Pisalema ya 76

₁Etikweni ra Yuda, Xikwembu xa tiveka,

vito ra xona ra xiximiwa exiharhi ka Vaisraele.

₂Yerusalema i muti wa xona,

xi tshama entshaveni ya Siyoni.

₃Hi kona laha xi nga tshova swo lwa nyimpi ha swona,

yi nga miseve leyi pfurhaka, ni switlhangu ni matlhari.

₄We Xikwembu, u dzuneka ngopfu,

vukulu bya wena byi tlula ni tintshava ta khale.

₅Masocha lama tiyeke ma hlaseriwile ma ha etlele,

ma tekeriwa leswi a ma swi phanghile;

a ku vanga na nhenha na yin'we

leyi koteke ku tlakusa voko.

₆We Xikwembu xa Yakobo, u lo na va tshinya,

vo wela hansi ni tihanci ta vona.

₇We HOSI wa chavisa!

Loko u hlundzukile,

ku hava loyi a nga yimaka emahlweni ka wena.

₈U twarisa ku avanyisa ka wena u ri ehenhla tilweni,

kutani vanhu hinkwavo va tshuka, va tsandzeka ni ku vulavula,

₉hikuva wena Xikwembu, u tile ku ta avanyisa vanhu,

ni ku kutsula hinkwavo lava xanisekaka laha misaveni.

₁₀Hambi va ri va le Edomu va nga vanhu va tihanyi, va ta ku dzunisa,

masalela ya va ka Hamati ma ta ku endlela nkhuvo.

₁₁Tiboheni eka HOSI Xikwembu, mi humesa leswi mi nga hlambanya ku humesa swona;

hinkwavo lava va xi tirhelaka a va humese tinyiko,

va luva Xikwembu lexi xo chavisa.

₁₂Hi xona xi tsongahataka vatikukumuxi,

hambi ti ri tihosi ta laha misaveni ta rhurhumela emahlweni ka xona.