Ta ku tinyungubyisa
1Kambe minkarhi yin'wana mi nga khomiwi hi tingana,
hikuva mi nga dyoha hikwalaho ka ku endla leswi van'wana va lavaka swona.
2Mi nga khomiwi hi tingana hikwalaho ka nawu ni ntwanano wa Loyi a nga henhla-henhla,
ni ku avanyisa hi ku lulama hambi lavo homboloka.
3Mi nga nyumi ku pfunana hi mali ni loyi mi bindzulaka na yena kumbe loyi mi nga eriendzweni na yena,
ni ku avelana ndzhaka ni vanghana.
4Mi nga khomiwi hi tingana ku pima swilo hi xitalo,
ni ku tihlengeletela rifuwo leritsongo kumbe lerikulu,
5ni ku bindzula eka vaxavisi.
Mi nga nyumi ku laya vana va n'wina nkarhi ni nkarhi,
ni ku ba swinene nandza loyi a nga tshembekiki.
6Loko vasati va n'wina va nga tshembeki, notlelani tinyangwa ta tindlu ta n'wina,
laha ku nga ni vanhu lavo tala, lotlelani swilo swa n'wina.
7Pimani ni ku hlaya hinkwaswo leswi mi swi humesaka,
tsalani mali hinkwayo leyi mi yi tirhisaka ni ku yi amukela.
8Mi nga khomiwi hi tingana ku laya xiphukuphuku
kumbe mukhalabye loyi a pfuxaka madzolonga ni lavantshwa.
Loko mi endla tano mi ta komba leswaku mi leteriwile swinene,
kutani hinkwavo va ta tsaka hikwalaho ka n'wina.
Ta vana va xisati ni vatata wa vona
9Hambiloko n'wana wa xisati a nga swi tivi, tata wa yena a nga khomi hi vurhongo nivusiku,
hikuva n'wana loyi wa n'wi karhata ni ku n'wi vangela nkelunkelu.
Loko a ha ri ntsongo tata wa yena wa karhateka hikuva kumbexana a nge tekiwi,
loko a tekiwile, wa ha kharhateka hikuva kumbexana ú le nhlomulweni.
10Loko a ha ri nhwana, tata wakwe wa karhateka hikuva kumbexana n'wana ú ta nyamisiwa,
kutani ú ta tika a ha ri ekaya.
Loko a tekiwile, tata wa yena wa karhateka hikuva kumbexana
n'wana ú ta oswa kumbe ú ta va mhika.
11Vana vanga, hlayisani swinene vana va n'wina va xisati lava omeke nhloko,
hikuva valala va n'wina va ta mi sandza hikwalaho ka vona.
Hinkwavo emutini va ta mi hlekula,
mi ta va xihlekiso etikweni.
[Vekani vana va n'wina va xisati emakamarini ya byetlelo lama kalaka mafasitere,
kumbe laha va nga kotaka ku vona nyangwa ya yindlu ya n'wina.]
12Mi nga pfumeli leswaku va komba vumbhurhi bya vona emahlweni ka vavanuna hinkwavo,
kumbe ku dya nkarhi hi ku vulavula ni vavasatikulobye.
13Vavasati va onha vavasatikulobye
tanihi tinsumba ti onhaka swiambalo.
14Vuhomboloki bya wanuna bya antswa ku tlula vunene bya wansati,
vavasati va vanga tingana ni makhombo.
Ta ku dzuneka ka Xikwembu entumbulukweni
15Sweswi ndzi mi tsundzuxa mintirho ya HOSI Xikwembu,
ndzi mi tivisa hinkwaswo leswi ndzi swi voneke.
HOSI Xikwembu xa vulavula, kutani mintirho ya xona yi endliwa.
[Swivumbiwa hinkwaswo swi yingisa swileriso swa xona.]
16Dyambu ri voningela hinkwaswo,
kutani hinkwaswo swi tatiwa hi ku dzuneka ka HOSI Xikwembu.
17HOSI Xikwembu a xi nyikanga tintsumi to hlawuleka ta xona
matimba ya ku tivisa mintirho hinkwayo leyi hlamarisaka ya xona,
hambiloko xi ti nyikile matimba ya ku yima
ti nga vaviseki emahlweni ka ku dzuneka ka xona.
18Xi xiyaxiya swidziva swa lwandle ni timbilu ta vanhu,
kutani xi tiva swihundla swa swona.
Loyi a nga henhla-henhla ú tiva hinkwaswo leswi nga tiviwaka,
ú twisisa ni leswi swikombiso swa tinguva swi vulaka swona.
19Ú tiva hinkwaswo leswi a swi ri kona ni leswi nga ta va kona,
ú paluxa ni swihundla leswikulu.
20Ú tiva miehleketo hinkwayo ya vanhu,
ku hava ni rito ni rin'we ra vona leri ri n'wi tumbelelaka.
21Ú lulamisile mintirho yo hlamarisa ya vutlhari bya yena,
a tshama a ri tano hilaha ku nga heriki.
Mi nge engeteli nchumu eka yena, mi nge hunguti nchumu eka yena,
a nga ka a nga tsundzuxiwi hi munhu.
22Mintirho ya yena hinkwayo yi sasekile,
yi tsakisa mahlo ya hinkwavo lava va yi vonaka.
23Swilo leswi hinkwaswo swi ta va kona hilaha ku nga heriki,
hinkwaswo swi na xikongomelo xa swona.
24Swilo hinkwaswo swi famba hi swimbirhi-mbirhi, xin'wana xi hambanile ni xin'wana,
kambe HOSI Xikwembu a xi endlanga xilo ni xin'we lexi nga hetisekangiki.
25Swilo hinkwaswo swi hetisisa vunene bya swin'wana swilo.
I mani loyi a nga vonaka ku dzuneka ka yena hi ku ringana?
