Siraka 37

₁Munhu un'wana ni un'wana ú kota ku

vula a ku: “Na mina ndzi munghana wa wena.”

Kambe vanhu van'wana i vanghana hi vito ntsena.

₂Loko munghana a hundzuka nala

ú vanga nhlomulo lowu lovisaka.

₃Wena ku navela loko biha, hikwalaho ka yini u tumbuluxiwile

ku tata misava hi mano ke?

₄Vanhu van'wana va tsaka ku va vanghana va wena loko swilo swa wena swi famba kahle,

kambe loko u ri emahlomulweni, va ku hundzukela.

₅Munghana loyi a tshembekaka ú ta ku pfuna ku lwa ni valala va wena,

a ku sirhelela eku lweni.

₆U nga tshuki u rivala munghana wo tano enyimpini,

avelana na yena minkateko ya wena.

₇Vanhu hinkwavo va nga nyika switsundzuxo,

kambe van'wana va endla sweswo hi ku titsakisa.

₈Tivonele loko munhu a ku nyika switsundzuxo,

lavisisa leswaku hi swihi leswi swi n'wi tsakisaka emhakeni ya kona,

hikuva kanyingi ú ehleketa ku titsakisa ntsena,

kutani a ku kungelela leswo biha.

₉A ku byela a ku: “Ndlela ya wena yi hlayisekile,”

kutani a yima ku vona leswi nga ta ku humelela.

₁₀U nga vutisani ni loyi a nga ku tshembiki,

u nga lavi switsundzuxo eka loyi a ku vondzokaka.

₁₁U nga tshuki u vutisa wansati switsundzuxo hi tlhelo ra nala wa yena.

U nga vutisani ni munhu wa vutoya hi ta nyimpi,

kumbe n'wamabindzu hi ta ku bindzula,

kumbe muxavi hi ta ku xavisa,

kumbe loyi a nga tivangiki ku nkhensa hi ta ku nkhensa,

kumbe munhu wa tihanyi hi ta ku twela van'wana vusiwana,

kumbe munhu wa vulolo hi ta ku tirha,

kumbe muthoriwa hi ta ku heta ntirho,

kumbe hlonga ra vulolo hi ta ku endla ntirho lowukulu.

Vanhu vo tano u nga va yingisi nikutsongo.

₁₂Kambe yingisa mukhongeri

loyi a hlayisaka milawu ya Xikwembu,

loyi a lavaka ku ku pfuna

ni ku ku twela vusiwana loko u hoxa.

₁₃Yingisa ni switsundzuxo swa mbilu ya wena,

ku hava leswi tlulaka yona hi ku tshembeka.

₁₄Moya wa wena wa ku vikela ku tlula varindzi va 7

lava yimaka exihondzweni xo leha.

₁₅Ngopfu-ngopfu khongela Loyi a nga henhla-henhla

leswaku a ku komba ndlela.

₁₆Masungulo ya mintirho hinkwayo

i ku ehleketa ni ku endla makungu.

_17-18Vunene ni vubihi, vutomi ni rifu

i swilo swa 4 leswi karhataka miehleketo,

hinkwaswo swi sungula emiehleketweni,

kutani swi lawula hi ku vulavula ka munhu minkarhi hinkwayo.

₁₉Munhu un'wana a nga va ni mano ya ku dyonzisa van'wana,

kambe a nga koti ku tidyondzisa.

₂₀Un'wana a nga tlhariha eku vulavuleni ka yena, kambe van'wana va n'wi venga,

kutani a pfumala swakudya,

₂₁hikuva a nga nyikiwanga ku twisisa hi Xikwembu,

ú kala ni miehleketo.

₂₂Un'wana ú tiehleketa a ri munhu wa vutlhari,

kutani a ku byela leswaku leswi a swi tivaka i ntiyiso.

₂₃Munhu wa vutlhari ú dyondzisa varikwavo,

kutani va tiva leswaku leswi a swi vulavulaka i ntiyiso.

₂₄Hinkwavo va ta n'wi dzunisa

ni ku vula leswaku ú katekile.

₂₅Vutomi bya munhu byi hlayiwa hi masiku,

kambe masiku ya tiko ra Israele i ntsandza-vahlayi hi ku tala.

₂₆Munhu wa vutlhari, vanhu va yena va ta n'wi tshemba,

ú ta tsundzukiwa hilaha ku nga heriki.

₂₇N'wananga, tikhome eku naveleni ka swakudya evutomini bya wena hinkwabyo,

u nga dyi leswi swi ku vavisaka.

₂₈Swakudya swo karhi a swi pfumeleleki eka vanhu hinkwavo,

a va tsakeli hinkwavo swakudya swihi na swihi.

₂₉U nga lavi ku dya swakudya swo hambana-hambana swo xawula,

u nga dyi hi makolo.

₃₀Loko u dya ku tlula mpimo, u ta vabya,

loko u dya minkarhi hinkwayo, u ta vaviseka endzeni.

₃₁Vanhu vo tala va dlayiwile hi makolo,

kambe loyi a dyaka hi ku ringana, ú ta engetela malembe ya yena.