Siraka 41

₁Wena rifu, ku ku anakanya swi karhata munhu

loyi a tsakelaka swilo swa yena hinkwaswo leswi a nga na swona,

loyi a katekisiweke, loyi a nga karhatiwiki hi nchumu,

loyi a ha tsakisiwaka hi swakudya.

₂Wena rifu, leswi u tisaka swona,

swi amukeriwa hi mupfumari loyi a vabyaka,

loyi a dyuhaleke ngopfu, loyi a karhatiwaka swinene hi ta vutomi,

loyi a hundzukeke lowo-fe-mahlo, loyi a kalaka ni ku tshemba.

₃U nga chavi leswi rifu ri tisaka swona.

Tsundzuka leswaku lava ku rhangeleke va file, ni lava ku landzelaka va ta fa na vona.

₄Xikwembu xi lerisile leswaku swivumbiwa hinkwaswo leswi hanyaka swi fanele ku fa.

Xana u mani wena loyi a nga kanetaka ku rhandza ka Loyi a nga henhla-henhla?

Exivandleni xa vafi ku hava loyi a nga vaka ni mhaka ya leswaku ú hanye

malembe ya 10, kumbe 100, kumbe 1 000.

₅Vana va vadyohi i vana va manyala,

va fambela laha vahomboloki va hlengeletanaka kona.

₆Ndzhaka ya vona yi ta herisiwa,

kutani vatukulu va vona va ta soriwa minkarhi hinkwayo.

₇Vana va ta sandza vatswari va vona lavo homboloka,

hikuva va soriwa hikwalaho ka vona.

₈Mi ni khombo n'wina vahomboloki

lava tshikeke milawu ya Xikwembu lexi nga henhla-henhla.

₉[Khombo ri ta wela vana va n'wina,

kutani n'wina mi ta hanya emahlomulweni.]

Mi velekeriwile ku rhukaniwa,

ni loko mi file mi ta rhukaniwa.

₁₀Hinkwaswo leswi nga ntshuri swi tlhelela entshurini.

Swi va tano ni vahomboloki, va rhukaniwa, kutani va herisiwa makumu.

₁₁Vanhu va vilela hi miri wa vona,

kambe i vito lero biha ra vadyohi leri nga ta lova.

₁₂Sirhelela vito lerinene ra wena, loko u file ri ta tsundzukiwa

ku tlula magidi ya xuma xa nsuku.

₁₃Vutomi lebyinene byi hatla byi hundza,

kambe vito lerinene ri ta tsundzukiwa hilaha ku nga heriki.

₁₄Vana vanga, endlani leswi ndzi mi dyondzisaka swona, kutani mi ta hanya hi ku rhula.

Vutlhari lebyi tumbetiweke ni xuma lexi nga voniwiki a swi pfuni nchumu.

₁₅Munhu loyi a fihlaka vuphukuphuku bya yena

ú antswa ku tlula loyi a tumbetaka vutlhari bya yena.

₁₆Vana vanga, ndzi yingiseni,

ndzi ta mi kombisa nkarhi lowu mi fanelaka ku khomiwa hi tingana,

hikuva a hi minkarhi hinkwayo ti lavekaka.

₁₇Chavani ku endla manyala emahlweni ka vatswari va n'wina

ni ku hemba emahlweni ka vafumi ni vakulukumba.

₁₈Nyumani ku va ni nandzu emahlweni ka muavanyisi,

ni ku tshova nawu enhlengeletanweni ya vanhu va tiko,

ni ku kanganyisa nakuloni ni munghana.

₁₉Mi va ni tingana ku yiva swa vaakelani,

ni ku tshova switshembiso.

Nyumani makwanga eku dyeni,

ni ku khonondza loko mi amukela ni ku nyikela.

₂₀Mi va ni tingana ku miyela loko van'wana va mi xeweta,

ni ku languta wansati wa nghwavava,

₂₁ni ku alela vamakwenu lava kombelaka ku pfuniwa,

ni ku tekela munhu leswi swi nga swa yena,

ni ku navela nsati wa munhukuloni.

₂₂Nyumani ku titsakisa hi nandza wa yena wa xisati.

Mi nga tshuki mi ya esangwini ra yena.

Chavani ku rhukana vanghana va n'wina,

mi nga nyikeli mi ri karhi mi dzumadzuma.

₂₃Nyumani ni ku paluxa leswi mi swi twaka eswihundleni.

Hi yona minkarhi leyi mi faneleke ku khomiwa hi tingana,

kutani hinkwavo va ta mi xixima hikwalaho ka swona.