Pisalema ya 71

₁We HOSI, ndzi ta ka wena leswaku u ta ndzi lwela,

u nga pfumeli leswaku ndzi khomiwa hi tingana.

₂We Xikwembu xo tshembeka, ndzi ntshunxe u ndzi sirhelela;

ndzi yingise u ndzi ponisa,

₃u va ribye ro tiya leri ndzi tumbelaka eka rona,

leri u ri lulamiseke leswaku ndzi hlayiseka eka rona.

Hakunene, hi wena ribye ra mina ni khokholo ranga.

₄We Xikwembu xanga, ndzi kutsule emavokweni ya lavo homboloka,

ndzi biyelele eka vanhu lavo biha va tihanyi.

₅Ndzi tshemba wena, we N'wini wanga,

ndzi ku tshembile ku sukela evuhlangini bya mina we HOSI.

₆Ku sukela siku leri ndzi nga velekiwa ha rona, ndzi tiseketela hi wena,

hi wena u ndzi humeseke ekhwirini ra manana.

Ndzi nga ka ndzi nga tshiki ku ku dzunisa.

₇Vanhu lavo tala va ndzi hlamala,

hikuva hi wena khokholo ra mina.

₈Masiku hinkwawo ndzi yimbelela tinsimu,

ndzi tlangela ku dzuneka ka wena.

₉Ndzi dyuhele, kambe u nga ndzi cukumeti!

Hambileswi ndzi heleriweke hi matimba, u nga ndzi tshiki,

₁₀hikuva valala va mina va ndzi tshama xikungu,

va lava ku ndzi dlaya, va byeletelana

₁₁va ku: “Xikwembu xi n'wi fularhele,

a hi n'wi hlongoriseni hi n'wi khoma,

hikuva ku hava loyi a nga n'wi lamulelaka.”

₁₂We Xikwembu, hatlisa u ta ndzi pfuna,

u nga yimi kule na mina, wena Xikwembu xanga!

₁₃Lava va ndzi lumbetaka, a va khomiwe hi tingana va herisiwa,

lava ringetaka ku ndzi vavisa, a va tivangele ku soriwa ni mindzhukano.

₁₄Kambe mina a ndzi nga tshiki ku ku tshemba,

ndza ha ta ya emahlweni ndzi ku dzunisa.

₁₅Siku rin'wana ni rin'wana, ndzi ta vula leswaku u Xikwembu xo tshembeka, ni leswaku u ponisa vanhu.

Hakunene mintirho ya wena i ntsandza-vahlayi.

₁₆Ndzi ta ta eka wena ndzi ta vula mintirho ya wena ya matimba, we HOSI N'wini wa hinkwaswo,

ndzi ta byela vanhu leswaku hi wena ntsena la lulameke.

₁₇We Xikwembu, u ndzi dyondzisile ku sukela evuntshweni bya mina,

hikokwalaho ni sweswi ndza ha twarisa mintirho ya wena leyo hlamarisa.

₁₈Hambileswi ndzi baseke nhloko,

u nga ndzi tshiki we Xikwembu,

ndzi ta kota ku twarisa matimba ya wena lamakulu

eka vanhu va nkarhi lowu ni ka lava va ha taka.

₁₉We Xikwembu, ku lulama ka wena

i kukulu kukota matilo.

U tirhile leswikulu ngopfu,

ku hava loyi a ringanaka na wena we Xikwembu.

₂₀Wena u ndzi hundziseke emaxangwini ne makhombyeni layo tala,

u ta tlhela u ndzi hanyisa,

u ta tlhela u ndzi humesa

ematimbeni ya rifu.

₂₁U ta engeta u ndzi nyika ndzhuti,

u tlhela u ndzi tiyisa.

₂₂Loko ndzi ri mina, ndzi ta ku twarisa hi haripa,

ndzi vula ku tshembeka ka wena Xikwembu xanga;

ndzi ta ku dzunisa hi xitende,

wena Muhlawuleki wa Israele.

₂₃Loko ndzi ri karhi ndzi ku tlangela,

ndzi ta ba nkulungwana

hi mhaka ya leswi u ndzi kutsuleke.

₂₄Masiku hinkwawo ndzi ta vula

hilaha u ndzi lweleke hakona,

hikuva lava a va ringeta ku ndzi vavisa,

va khomiwe hi tingana va tsongahatiwa.