleketo ya tihosi.

₃U nga kanetani ni munhu loyi a vulavulaka ngopfu,

hikuva u nga ta nyanyisa timhaka.

₄U nga tshuki u vungunya la pfumalaka mahanyelo,

a nga ta rhukana vatata wa wena.

₅U nga tshuki u sola munhu loyi a nga karhi a tshikaka xidyoho.

Tsundzuka leswaku hinkwerhu hi vadyohi.

₆U nga sandzi lava dyuhaleke,

hikuva van'wana va hina hi karhi ha dyuhala.

₇U nga tsakeli rifu ra un'wana.

Tsundzuka leswaku hinkwerhu hi fanele ku fa.

₈U nga honisi leswi vuriweke hi vanhu va vutlhari.

Dyondza swivuriso swa vona.

Eka swona u ta kuma vutivi

ni ku dyondza ku tirhela vakulukumba.

₉Yingisa leswi vuriweke hi lava dyuhaleke,

hikuva na vona va dyondzisiwile hi vatata wa vona.

Eka vona u ta kuma ku twisisa

ni vutivi bya ku hlamula kahle loko swi laveka.

₁₀U nga pfuneti mudyohi ku dyoha,

hikuva u ta vaviseka kukota munhu la tshwaka loko a ri karhi a hlanganyeta ndzilo.

₁₁U nga pfumeli ku pfuxiwa hi munhu wa lunya.

Ú ta ku phasa hi marito ya wena.

₁₂U nga lombisi nchumu eka loyi a ku tlulaka hi matimba.

Loko u endla tano, tibyele leswaku u lo n'wi nyika.

₁₃U nga tshembisi munhu un'wana ku n'wi hakelela swikweleti hi leswi u nga na swona,

hikuva u ta fanela ku humesa leswi u n'wi tshembiseke swona.

₁₄U nga tengisani ni muavanyisi,

hikuva ú ta ku hlula hikwalaho ka xiyimo xa yena.

₁₅U nga fambi eriendzweni ni munhu wa matlotlo.

Ú ta ku karhata ntsena.

Ú ta endla leswi a swi lavaka,

kutani hikwalaho ka vuphukupuku bya yena, u ta lova swin'we na yena.

₁₆U nga tshuki u holovisana ni munhu wo kariha,

kumbe ku famba laha u tikumaka u ri wexe na yena,

hikuva ku halata ngati a hi nchumu eka yena,

kutani ú ta ku hlasela laha ku nga ta hava loyi a ku pfunaka.

₁₇U nga tshuki u kombela xiphukuphuku ku ku tsundzuxa,

hikuva xi nga ka xi nga fihli leswi u xi byelaka swona.

₁₈U nga endli nchumu lowu nga wa xihundla emahlweni ka loyi u nga n'wi tiviki,

hikuva a wu tivi leswi a nga ta swi paluxa.

₁₉U nga tshuki u paluxela munhu un'wana ni un'wana miehleketo ya wena.

Loko u endla tano, ntsako wa wena wu ta hela.