Siraka 26

₁Ku katekile nuna wa wansati wo lulama,

masiku ya yena ma ta engeteleriwa.

₂Wansati wo tshembeka ú tsakisa nuna wa yena,

kutani nuna loyi ú ta hanya malembe ya yena hinkwawo hi ku rhula.

₃Wansati wo lulama i nkateko lowukulu,

hi yin'wana ya tinyiko leti Xikwembu xi ti nyikaka eka wanuna loyi a xi chavaka.

₄Hambiloko a fuwile kumbe a ri xisiwana,

ú ta tshama a tsakile minkarhi hinkwayo.

₅Ndzi chava swilo swinharhu leswi tlulaka rifu hi vubihi:

mahungundlela yo sandza ya muti, ni ku hlengeletana ka ntshungu, ni vumbhoni byo hemba.

Xilo xa vu-4 lexi xi ndzi chavisaka swinene

₆i wansati loyi a vondzokaka wansati-kulobye, la vavisaka mbilu ni ku vanga gome,

la holovaka ni vanhu hinkwavo.

₇Wansati wo homboloka i joko leri gudlagudlaka,

ku n'wi lawula swi fana ni ku khoma xipame.

₈Wansati loyi a pyopyiweke wa hlundzukisa,

a nga swi koti ku tumbeta manyala.

₉Wansati wa vuoswi ú vonaka

hi ku tsayita-tsayita matihlo.

₁₀Loko n'wana wa wena wa xisati a ome nhloko, n'wi hlayise swinene.

Handle ka swona ú ta endla hinkwaswo leswi a swi lavaka.

₁₁Loko a nga ku yingisi, tshama u ri karhi u n'wi rindza,

kutani u nga hlamali loko a ku khomisa tingana.

₁₂Ú ta etlela ni wanuna un'wana ni un'wana

loyi a n'wi navelaka,

a fana ni mufambi loyi a twaka torha,

kutani a nwa mati hinkwako laha a ma kumaka kona.

₁₃Wansati wa vumunhu ú tsakisa nuna wa yena,

vuswikoti bya yena bya n'wi tiyisa.

₁₄Wansati wo ka a nga vulavuli ngopfu i nyiko ya Xikwembu,

ku hava xilo xa nkoka xo fana ni ku tikhoma.

₁₅Wansati wo titsongahata ú engetela ntsako,

ku hava xikalo lexi nga pimaka nkoka wa moya wo tenga.

₁₆Vumbhuri bya wansati wo lulama endyangwini wa yena lowu a wu hlayisaka swinene,

byi fana ni dyambu leri vangamaka etilweni.

₁₇Nghohe ya yena yo xonga ni miri wa yena wo saseka,

swi fana ni rivoni leri vangamaka ehenhla ka xitlhoma-timboni lexo hlawuleka.

₁₈Milenge ya yena yo saseka ni mahlakala ya yena ya matimba,

swi fana ni tiphuphu ta nsuku leti tlhomiweke eka vutshamo bya silivhere.

₁₉[N'wananga hlayisa vuntshwa bya wena kahle,

u nga nyiki matimba ya wena eka vanhu vambe.

₂₀Tilavele nsimu yo nona exikarhi ka masimu ya rivala hinkwaro,

kutani byala eka yona mbewu ya wena leyi u yi tshembeke.

₂₁Hikokwalaho vana va wena va ta hanya,

va ta kula hi ku tshemba eka ndyangu lowunene wa vona.

₂₂Nghwavava yi nyenyiwa ku fana ni marhi,

wansati loyi a oswaka ú vangela varhandziwa va yena rifu.

₂₃Wanuna wo homboloka ú teka wansati wo homboloka,

kambe wanuna loyi a chavaka Xikwembu, ú teka wansati wa vukhongeri.

₂₄Wansati wo pfumala ku tikhoma ú titsakisa hi leswi khomisaka tingana,

kambe wansati wo titsongahata wa nyuma hambiloko a ri emahlweni ka nuna wa yena.

₂₅Wansati wo oma nhloko ú fana ni nkati,

kambe wansati wa vumunhu ú chava Xikwembu.

₂₆Wansati loyi a xiximaka nuna wa yena ú tiviwa a ri munhu wa vutlhari,

kambe loko a tikurisa a nga n'wi xiximi, ú ta tiviwa a ri lowo homboloka.

Ku katekile nuna wa wansati wo lulama,

malembe ya yena ma ta engeteleriwa.

₂₇Wansati wa pongo ni loyi a bokoxelaka

ú fana ni mhalamhala leyi yi biwaka enyimpini ku ya hlasela valala,

kutani wanuna loyi a nga ni nsati wo tano,

ú ta lwa nyimpi vutomi bya yena hinkwabyo.]

₂₈Ku ni swilo swimbirhi leswi swi ndzi tiselaka gome,

ni xa vu-3 lexi xi ndzi hlundzukisaka:

nhenha leyi hundzukeke xisiwana,

ni vanhu vo tlhariha lava nga xiximiwiki,

ni munhu wo lulama loyi a landzaka leswo biha,

Xikwembu xi ta n'wi avanyisela rifu.

₂₉Vamabindzu a va koti ku tshika ku endla leswo homboloka,

kutani vaxavisi hinkwavo va dyoha.