Siraka 24

₁Yingisani vutlhari! Byi tidzunisa exikarhi ka Vaisraele vanhu va byona.

₂Exikarhi ka ntshungu wa lava tshamaka emahlweni ka Loyi a nga henhla-henhla bya tikurisa,

emahlweni ka tintsumi ta xona byi ri:

₃“Ndzi rito leri vulavuriweke hi Loyi a nga henhla-henhla,

ndzi andlarile misava tanihi hunguva.

₄Ndzi tshamile etilweni,

xiluvelo xa mina xi ve emapapeni.

₅Ndzi tirhendzelekerile le vugimamusi,

ndzi fambile exidziveni xa lwandle.

₆Ndzi fuma magandlati hinkwawo ya lwandle, ni misava hinkwayo,

ni vanhu hinkwavo, ni matiko hinkwawo.

₇Hinkwako ndzi lavile ndhawu yo wisela eka yona,

laha ndzi nga ta aka kona.

₈Kutani Muvumbi wa swilo hinkwaswo ú ndzi lerisile,

loyi a ndzi vumbeke ú ndzi nyikile ndhawu ya ku tshama kona.

Ú ndzi byerile a ku: ‘Aka etikweni ra Israele,

vatukulu va Yakobo va ta va vanhu va wena.’

₉Khale loko misava yi nga si va kona ú ndzi vumbile,

kutani ndzi ta va kona hilaha ku nga heriki.

₁₀Ndzi n'wi tirherile eNtsongeni lowo Hlawuleka,

kavaloko ndzi aka entshaveni ya Siyoni.

₁₁Ú ndzi nyikile ndhawu ya ku aka kona emutini lowu a wu rhandzaka,

ni matimba ya ku fuma Yerusalema.

₁₂Kutani ndzi tshamiseka exikarhi ka vanhu vo xiximeka,

lava HOSI Xikwembu xi va hlawuleke ku va vanhu va xona.

₁₃Ndzi kurile ndzi leha tanihi mirhi ya kedari ya le Lebanoni,

ku fana ni mirhi ya kipresi ya le Hermoni,

₁₄ku kota mirhi ya mincindzu ya le Eni-Gedi,

ni swiluva swa mavalavala swa le Yeriko,

ni mirhi yo saseka ya mitlhwari ya le masin'wini,

ni mirhi ya mbatlu leyi byariweke kusuhi ni mati.

₁₅Ndzi nun'hwela swinene tanihi swinun'hweriso leswi: murhi wa ‘kasiya’, ni wa ‘sinamoni’,

ni mafurha ya nkoka wa ‘mirha’,

ni murhi wa ‘galibanumi’, ni wa ‘onika’, ni wa ‘sitakita’,

ni musi wa murhi wa risuna eNtsongeni lowo Hlawuleka.

₁₆Ndzi andlarile marhavi ya mina tanihi nkuhlu,

marhavi yo dzuneka ni ku saseka swinene.

₁₇Tanihi murhi wa vhinya ndzi rhumbukile hi ku xonga,

kutani swirhumbuko swa mina swi veka mihandzu yo tala yo nandziha swinene.

₁₈[Ndzi mana wa rirhandzu lero saseka, ni wa ku chava,

ni wa vutivi, ni wa ku tshemba loko hlawuleka;

ndzi hanya hilaha ku nga heriki,

kutani ndzi nyikiwa eka vana va mina hinkwavo lava HOSI Xikwembu xi va thyeke vanhu va xona.]

₁₉Tanani ka mina, n'wina mi ndzi lavaka,

mi dya mi xurha hi mihandzu ya mina.

₂₀Mi ta ndzi tsundzuka ndzi ri loyi a tsokombelaka ku tlula ni vulombe,

hambi byi ri lebyi tshonaka exihlengeni.

₂₁Loyi a dyaka swa mina, ú ta tlhela a swi dya,

loyi a nwaka swa mina, ú ta tlhela a swi nwa.

₂₂Loyi a ndzi yingisaka a nga ka a nga khomisiwi tingana,

a nga ka a nga dyohi, loyi a ndzi tirhelaka.”

₂₃Hinkwaswo leswi i buku ya ntwanano wa HOSI Xikwembu xa le henhla-henhla,

i Nawu lowu Muxe a hi nyikeke wona,

lowu wu nga ta va ndzhaka ya va ka Yakobo loko va hlanganile.

₂₄[Tiyani swinene minkarhi hinkwayo, mi namarhela HOSI Xikwembu,

leswaku xi ta mi tiyisa.

HOSI ya matimba hinkwawo hi yona ntsena yi nga Xikwembu,

ku hava muponisi un'wana handle ka yona.]

₂₅Nawu wu tele hi vutlhari tanihi milambu ya Pixoni na Tigrisi

yi talaka hi mati enkarhini wa ku tshovela mihandzu yo sungula.

₂₆Wu tele hi ku twisisa kukota leswi milambu ya Tigrisi na Yordani

yi talaka hi mati enkarhini wa ntshovelo.

₂₇Wu tele hi switsundzuxo tanihi milambu ya Nilo na Gihoni

yi talaka hi mati enkarhini wo kha mihandzu ya vhinya.

₂₈Tanihi loko munhu wo sungula a nga tivanga vutlhari swinene,

ni loyi wa makumu a nga ka a nga byi twisisi.

₂₉Miehleketo ya byona yi tlula lwandle hi ku anama ka yona,

makungu ya byona ma tlula xidziva xa lwandle hi ku enta ka wona.

₃₀Ndzi ehleketile leswaku ndzi fana ni ndlela leyi boxiweke,

leyi yisaka mati ya nambu entangeni.

₃₁Kutani ndzi te: “Ndzi ta cheleta ntanga wa mina wa mirhi yo tala ya mihandzu ya tinxakaxaka,

ndzi ta tsakamisa ntanga wa mina wa swiluva,”

kambe ndlela leyi boxiweke ku yisa mati ya xihlovo entangeni, yi hundzukile nambu,

kutani nambu wu hundzukile lwandle.

₃₂Ndzi ta endla nakambe leswaku dyondzo ya mina yi vangama tanihi dyambu loko ri xa,

kutani rivoningo ra yona ri ta voniwa ekule swinene.

₃₃Tanihi muprofeta loyi a ngheniweke hi moya ndzi ta paluxa swiletelo swa mina,

leswaku vanhu va minkarhi leyi taka va ta pfuniwa ha swona.

₃₄Tivani leswaku a ndzi endlanga hinkwaswo leswo nonon'hwa ku titirhela ntsena,

kambe ku pfuna hinkwavo lava navelaka vutlhari.