Siraka 49

₁Ku tsundzuka Yosiyasi swi fana

ni ku nuhela ka mirhi ya risuna leyi pfanganisiweke hi vutivi,

ku kotisa ku tsokombela ka vulombe lebyi tsakisaka vanhu hinkwavo,

a tsakisa tanihi tinsimu enkhubyeni.

₂Swiendlo swa yena swi hundzuluxile Vaisraele,

swi susile eka vona magandzelo ya swikwembu swa hava.

₃A a ri munhu wo tshembeka, a tirhela Xikwembu hi mbilu ya yena hinkwayo,

kutani emasikwini lawaya ya vuhomboloki ú tiyisile vukhongeri.

₄Tihosi hinkwato ta Israele, handle ka Davhida na Hezekiya na Yosiyasi,

ti dyohile ngopfu,

hikuva ti tshikile nawu wa Loyi a nga henhla-henhla

minkarhi hinkwayo ya mfumo wa tona.

₅Ti nyiketile vanhu van'wana matimba ya tona

ni ku twala ka tona eka matiko ya vanhu vambe.

₆Vona va hisile muti lowo hlawuleka,

magondzo ya wona va ma hundzurile mananga,

tanihi laha Yeremiya a a vurile hakona.

₇Yeremiya ú hlunamile, hambiloko a a hlawuriwile

ku va muprofeta a nga si velekiwa.

Ú nyikiwile matimba ya ku tsuvula ni ku mbundzumuxa,

ku wisela hansi ni ku herisa, ku aka ni ku tlhela a byala.

₈I Ezekiele loyi a voneke ku dzuneka ka Xikwembu

loku vangamaka ehenhla ka mavhilwa ya mune ya swivumbiwa leswi hanyaka.

₉Xikwembu xi tsundzukile valala va yena kutani xi va ba hi xidzedze,

kambe xi katekisile lava fambaka endleleni yo lulama.

₁₀Marhambu ya vaprofeta lava 12

a ma pfuke emasirheni,

hikuva vaprofeta lava va tiyisile

Vaisraele nhlana, ni ku va ponisa

hi ku tshemba lokukulu.

₁₁Xana hi nga dzunisa Zerubabele hi ndlela yihi?

A a fana ni xingwavila xo fungha ha xona evokweni ra xinene ra HOSI Xikwembu.

₁₂Swi ve tano na Yoxuwa n'wana Yosadaki.

Zerubabele na Yoxuwa va akile Tempele yo hlawuleka ya HOSI Xikwembu hi vuntshwa,

leyi yi faneleke ku va ni ntwalo hilaha ku nga heriki.

₁₃Vito ra Nehemiya na rona ra tsundzukiwa.

Ú pfuxile rirhangu leri a ri mbundzumuxiwile ra muti wa Yerusalema,

a vekela timbanti ni swo goga hi swona hinkwaswo.

A aka ni tindlu ta hina.

₁₄A ku vanga na munhu emisaveni loyi a fanaka na Enoko,

hikuva ú tlakuriwile, a ya etilweni.

₁₅A ku la nga velekiwa munhu wo fana na Yosefa,

hambi ma ri marhambu ya yena ma fundzhiwile.

₁₆Xeme na Seta na Enosi va fundzhiwile swinene,

kambe Adamu ú tlula swivumbiwa hinkwaswo hi ku fundzhiwa.