Varhoma 2

₁Loko swi ri tano, wena munhu la avanyisaka van'wana, a wu na ku tilandzula, hambi u nga va mani kumbe mani, hikuva loko u ri karhi u avanyisa van'wana, na wena wa tiavanyisa, leswi wena muavanyisi wa van'wana, u endlaka swo leswi vona va swi endlaka. ₂Ha swi tiva leswaku Xikwembu a xi hoxi loko xi avanyisa lava endlaka leswo tano. ₃Wena munhu la avanyisaka lava endlaka leswo tano, wa swi endla na wena! Xana u anakanya leswaku u ta pona eku avanyiseni ka Xikwembu xana? ₄Kumbe, xana u sola vukulu bya nsovo wa xona, ni bya ku tsetselela ka xona, ni bya mbilu ya xona yo leha ngopfu, u nga tivi leswaku vunene lebyi bya Xikwembu byi ku kokotelela eku hundzukeni, xana? ₅Hi mbilu ya wena leyo nonon'hwa, leyi nga laviki ku hundzuka, u tihlengeletela vukari lebyi byi nga ta ku wela hi siku lero chavisa, leri ku avanyisa loku lulameke ka Xikwembu ku nga ta humelela ha rona. ₆Hikuva xona xi rihisela un'wana ni un'wana hi ku ya hi mintirho ya yena: ₇Lava tiyiselaka ku endla leswinene, va ri karhi va navela ku va lava kwetsimaka ni lava dzunekaka ni lavo ka va nga ha fi, Xikwembu xi ta va nyika vutomi lebyi nga heriki; ₈kambe lava nga ni moya wa ku tirhandza, va alaka ntiyiso, va fambaka hi ku homboloka, xi ta va hlundzukela ni ku va karihela. ₉Maxangu ni nhlomulo swi ta wela vanhu hinkwavo lava endlaka leswo biha, ku sungula hi Vayuda, ku yisa eka vamatiko; ₁₀kambe ku kwetsima, ni ku dzuneka, ni ku rhula, ku ta nyikiwa hinkwavo lava endlaka leswinene, ku sungula hi Vayuda, ku yisa ni ka vamatiko; ₁₁hikuva Xikwembu a xi yi hi nghohe.

₁₂Hinkwavo lava dyoheke va nga ri ehansi ka Nawu, va ta lovisa sweswo, va nga ri ehansi ka Nawu; hinkwavo lava dyoheke va ri ehansi ka Nawu, va ta avanyisiwa hi wona Nawu. ₁₃Hikuva a hi vatwi va Nawu lava voniwaka va ri lava lulameke emahlweni ka Xikwembu, kambe lava fambaka hi ku lerisa ka wona, hi vona lava nga ta hlayiwa leswaku va lulamile. ₁₄Loko vamatiko lava nga riki na Nawu, va endla hi ku tumbuluka ka vona leswi Nawu wu lerisaka swona, va tivekela nawu hi voxe, hambiloko va nga ri na Nawu. ₁₅Va kombisa leswaku leswi Nawu wu lerisaka swona, swi tsariwile etimbilwini ta vona; ripfalo ra vona ri tiyisa sweswo, hambi yi ri miehleketo ya vona, loko yi kanetana, yi va veka nandzu kumbe yi yima na vona; ₁₆swi ta va tano hi siku leri Xikwembu xi nga ta avanyisa swihundla swa vanhu ha Yesu Kriste, hilaha Evhangeli leyi ndzi yi dyondzisaka yi vulaka hakona.

₁₇Wena ke la tivulaka Muyuda, wena u tshembeke Nawu, u tidzunisaka hi Xikwembu, ₁₈wena u tivaka ku rhandza ka xona, u tivaka ku xiya timhaka leti tlulaka tin'wana hi vunene, hileswi u dyondzisiweke hi Nawu, ₁₉wena u kholwaka leswaku u mufambisi wa lavo-fe-mahlo ni ku vonakala ka lava nga munyameni, ₂₀wena u kholwaka leswaku u muleteri wa lava nga tiviki nchumu, ni mudyondzisi wa swihlangi, hileswi u nga ni dyondzo ya xiviri, ya vutivi ni ya ntiyiso, eNawini, ₂₁wena ke la dyondzisaka van'wana, a wu tidyondzisi xana? Wena la vulaka leswaku ku nga tshuki ku yiviwa, a wu yivi ke? ₂₂Wena la nge: “Ku nga tshuki ku oswiwa”, a wu oswi ke? Wena la nyenyaka swikwembu swa hava, a wu yivi swa le titempeleni ke? ₂₃Wena la tidzunisaka hi Nawu, xana a wu sorisi Xikwembu loko u tlula Nawu wolowo ke? ₂₄Hikuva vito ra Xikwembu ri soriwa exikarhi ka vamatiko hinkwavo hikwalaho ka n'wina, hilaha Matsalwa ma vulaka hakona.

₂₅Swa twala leswaku ku yimba ka pfuna, loko u hlayisa Nawu; kambe loko u tlula Nawu, ku yimba ka wena ku to fana ni loko u nga yimbanga. ₂₆Kambe loko munhu la nga yimbangiki a hlayisa swileriso swa Nawu, ú ta hlayiwa la yimbeke, hambiloko a nga yimbanga. ₂₇Kutani loko munhu la nga yimbangiki a famba hi Nawu, ú ta ku avanyisa wena la tlulaka Nawu, hambiloko u ri ni leswi tsariweke swa Nawu, kumbe hambi u yimbile. ₂₈Ku va Muyuda wa xiviri, a swi tikombi hi le handle ntsena; ni ku yimba ka xiviri, a ku vonaki ehandle, emirini. ₂₉Kambe Muyuda wa xiviri, hi loyi a nga yena exihundleni xa mbilu, ni ku yimba ka xiviri, i ku yimba ka mbilu, loku endliwaka emoyeni, ku nga ri hi leswi tsariweke swa Nawu; ku dzunisiwa ka munhu loyi a ku humi ka vanhu, kambe ku huma eka Xikwembu.