Rhuti 2

₁Nahumi a a ri ni xaka ra nuna wa yena, nkulukumba wa xifumi, wa ndyangu wa ka Elimeleke, vito ra yena a a ri Bowazi. ₂Rhuti wa le Mowabu a kombela eka Nahumi a ku: “Ndzi pfumelele ku ya emasin'wini, ndzi ya khwaja minchocho eka un'wana ni un'wana loyi a nga ta ndzi komba tintswalo.” “Famba n'wananga”, ku hlamula Nahumi. ₃Hiloko Rhuti a suka a famba a ya emasin'wini, a ya khwaja hi le ndzhaku ka vatshoveri. Kutani o tshuka a humelela eka ndzima ya nsimu leyi a yi ri ya Bowazi, wanuna wa ndyangu wa ka Elimeleke. ₄Hi nkarhi wolowo, Bowazi a ta hi le Betlehema, a xeweta vatshoveri a ku: “HOSI a yi ve na n'wina.” Kutani va hlamula va ku: “HOSI a yi ku katekise.” ₅Kutani Bowazi a vutisa nandza wa yena loyi a a langutisa vatshoveri, a ku: “Nhwana loyi i wa ka mani ke?” ₆“Nhwana loyi i wa le Mowabu; wa ha ku vuya na Nahumi hi le tikweni ra Mowabu”, ku hlamula mulanguteri. ₇“Ú komberile a ku: ‘Mi nga ndzi pfumelela ku khwaja hi le ndzhaku ka vatshoveri, ndzi hlengeleta masalelwa exikarhi ka tinhulu ke?’ Kutani ú tile, naswona a nga tshikanga ku tirha ku sukela nimixo ku fikela sweswi, ni ku wisa wonge a nga wisanga.”

₈Hiloko Bowazi a ku ka Rhuti: “Ndzi yingise n'wananga: U nga yi u ya khwaja ensin'wini yin'wana, kumbe ku suka eka leyi, kambe sala malandza ya mina ya xisati hi le ndzhaku. ₉Langutisa laha vavanuna va tshoveleka kona, u va landza. Ndzi lerisile malandza leswaku ma nga ku karhati. Loko u twa torha, famba u ya nwa mati emakhuwaneni lama nga tatiwa hi malandza.” ₁₀Kutani Rhuti a wela ehansi hi mombo, a titsongahata emahlweni ka Bowazi, a ku: “Swi endlekise ku yini leswaku u ndzi komba tintswalo leto tano, hi ku ndzi amukela ke, kasi ndzi wa rixaka rimbe!” ₁₁Bowazi a hlamula a ku: “Ndzi byeriwile hinkwaswo leswi u nga swi endla ku pfuna n'wingi wa wena, ku sukela loko nuna wa wena a file. Va ndzi byele hilaha u sukeke hakona eka tata wa wena ni mana wa wena, ni ka tiko leri u nga velekiwa eka rona, ku ta tshama ni vanhu lava u nga va tiviki nikutsongo. ₁₂HOSI Xikwembu a xi ku katekise hi mintirho leyi ya wena. Xona Xikwembu xa Israele lexi u teke ku ta hlayisiwa hi xona, a xi ku nyike hakelo hi ndzalo.” ₁₃“Hakunene n'wini wanga”, ku hlamula Rhuti, “u ndzi kombile tintswalo letikulu ni ku ntshunxa moya wa mina; naswona u vulavurile khwatsi na mina nandza wa wena, hambileswi ndzi nga riki un'wana wa malandza ya wena ya xisati.”

₁₄Hi nkarhi wo dya, Bowazi a ku ka Rhuti: “Tana haleno, u phema na mina, u xeva hi murhu lowu.” Kavaloko Rhuti a tshama etlhelo ka vatshoveri, kutani Bowazi a n'wi nusela tindzhoho leti oxiweke. Rhuti a dya a xurha, a tlhela a siya. ₁₅Loko a tlhelerile eku khwajeni, Bowazi a lerisa malandza ya yena a ku: “Manana loyi, a nga khwaja hinkwako hambi exikarhi ka tinhulu. Mi nga n'wi karhati. ₁₆Naswona mi pambula minchocho yin'wana eka leswi mi nga swi tshovela, mi yi siya leswaku a sala a yi khwaja. Mi nga n'wi holoveli!”

₁₇Rhuti a khwaja ensin'wini ri ko ri pela, kutani loko a hula leswi a swi khwajeke swi lava ku tata xisakana. ₁₈Hiloko a rhwala a tlhelela emutini, kutani a komba Nahumi n'wingi wa yena leswi a swi khwajeke. Rhuti a humesa ni swakudya leswi a a swi siyile loko a dya, kutani a nyika Nahumi. ₁₉“Namuntlha a wu khwaja kwihi ke”, ku vutisa n'wingi wa Rhuti, “u tirhile eka mani? Minkateko a yi ve ni wanuna loyi a ku amukeleke.” Kutani Rhuti a hlamusela n'wingi wa yena leswaku ú tirhe na vamani, a engeta a ku: “Wanuna loyi ndzi nga tirha eka yena namuntlha, vito ra yena i Bowazi.” ₂₀“HOSI a yi n'wi katekise munhu loyi”, ku vula Nahumi, “hikuva ú komba ku tshembeka eka lava hanyaka ni ka lava feke.” Nahumi a engeta a ku: “Hi van'we ni wanuna loyi, naswona i un'we wa vadyandzhaka endyangwini lowu.” ₂₁“Tlhandlakambirhi”, ku vula Rhuti wa le Mowabu, “ú ndzi lerisile leswaku ndzi sala malandza ya yena hi le ndzhaku, va ko va heta ku tshovela.” ₂₂Kutani Nahumi a ku ka n'wingi wa yena Rhuti: “Swi sasekile n'wananga loko u famba swin'we ni malandza ya xisati ya munhu loyi, hikuva loko u ya ensin'wini yin'wana va nga tshuka va ku karhata.” ₂₃Kutani Rhuti a sala malandza ya xisati ya Bowazi hi le ndzhaku, a khwaja ku kondza va heta ku tshovela maxalana ni koroni; kambe ku tshama a a tshama eka n'wingi wa yena.