Pisalema ya 87

₁HOSI Xikwembu xi simekile muti wa Siyoni

entshaveni leyo hlawuleka,

₂xi rhandza muti lowu ni tinyangwa ta wona

ku tlula miti leyin'wana ya va ka Yakobo.

₃Leswi vanhu va swi vulaka ehenhla ka wena we muti wa Xikwembu,

a hi ku saseka ka swona!

₄Xikwembu xi ri:

“Exikarhi ka lava va ndzi tivaka, ndzi ta katsa va le Egipta ni va le Babilona;

swi ta va tano ni Vafilista ni va le Tiri ni va le Etiyopiya.

Vanhu va ta ku: ‘Munhu wo karhi ú velekiwile etikweni ro karhi.’

₅Kambe loko wu ri muti wa Siyoni,

va ta ku: ‘I kaya ra munhu un'wana ni un'wana,

hikuva Xikwembu xa le henhla-henhla hi xona xi wu tiyisaka!’ ”

₆HOSI Xikwembu xi le ku longoloxeni ka mavito ya vanhu va matiko hinkwawo,

kutani xi ri:

“Na vona lava, emutini wa Siyoni hi le kaya ka vona!”

₇Kutani vona va cina ni ku yimbelela, va ku:

“Timitsu ta hina hinkwato ti kwala ka wena!”