Siraka 10

₁Mufumi la tlhariheke ú letela vanhu va yena,

kutani ú va fuma hi nawu.

₂Tihosana ta yena hinkwato ni vanhu va yena hinkwavo

va fana na yena.

₃Hosi ya tiko leyi pfumalaka nawu yi ta onha vanhu va yona,

kambe mfumo wu ta tiyisiwa loko vinyi va wona va tlharihile.

₄Matiko ya misava hinkwayo ma le mavokweni ya Xikwembu,

kutani xi ta veka vafumi va wona lava faneleke hi nkarhi wa kona.

₅I Xikwembu lexi tlakusaka vafumi,

hi xona lexi endlaka leswaku tihosana hinkwato ti fundzheka.

₆U nga hlundzukeri munhukuloni hikwalaho ka swihoxo swa yena.

U nga rhukani van'wana.

₇Ku tikukumuxa ni ku homboloka swi vengiwa

hi Xikwembu ni vanhu.

₈Ku homboloka, ni ku tikukumuxa, ni rifuwo swi herisa matimba ya matiko man'wana,

man'wana swi ma tlakusa.

₉Kambe hikwalaho ka yini munhu a fanele ku tikukumuxa, leswi a ngo va ntshuri ni nkuma ntsena,

ni miri wa yena wu bolaka a ri karhi a hanya ke?

₁₀Vuvabyi bya nkarhi wo leha byi tsandza vatshunguri,

hosi ya tiko yi nga va yi hanya namuntlha, kambe mundzuku yi nga fa.

₁₁Swivungu, ni tinhongana, ni swifufununu

swi va leswi a kumaka swona.

₁₂Ku tikukumuxa ku sungula loko munhu a fularhela Mutumbuluxi wa yena.

₁₃Masungulo ya ku tikukumuxa i xidyoho,

kutani la tshamelaka ku xi endla, ú ta tala hi vuhomboloki.

Hikokwalaho HOSI Xikwembu xi ta ba

ni ku herisa lava tikukumuxaka.

₁₄Xi susile tihosi eswiluvelweni swa tona,

kutani xi tlakusile lava titsongahataka ematshan'wini ya tona.

₁₅Xi hangalasile tinxaka tin'wana,

kutani xi nyikile vanhu vambe matiko ya tona.

₁₆Xi hlaserile ni ku hlula matiko man'wana,

xi ma herisela makumu.

₁₇Kutani ma nyamalala,

ku hava loyi a ha ma tsundzukaka.

₁₈Mutumbuluxi a nga rhandzanga ni siku ni rin'we

leswaku vanhu va tikukumuxa ni ku vanga mpfilumpfilu.

₁₉Xana i vamani lava fanelaka ku fundzhiwa?

I vanhu, hikuva lava chavaka Xikwembu hi vo vanhu.

Xana i vamani lava nga faneriki ku fundzhiwa?

I vanhu, hikuva lava tlulaka milawu na vona i vanhu.

₂₀Murhangeri ú fanele ku fundzhiwa hi lava va n'wi landzaka,

kutani HOSI Xikwembu xi fundzha lava va xi chavaka.

₂₁[Masungulo ya minkateko i ku chava HOSI Xikwembu,

kambe ku tiarisa ni ku tikurisa swi vanga ku pfumala.]

₂₂Swigwili, ni lava tivekaka swinene, ni swisiwana,

hinkwavo va tidzunisa hikuva va chava Xikwembu.

₂₃A swi lulamanga ku langutela ehansi xisiwana lexi tlhariheke,

naswona ku fundzha muhomboloki, a swi fanelanga.

₂₄Vakulukumba, ni vafumi, ni vaavanyisi va nga ha fundzhiwa,

kambe ku hava ni un'we wa vona loyi a tlulaka munhu la chavaka HOSI Xikwembu.

₂₅Vantshunxiwa va ta tirhela hlonga leri tlhariheke,

kambe loko va ri vanhu lava twisisaka, va nga ka va nga vileri.

₂₆U nga tshuki u kombisa vutlhari bya wena loko u ri karhi u tirha,

kumbe ku tikurisa loko u ri eku pfumaleni.

₂₇Munhu loyi a tirhaka, a ri ni leswo tala,

ú tlula loyi a tikukumuxaka, kasi ú etlela ni ndlala.

₂₈N'wananga, titwe u ri munhu, kambe u titsongahata,

u tidzunisa hi leswi u nga na swona.

₂₉A ku na munhu loyi a nga seketelaka la tionhaka,

ku hava ni loyi a nga fundzhaka la sorisaka vutomi bya yena.

₃₀Xisiwana xi fundzhiwa hikwalaho ka vutivi bya xona,

kasi mufuwi ú dzunisiwa hikwalaho ka rifuwo ra yena.

₃₁La fundzhiwaka evusiwaneni bya yena, ú ta dzunisiwa ku tlurisa loko a fumile.

La soriwaka loko a fumile, ú ta sandziwa ku tlurisa loko a hundzukile xisiwana.