Pisalema ya 145

₁We Xikwembu xanga, wena la fumaka, ndzi ta twarisa vukulu bya wena;

minkarhi hinkwayo ndzi ta ku tlangela.

₂Siku rin'wana ni rin'wana ndzi ta ku nkhensa,

ndzi dzunisa vito ra wena hilaha ku nga heriki.

₃HOSI i Xikwembu lexikulu, xi dzuneka ngopfu;

vukulu bya xona hi lebyi nga pimekiki.

₄Vanhu va nkarhi wa sweswi va ta byela lava va ha taka leswi u swi endleke,

va ta va tivisa mintirho ya wena ya matimba.

₅Na mina ndzi nge tshiki ku anakanya ku saseka ni ku hlawuleka ka vuhosi bya wena,

ndzi anakanya ni swiendlo swa wena leswo hlamarisa.

₆Mintirho ya wena leyo chavisa ya matimba, vanhu va ta yi twarisa,

na mina ndzi ta vula vukulukumba bya wena.

₇Vanhu va ta vulavula hi vunene bya wena lebyikulu, va byi tsundzuka;

va ta dzunisa ku lulama ka wena hi minkulungwana.

₈HOSI Xikwembu xi ni tintswalo, xi twela vanhu vusiwana,

hi rirhandzu ra xona lerikulu xi va lehisela mbilu.

₉Swivumbiwa swa xona hinkwaswo

xi swi hlayisa hi vunene ni tintswalo.

₁₀We HOSI, swivumbiwa swa wena hinkwaswo swi ta ku dzunisa,

vahlawuriwa va wena hinkwavo va ta ku tlangela.

₁₁Va ta vula ku dzuneka ka mfumo wa wena,

va twarisa mintirho ya wena ya matimba.

₁₂Hikokwalaho vanhu va ta tiva leswaku u ni ntamu,

ni leswaku mfumo wa wena wu hlawulekile, wa dzuneka.

₁₃Vuhosi bya wena i bya minkarhi hinkwayo,

u ta va mufumi hilaha ku nga heriki.

[Marito hinkwawo ya HOSI Xikwembu ma ni ntiyiso,

rirhandzu ra xona ra vonaka emintirhweni ya xona hinkwayo.]

₁₄HOSI Xikwembu xi pfuxa hinkwavo lava khunguvanyekeke,

lava tshikeleriwaka xi va kutsula hinkwavo.

₁₅We HOSI, swivumbiwa hinkwaswo swi languta eka wena,

kutani wa swi phamela enkarhini lowu faneleke.

₁₆U pfula xandla xa wena,

kutani swivumbiwa hinkwaswo leswi hanyaka swi dya swi xurha.

₁₇Tindlela ta HOSI Xikwembu hi leto lulama hinkwato,

rirhandzu ra xona ra vonaka emintirhweni ya xona hinkwayo.

₁₈HOSI Xikwembu xi le kusuhi ni hinkwavo lava va xi khongelaka,

va nga lava va xi khongelaka hi mbilu hinkwayo.

₁₉Lava va xi chavaka, xi va endlela hi ku navela ka vona,

loko va rila eka xona, xa va twa kutani xi va ponisa.

₂₀HOSI Xikwembu xi hlayisa hinkwavo lava va xi rhandzaka,

kambe xi ta herisa lavo homboloka hinkwavo.

₂₁Nomo wa mina a wu vule ku dzuneka ka HOSI Xikwembu,

hinkwaswo leswi hanyaka a swi nkhense vito ra xona lero hlawuleka,

namuntlha ni hilaha ku nga heriki.