Pisalema ya 72

₁We Xikwembu, komba hosi ya tiko ndlela yo lulama,

u dyondzisa loyi vuhosi byi nga bya yena maavanyisele lamanene,

₂leswaku a avanyisela vanhu timhaka ta vona hi nawu,

a biyelela swisiwana swa wena.

₃Tintshava ni switsunga a swi humesele vanhu endzalo,

hikuva ku ni ku lulama etikweni.

₄Mufumi wa tiko a a sirhelele swisiwana;

a a pfune lava pfumalaka,

kambe a herisa vaxanisi,

₅leswaku minkarhi hinkwayo vanhu va ta chava wena ntsena,

dyambu ni n'weti swi kondza swi hela.

₆Mufumi wa tiko a a fane ni mpfula leyi nelaka swimila;

a a fane ni swimpfulana leswi tsutsuxaka kunene.

₇A ku ve ni ku lulama enkarhini wa ku fuma ka yena,

ku rhula ku va kona ku kondza n'weti wu nga ha vonaki.

₈Mfumo wa yena a wu nave ku sukela eka lwandle rin'wana,

wu ya fika eka lerin'wana;

a wu sukele enambyeni wa Yufrata,

wu ya fika evugimamusi.

₉Lava tshamaka emananga, a va n'wi tirhele,

valala va yena a va wele hansi va funya ritshuri.

₁₀Tihosi ta matiko hinkwawo ya le kule a ti n'wi humesele ndzuvo,

va le Xeba ni va le Seba a va n'wi tisele tinyiko.

₁₁Tihosi hinkwato a ti n'wi nkhinsamele,

vanhu va tinxaka hinkwato va n'wi tirhela.

₁₂Hakunene loko swisiwana ni lava pfumalaka mupfuni va huwelela eka yena,

wa va kutsula.

₁₃Lava tsaneke ni vapfumari, wa va twela vusiwana,

ú sirhelela vutomi bya vona.

₁₄Wa va humesa emaxangwini ni le tinyimpini,

hikuva a nga lavi leswaku va dlayiwa.

₁₅Mufumi wa tiko a a hanye malembe layo tala,

vanhu va n'wi luva hi nsuku wa le Xeba;

a va n'wi khongelele minkarhi hinkwayo,

masiku hinkwawo va kombela leswaku Xikwembu xi n'wi katekisa.

₁₆A ku ve ni mavele layo tala etikweni,

a ma kule ma bela hi moya emagangeni;

ntshovelo wa kona a wu fane ni wa le Lebanoni,

naswona a ku ve ni ndzalo emitini ku fana ni byanyi enhoveni.

₁₇Vito ra mufumi wa tiko a ri tiviwe hilaha ku nga heriki,

a ri twakale hinkwako ehansi ka dyambu.

Vanhu hinkwavo a va navelelane minkateko hi vito rero,

matiko hinkwawo ma tlangela yena n'wini wa rona.

₁₈A ku nkhensiwe HOSI Xikwembu xa Israele,

hikuva hi xona ntsena xi endlaka mahlori!

₁₉Minkarhi hinkwayo a ku tlangeriwe vito ra xona lero hlawuleka,

ku dzuneka ka xona a ku tate misava hinkwayo.

Amen! Amen!

₂₀Swikhongelo swa Davhida n'wana Yese swi helela kwala.