Pisalema ya 74

₁We Xikwembu, xana u hi tshikele yini?

U nga va u hi tshikele makumu xana?

Xana u hi hlundzukelela yini,

hina hi nga ntlhambi lowu u wu risaka, xana?

₂Anakanya vanhu va wena lava u nga tihlawulela vona ku sukela khale,

va nga lava u va kutsuleke leswaku va va ndzhaka ya wena.

Tsundzuka ni ntshava ya Siyoni leyi khale a wu tshama eka yona.

₃Famba-famba emarhumbini lawa ku nga khale ma ri kona,

hikuva valala va hina va onhile hinkwaswo exivandleni lexo hlawuleka.

₄Lava lwaka na wena va bile huwa endzeni ka Tempele ya wena;

va dzimile mijeko kona ku komba leswaku va hlurile.

₅A swi fana ni loko munhu

a ya nghena exihlahleni a tlakuse xihloka:

₆Mapulangi hinkwawo lama kevetliweke

va ma fayeterile hi swihloka ni tihamula.

₇Xivandla xa wena lexo hlawuleka va xi hisile,

va wisile ni ku fayetela yindlu leyi vito ra wena ri twarisiwaka eka yona.

₈Etimbilwini ta vona a va ku: “Hi ta va herisa!”

Kutani va hisile tindhawu hinkwato leti vanhu va ku khongelaka eka tona we Xikwembu.

₉A wa ha vonaki exikarhi ka hina, ni vaprofeta va nyamalarile,

kutani a ku na munhu exikarhi ka hina la tivaka leswaku swi ta hela rini.

₁₀We Xikwembu, xana valala va ta ku hlekula ku fikela rini,

xana lava lwaka na wena va ta ku sandza hilaha ku nga heriki xana?

₁₁U khondlela yini mavoko,

u alela yini ku hi lwela ke?

₁₂We Xikwembu, u mufumi wa hina ku sukela khale,

u hi ponisile ko tala laha misaveni.

₁₃U miyetile lwandle hi matimba ya wena,

swiharhi leswikulu swa le matini u swi fayile tinhloko,

₁₄Na Levhiyatani nyoka ya le lwandle u yi fayile nhloko,

u yi nyika swiharhi swa le mananga swi yi dya.

₁₅Hi wena u khulukiseke swihlovo ni swinambyana,

kambe milambu leyi a yi tshama yi ri karhi yi khuluka, u yi phyisile.

₁₆Vusiku byi le mavokweni ya wena, na wona nhlekanhi wu fumiwa hi wena,

u vekile dyambu ni tinyeleti etindhawini ta swona.

₁₇Misava hinkwayo yi pimiwile hi wena,

u endlile ximumu ni xixika.

₁₈We HOSI, tsundzuka leswaku valala va wena va ku sandza,

vatiarisi lava va tlanga hi vito ra wena.

₁₉U nga tshuki u pfumela leswaku vanhu lava u va rhandzaka va nyiketiwa eka swiharhi leswi;

swisiwana swa wena u nga swi rivali ni siku ni rin'we.

₂₀Tsundzuka ntwanano lowu u wu endleke na hina,

hikuva etindhawini leto tala laha tikweni ku tumbele vanhu va tihanyi.

₂₁U nga pfumeli leswaku lava xanisiwaka va tlhela ni tingana;

swisiwana ni vapfumari a va twarise vito ra wena.

₂₂We Xikwembu, suka u yima u vulavula hi wexe,

tsundzuka leswaku vatiarisi lava va le ku ku sandzeni minkarhi hinkwayo.

₂₃Twana huwa leyi vangiwaka hi valala va wena;

pongo leri va ri endlaka minkarhi hinkwayo, u nga ri bi hi makatla.