Siraka 19

₁Mutirhi wa xidakwa a nga ka a nga fumi;

loyi a tsan'waka swilo leswitsongo ú ta tsandzeka hakatsongo-tsongo.

₂Vhinyo ni vavasati swi hambukisa vavanuna vo tlhariha,

wanuna la hanyaka ni tinghwavava ú kala mahanyelo.

₃Ku bola ni swivungu swi ta n'wi herisa,

a tekeriwa ni moya wa yena lowo biha.

₄Loyi a hatlisaka ku tshemba van'wana i xiphukuphuku,

loyi a dyohaka wa tivavisa.

₅Loyi a titsakisaka hi vubihi ú ta avanyisiwa,

[kambe loyi a tshikaka ku tiphina, ú ta ponisiwa.

₆Loyi a tikhomaka eku vulavuleni, ú ta hanya handle ka mikitsikitsi.]

Loyi a vengaka ku hleva ú hunguta vubihi.

₇U nga tshuki u hangalasa leswi u swi tweke,

hikuva u nga ka u nga lahlekeriwi hi nchumu.

₈U nga boxi mhaka eka munghana kumbe eka nala,

u nga paluxi xihundla eka van'wana, handle ka loko u dyoha hi ku xi tumbeta.

₉Loyi a ku yingisaka ú ta swi hlayisa,

kutani ku ta fika nkarhi lowu a nga ta ku venga.

₁₀Loko u twile mahungu-ndlela, a ma helele eka wena.

Ma nga ka ma nga ku dlayi!

₁₁Hi ku byeriwa ku hlayisa xihundla, xiphukuphuku xi twa ku vava

tanihi wansati loyi a lun'waka.

₁₂Xihundla embilwini ya xiphukuphuku xi vavisa

tanihi nseve lowu tlhaveke ndzhumbhi.

₁₃Loko u twile leswaku munghana wa wena ú dyohile, n'wi vutise, kumbexana a nga dyohanga;

kutani loko a dyohile, a nga ha tlheli a dyoha.

₁₄Loko u twile leswaku muakelani ú paluxile xihundla eka van'wana, n'wi vutise, kumbexana a nga swi endlanga;

kutani loko a swi endlile, a nga engeti a swi endla.

₁₅Loko u twa van'wana va ri karhi va lumbeta munghana wa wena, n'wi vutise, hikuva hakanyingi vo n'wi onha vito.

Kutani u nga tshiki u pfumela hinkwaswo leswi u swi twaka.

₁₆Munhu a nga hoxa hi ku vulavula, a nga tiyimiselanga.

Xana i mani loyi a nga si tshamaka a dyoha hi ririmi ra yena ke?

₁₇Loko u twa leswi swi ku hlundzukisaka eka muakelani, n'wi vutise, u nga si n'wi chavisa.

Tshikela mhaka leyi eka nawu wa Loyi a nga henhla-henhla, [naswona u nga hlundzuki.

₁₈Masungulo ya ku amukeriwa hi Xikwembu i ku xi chava,

kutani vutlhari byi kuma rirhandzu ra xona.

₁₉Vutivi bya milawu ya Xikwembu i xichavo lexi nyikaka vutomi.

Lava endlaka leswi swi tsakisaka Xikwembu, va dya mihandzu ya nsinya wa vutomi lebyi nga heriki.]

₂₀Ku chava Xikwembu i vutlhari minkarhi hinkwayo.

Vutlhari byi hetisisa nawu wa xona, [byi tiva ni matimba lamakulu ya xona.

₂₁Loko nandza a byela n'wini wa yena a ku:

“Ndzi ala ku endla leswi u ndzi lerisaka swona”,

kambe endzhaku a swi endla,

ú hlundzukisa loyi a n'wi hlayisaka.]

₂₂Ku tiva vubihi hinkwabyo a hi vutlhari,

a ku na mianakanyo leyinene laha vadyohi va bohaka makungu kona.

₂₃Ku ni vutlhari bya manyala,

ni swiphukuphuku leswi pfumalaka mianakanyo.

₂₄Munhu la chavaka Xikwembu, hambiloko a nga tlharihanga swinene,

ú tlula munhu wo tlhariha swinene la tlulaka nawu wa Xikwembu.

₂₅Ku ni vutlhari bya xiyimo xa le henhla lebyi endlaka leswo homboloka,

ni vanhu lava gombonyokisaka ntirho wa tintswalo leswaku va ta hlula etimhakeni.

₂₆Ku ni mbabva leyi khunarhaka onge yi le ku rileni,

kasi embilwini yi tele vuxisi.

₂₇Yi tumbeta xikandza xa yona yi endla onge a yi ku twi;

kambe loko u nga ehletekanga nchumu, yi ta ku hlasela.

₂₈Loko yi tsandzeka ku dyoha hi ku pfumala matimba,

yi ta endla leswo biha loko yi kuma nkarhi.

₂₉Munhu ú tiviwa hi xivumbeko xa yena;

kutani munhu la hlayisaka nawu, ú tikomba hi xikandza xa yena.

₃₀Swiambalo swa yena, ni mahlekele ya yena, ni mafambele ya yena,

swi komba leswi a nga xiswona.