Pisalema ya 68

₁Loko Xikwembu xi humelela, valala va xona va hangalaka,

lava va xi vengaka, va suka va tsutsuma.

₂Lavo homboloka, u va hangalasa we Xikwembu,

va nyamalala ku fana ni musi lowu hahisiwaka,

va herisiwa emahlweni ka wena kukota mafurha endzilweni.

₃Kambe lavo lulama va tsaka hi ntsako lowukulu,

va cina emahlweni ka wena!

₄Dzunisani Xikwembu hi tinsimu, mi twarisa vito ra xona.

Khulelani ndlela ya Loyi a fambaka hi mapapa,

hikuva vito ra yena i HOSI;

banani nkulungwana emahlweni ka yena.

₅Tata wa lava pfumalaka vatswari ni musirheleli wa tinoni,

i Xikwembu lexi tshamaka exivandleni lexo hlawuleka.

₆Vanhu lava nga ni xivundza, Xikwembu xi va nyika vutshamo,

xi ntshunxa lava bohiweke,

kambe lava tiarisaka va ta tshama emakwandzasini.

₇We Xikwembu, siku u humeke ni vanhu va wena

u tsemakanya na vona mananga,

₈misava a yi tsekatseka, matilo ma chulula mpfula emahlweni ka wena Xikwembu xa le Sinayi,

emahlweni ka wena Xikwembu xa Israele.

₉We Xikwembu, u nisile timpfula letikulu,

u pfuxetile tiko ra wena, hikuva a ri herile matimba.

₁₀Vanhu va wena va kumile vutshamo eka rona,

hikuva u Xikwembu lexi nga ni vunene, lexi tiyisaka swisiwana.

₁₁N'wini wa hinkwaswo ú lo vulavula kunene,

kutani ntshungu wa vavasati wu huwelela hi ku tsaka wu ku:

₁₂“Tihosi ni mavuthu ya tona hi letiyaa,

ta baleka, ta baleka!

Hina vavasati hi ta phakelana

swilo swa nkoka leswi phanghiweke hi ri emakaya,

₁₃swo kota swifaniso swa matuva, leswi nga ni timpapa leti nameketiweke silivhere

ni tinsiva to vangama ta nsuku.

Xana ma ha salela yini le handle ematshangeni xana?”

₁₄Hi siku leri Xikwembu-xa-matimba-hinkwawo xi hluleke tihosi enyimpini,

mintsumbu a yi fana ni gamboko entshaveni ya Salimoni!

₁₅Ntshava ya Baxani i ntshava ya swikwembu,

leyi nga ni tinhlohlorhi leto tala.

₁₆We ntshava ya tinhlohlorhi leto tala, hikwalaho ka yini u swondzolota

ntshava leyi Xikwembu xi nga tihlawulela yona xana?

HOSI Xikwembu xi ta tshama eka yona hilaha ku nga heriki!

₁₇Xikwembu xi sukile entshaveni ya Sinayi,

xi ri ni magidi-gidi ya makalichi ya nyimpi,

kutani xi ya nghena exivandleni lexo hlawuleka.

₁₈We Xikwembu, u tlhandlukele entshaveni leyo leha

u ri karhi u fambisa lava u va khomeke enyimpini;

u amukerile tinyiko eka vanhu,

hambi ti ri ta lava tiarisaka, kutani u ta tshama exivandleni xexo we Xikwembu.

₁₉A ku nkhensiwe N'wini wa hinkwaswo,

hikuva wa hi hlayisa siku rin'wana ni rin'wana;

Xikwembu i muponisi wa hina.

₂₀Xikwembu xa hina i Xikwembu lexi ponisaka;

HOSI N'wini wa hinkwaswo hi yena la hi humesaka ematimbeni ya rifu.

₂₁Xikwembu xi ta fayetela tinhloko ta valala va xona,

xi guvula misisi ya lava yaka emahlweni ni ku dyoha.

₂₂N'wini wa hinkwaswo ú te:

“Valala va mina, ndzi ta va hlongola va suka eBaxani,

ndzi ta va tsavula elwandle.

₂₃N'wina mi ta hlamba milenge mi susa ngati ya vona leyi yi nga mi tlhambukela;

timbyana ti ta dya mintsumbu ya vona!”

₂₄We Xikwembu mufumi wa mina, vanhu va wena va vonaka va longolokile,

va kongoma exivandleni xa wena lexo hlawuleka;

₂₅vayimbeleri va rhangile emahlweni, va landza hi vanhwanyana lava baka swingomana,

endzhaku ka vona ku ta vachayi va swichaya-chayani.

₂₆Va yimbelela va ku:

“Eminkhubyeni ya n'wina, tlangelani Xikwembu,

nkhensani HOSI, yona xihlovo xa Israele!”

₂₇Emahlweni ku rhangile va ka Benjamini, va nga va nyimba leyitsongo,

va landza hi tindhuna leto tala ta ka Yuda, ni ta ka Zebuloni ni ta ka Neftali.

₂₈We Xikwembu, komba matimba lawa u hi poniseke ha wona,

hi kombe ntamu wa wena we Xikwembu,

₂₉u ri eTempeleni ya wena eYerusalema,

kutani tihosi ti ta ku luva.

₃₀Tshinya swiharhi swa le nhlangeni, ntlhambi lowu wa tinkuzi,

va nga Vaegipta lava fumaka matiko,

lava kandziyelaka van'wana ehansi va lava mali.

Hangalasa vanhu lava vo tsakela tinyimpi!

₃₁Va le Egipta va ta humesa swibya swa koporo,

va le Etiyopiya va ta khongela Xikwembu va tlakusile mavoko.

₃₂N'wina vafumi va misava, dzunisani Xikwembu hi tinsimu;

yimbelelani mi twarisa N'wini wa hinkwaswo,

₃₃yena loyi a famba-fambaka ehenhla,

ematilweni lama nga va kona ni khale.

Yingisani, ku twala rito ra yena,

ri nga rito leri nga ni matimba.

₃₄Tivisani vanhu leswaku Xikwembu xi ni ntamu,

vuhosi bya xona byi ungamela Vaisraele,

xi fuma xi ri henhla ematilweni.

₃₅Loko Xikwembu xi huma eTempeleni ya xona,

a hi ku chavisa ka xona!

Hi xona Xikwembu xa Vaisraele

lexi xi va tiyisaka, xi va nyikaka ntamu.

A ku tlangeriwe Xikwembu!