Siraka 22

₁Munhu wa vulolo ú fana ni ribye leri thyakisiweke,

hinkwavo va n'wi sola emahlomulweni ya yena.

₂Ú kotisa vulongo,

lava va byi khomaka, va byi n'watseka byi suka emavokweni ya vona.

₃Swi ni tingana ku va tata wa n'wana wa xinuna wo pfumala mahanyelo lamanene,

naswona ku kuma n'wana wa xisati i ku lahlekeriwa.

₄Nhwana wa miehleketo ú tikumela nuna,

kambe loyi wa vusopfa ú vangela tata wakwe nhlomulo.

₅Nhwana la pfumalaka xichavo ú khomisa tatana ni nuna tingana,

kutani havambirhi va ta n'wi sola.

₆Ku vulavula ni vana hi nkarhi lowu nga fanelangiki, swi fana ni ku tsaka ni ku yimbelela emaxangwini,

kambe ku biwa ni ku layiwa i vutlhari minkarhi hinkwayo.

₇Loyi a dyondzisaka xiphukuphuku ú fana ni loyi a damarhetaka swirhengele,

ú kotisa ni la pfuxaka mukhudzeheri evurhongweni lebyikulu.

₈Loyi a byelaka xiphukuphuku mhaka, ú yi rungulela munhu loyi a etleleke;

kutani emakumu xi ta ku: “I ncini?”

₉[Vana lava kurisiwaka hi mahanyelo lamanene,

a va nga kombi vusiwana bya vatswari va vona.

₁₀Vana lava nga kurisiwangiki kahle, lava tiarisaka ni ku tikurisa,

va nyamisa vunganakana bya rixaka ra ka vona.]

₁₁Rilela vafi hikuva va pfumala ku vonakala,

rilela ni xiphukuphuku hikuva xi pfumala miehleketo.

U nga rileli ngopfu vafi hikuva va tiwiserile;

kambe vutomi bya xiphukuphuku byi tlula rifu hi ku biha.

₁₂Hi rila vafi masiku ya 7,

kambe xiphukuphuku ni muhomboloki hi va rila vutomi bya vona hinkwabyo.

₁₃U nga vulavuli ngopfu ni xiphukuphuku,

xiphunta u nga xi endzeli.

Tivonele eka swona, swi nga ta ku karhata,

kutani swi ku nyamisa loko u tihlanganisa na swona.

Swi papalate, kutani u ta kuma ku rhula,

u nga ka u nga karhatiwi hi vuphukuphuku bya swona.

₁₄Xana i ncini xi tikaka ku tlula ntsopfu?

Vito ra xona i ncini handle ka “xiphukuphuku.”

₁₅Sava, ni munyu ni nsimbhi

swa olova ku swi rhwala, ku tlula ku rhwala la kalaka mano.

₁₆Phuphu leyi boheleriweke yi tiya eka muako,

yi nga ka yi nga hlekahlekisiwi hi ndzinginiko wa misava;

swi tano ni munhu wa miehleketo la tiyisiweke hi switsundzuxo leswinene,

a nga ka a nga chavi enkarhini wa mahlomulo.

₁₇Loyi a anakanyaka hi vutlhari,

ú fana ni khumbi ro tiya leri khavisiweke swinene.

₁₈Maribye lamatsongo lama vekiweke henhla ka khumbi,

ma nga ka ma nga tiyiseli bubutsa;

swi tano ni le ka ntlunya wa vutoya,

wu nga ka wu nga yimi wu tiya loko wu chavisiwa.

₁₉Loyi a titlhavaka tihlo, ú ta rila,

la twisaka un'wana ku vava, ú ta humesa ku titwa ka mbilu ya yena.

₂₀Loyi a hoxaka tinyanyana hi maribye, ú ti chavisa ti hangalaka;

la rhukanaka munghana, ú dlaya vunghana.

₂₁Loyi a lweke ni munghana wa yena,

a nga heli mbilu, ndlela ya ku pfuxa vunghana ya kumeka.

₂₂La holovelaka munghana wa yena,

a nga vileli, ku rivalelana swa koteka.

Kambe ku sola, ni ku sandza, ni ku paluxa swihundla, ni ku xenga,

swi herisa vunghana.

₂₃Tikumele ku tshembeka eka muakelani loko a ha ri xisiwana,

kutani u ta tsaka na yena loko a fuwa.

Yima na yena loko a ri emahlomulweni,

u ta averiwa minkateko ya yena.

₂₄Nkahelo ni musi swi rhangela ndzilo,

ku dlaya swi rhangeriwa hi ndzhukano.

₂₅Ndzi nga ka ndzi nga nyumi ku sirhelela munghana,

a ndzi nga n'wi aleri loko a ndzi kombela ku n'wi pfuna.

₂₆Kambe loko ndzo vaviseka hikwalaho ka yena,

un'wana ni un'wana loyi a swi twaka ú ta tivonela eka yena.

₂₇Ndzi navela murindzeli la yimaka emahlweni ka mina,

leswaku a ta lema milomu ya mina hi xilemo xa vutlhari.

Leswi swi ta ndzi sirhelela eku dyoheni,

swi ta sivela ririmi ra mina ku ndzi lovisa!