Pisalema ya 142

₁Ndzi tlakusa rito ndzi huwelela eka HOSI Xikwembu,

ndzi kombela hi matimba leswaku xi ndzi pfuna.

₂Ndzi tisa xirilo xa mina eka Xikwembu,

ni ku xi tivisa hilaha ndzi xanisekaka hakona.

₃Loko ndzi hela matimba,

we Xikwembu u tiva leswi swi ndzi humelelaka.

Lomu ndzi yaka kona,

va ringeta ku ndzi phasa hi ntlhamu.

₄Loko ndzi languta laha kusuhi na mina, a ndzi voni na munhu na un'we

loyi a nga ndzi pfunaka.

Ku hava laha ndzi nga tumbelaka kona,

a ku na munhu loyi a tikarhatelaka mina

₅We HOSI, ndzi huwelela eka wena,

ndzi ri: U khokholo ra mina.

Ehandle ka wena a ndzi na lexi ndzi xi hanyelaka.

₆Rhiya ndleve u twa xirilo xa mina,

hikuva ndzi tsongahatiwile ngopfu.

Ndzi lamulele eka lava va ndzi hlongorisaka,

hikuva va ndzi tlula hi matimba.

₇Ndzi humese ekhotsweni,

leswaku ndzi tlhela ndzi ku tlangela.

Lavo lulama va ta ndzi rhendzela va tsakile,

hikuva u ta va u ndzi endlele leswinene.