Pisalema ya 25

₁We HOSI, ndzi tlakusa mahlo ndzi languta eka wena,

₂We Xikwembu xanga, ndzi tshembile wena;

u nga pfumeli leswaku ndzi khomiwa hi tingana,

u nga ndzi tshiki ndzi hundzuka xihlekiso eka valala va mina.

₃Exikarhi ka lava va ku tshembaka, ku hava na un'we la khomiwaka hi tingana,

hikuva tingana i ta lava kanganyisaka van'wana, va tlanga hi vona.

₄We HOSI, ndzi dyondzise tindlela ta wena,

u endla leswaku ndzi ti tiva.

₅Ndzi fambise entiyisweni wa wena, u ri karhi u ndzi dyondzisa,

hikuva hi wena Xikwembu lexi xi ndzi ponisaka,

minkarhi hinkwayo ndzi tshemba wena.

₆We HOSI, u nga rivali ku ndzi komba tintswalo ta wena ni rirhandzu ra wena,

hikuva swi vile kona ku sukela ni khale.

₇U nga anakanyi swidyoho ni swihoxo swa vuntshwa bya mina;

ndzi tsundzuke we HOSI, hikwalaho ka rirhandzu ra wena ni vunene bya wena!

₈HOSI Xikwembu xi tele vunene ni ku lulama,

hikokwalaho xi dyondzisaka vadyohi ku famba endleleni leyinene.

₉Xi dyondzisa lava titsongahataka ku endla leswo lulama,

xi va komba ni tindlela ta xona.

₁₀Tindlela hinkwato ta HOSI Xikwembu ti komba rirhandzu ra xona ni ku tshembeka ka xona

eka lava hlayisaka ntwanano wa xona ni switsundzuxo swa xona.

₁₁We HOSI, swidyoho swa mina swi tele ngopfu,

ndzi rivalele swona, leswaku vito ra wena ri ta dzunisiwa.

₁₂HOSI Xikwembu xi komba munhu loyi a xi chavaka

ndlela leyi a fanelaka ku hlawula yona.

₁₃Munhu wo tano ú ta tshama emafurheni,

ni vana va yena va ta kuma tiko ri va ra vona.

₁₄HOSI Xikwembu i nakulobye wa lava va xi chavaka,

xi va tivisa leswi ntwanano wa xona wu lavaka swona.

₁₅Minkarhi hinkwayo ndzi languta eka HOSI Xikwembu,

hikuva hi xona xi nga ta ndzi ntshunxa loko ndzi phasiwile.

₁₆We HOSI, hundzuluka u ndzi languta, u ndzi twela vusiwana,

hikuva ndzo va ndzexe, ndzi le ku xanisekeni.

₁₇Herisa nhlomulo lowu nga mbilwini ya mina,

u ndzi susa emaxangwini lawa ndzi nga ka wona.

₁₈Languta, ndzi le khombyeni, ndza xaniseka;

hikokwalaho ndzi rivalele swidyoho swa mina hinkwaswo.

₁₉Anakanya ku tala ka lava va lwaka na mina,

ni ku chavisa ka rivengo leri va nga na rona eka mina.

₂₀We HOSI, ndzi sirhelele, u ndzi lamulela eka valala,

u nga ndzi tshiki ndzi khomiwa hi tingana, hikuva hi wena u nga khokholo ra mina.

₂₁Vunene ni ku lulama a swi ve swona swi ndzi hlayisaka,

hikuva ndzi tshemba wena ntsena.

₂₂We Xikwembu, kutsula Vaisraele

emaxangwini hinkwawo lawa va nga ka wona!