Rhuti 3

₁Siku rin'wana Nahumi n'wingi wa Rhuti a ku ka yena: “N'wananga, xana ndzi nge ku laveli muti lowu u nga ta kota ku tshamiseka eka wona ke? ₂Xana Bowazi loyi u tirheke ni malandza ya yena ya xisati, a hi xaka ra hina ke? Yingisa! Loko ri rhengile, Bowazi ú ta va eku huleni ka maxalana exivuyeni. ₃Kutani ke, hlamba u tola mafurha, u funengela minceka ya wena, u rhelelela exivuyeni. Kambe u nga tikombi eka wanuna loyi, ku kondza loko a heta ku dya ni ku nwa. ₄Kutani loko a ya eku etleleni, xiyaxiya u tiva ndhawu leyi a wisaka ka yona, kutani u ya kona, u funungula nkumba emilengeni ya yena, kutani u etlela. Yena ú ta ku hlamusela leswi u fanelaka ku endla swona.” ₅“Ndzi ta endla hinkwaswo leswi u ndzi byelaka swona”, ku hlamula Rhuti.

₆Kutani Rhuti a rhelela a ya exivuyeni, a endla hinkwaswo hilaha n'wingi wa yena a n'wi leriseke hakona. ₇Loko Bowazi a hetile ku dya ni ku nwa, a titwa a tsakile, kutani a ya etlela etlhelo ka nhulu ya minchocho. Kutani Rhuti a ta khwatsi, a funungula nkumba emilengeni ya Bowazi, kutani a etlela. ₈Exikarhi ka vusiku, wanuna loyi a pfuka hi ku twa xirhami, a korhama ku ambamba nkumba, kutani a hlamula ku kuma wansati loyi a etleleke hi le milengeni ya yena. ₉“Hi wena mani?” ku vutisa Bowazi. “Hi mina nandza wa wena Rhuti”, ku hlamula loyi wansati, “ndzi tiveka emavokweni ya wena, hikuva wena u mudyandzhaka evukatini bya mina.” ₁₀“HOSI a yi ku katekise n'wananga”, ku vula Bowazi, “ku tshembeka ka wena ka sweswi ku tlula loko sungula, hikuva a wu tsakelanga majaha, hambi ya swifumi kumbe ya swisiwana. ₁₁Sweswi n'wananga, rhula mbilu, ndzi ta ku endlela hinkwaswo leswi u swi kombelaka, hikuva u wansati wo xiximeka, hilaha vaaki hinkwavo va muti wa ka hina va swi tivaka hakona. ₁₂Mina ndzi un'wana wa vadyandzhaka va le vukatini bya wena, sweswo i ntiyiso; kambe ku ni un'wana wa xaka ra hina la ndzi rhangelaka. ₁₃Wisa kwala vusiku lebyi, kutani nimixo loko munhu loyi a nkhensa ku ku hlayisa hi mukhuva wa ndzhaka, swi ta va swi sasekile, a a ku hlayise. Kambe loko a nga swi tsakeli, ndzi tiyisa emahlweni ka Xikwembu lexi hanyaka leswaku mina ndzi ta ku hlayisa. Sweswi, etlela ri ko ri xa.”

₁₄Rhuti a etlerisa sweswo hi le milengeni ya Bowazi, ri ko ri xa. Kutani a hatla a pfuka, ka ha ri vusiku. “Swi nga tshuki swi tiviwa hi munhu leswaku wansati loyi ú tile laha xivuyeni”, ku vula Bowazi a ri yexe. ₁₅Kutani a ku ka Rhuti: “Tisa nceka lowu u nga wu funengela, u kangatela hi wona.” Rhuti a endlisa sweswo. Hiloko Bowazi a n'wi nusela mimpimo ya 6 ya maxalana, a n'wi rhwexa, kutani Rhuti a tlhelela emutini. ₁₆Loko a fika, n'wingi wa yena a n'wi vutisa a ku: “Swi fambise ku yini n'wananga?” Hiloko Rhuti a n'wi hlamusela hinkwaswo leswi wanuna luya a n'wi endleleke swona, ₁₇kutani a ku: “Mimpimo leyi ya 6 ya maxalana, ndzi nyikiwile hi yena, hikuva ú vurile leswaku ndzi nga tlheleli eka n'wingi wa mina ndzi nga khomanga nchumu.” ₁₈Hiloko Nahumi a byela Rhuti a ku: “Miyela n'wananga, u kondza u vona leswi mhaka yi nga ta herisa swona. Hikuva wanuna loyi a nga ka a nga rhuli mbilu namuntlha, a nga si heta mhaka leyi.”