Pisalema ya 109

₁We Xikwembu xanga lexi ndzi xi dzunisaka,

u nga ha ndzi miyeleli,

₂hikuva vanhu lavo homboloka, lava kanganyisaka, va lwa na mina,

va ndzi hembela ni ku ndzi lumbeta.

₃Va ndzi rhendzela hi marito ya vona ya rivengo,

va ndzi pfuka ndzi nga va onhelanga nchumu.

₄Ndza va rhandza, naswona ndza va khongelela,

kambe vona va tshamela ku ndzi lumbeta.

₅Vunene bya mina va byi hakela hi leswo biha,

rirhandzu ri hakeriwa hi rivengo.

₆Va ndzi rhukana va ku:

“A ku boxiwe mhaka ya yena leyo biha,

muhehli a a yime evokweni ra yena ra xinene, a n'wi veka nandzu.

₇Vubihi bya yena a byi tikombe loko a tengisiwa,

ku khongela ka yena a ku vuriwe xidyoho.

₈Masiku ya yena ya ku hanya a ma hungutiwe,

a ku vekiwe un'wana entirhweni wa yena.

₉Vana va yena a va feriwe hi tata wa vona,

nsati wa yena a hundzuka noni.

₁₀Vana va yena a va yinga-yinge va famba va kombela swakudya,

a va hlongoriwe va ya kule ni marhumbi ya muti wa ka vona.

₁₁Vanhu lava a lombeke mali eka vona a va teke swilo swa yena hinkwaswo,

tinhundzu ta yena hinkwato a ti tekiwe hi vanhu vambe.

₁₂Ku nga vi na loyi a tshembekaka eka yena,

siku a faka, vana va yena va nga tweriwi vusiwana;

₁₃na vona a va love hinkwavo, va hela va ku bì,

xivongo xa ka vona xi hatla xi nyamalala.

₁₄HOSI Xikwembu a xi tsundzuxiwe vubihi bya vatata wa yena,

mana wa yena a nga tshuki a rivaleriwa swidyoho swa yena.

₁₅Swidyoho leswi a swi tshame emahlweni ka HOSI Xikwembu, swi nga suki,

kambe Xikwembu a xi suse xivongo xa ka vona emisaveni!

₁₆Mhaka hi leyi: Munhu loyi a nga lavanga ku tsetselela van'wana,

kambe ú xanisile swisiwana ni vapfumari, lava helaka ntamu ú va yisile eku feni.

₁₇A a swi tsakela ku rhukana van'wana.

Sweswi a ku rhukaniwe yena!

A a nga naveleli van'wana minkateko.

Sweswi a yi ve kule na yena!

₁₈A a namarhela ndzhukano kukota xiambalo,

a nwa wona onge i mati,

a tola wona onge i mafurha.

₁₉Sweswi a a funengele wona ku fana ni nkumba,

a a khwekete wona enyongeni minkarhi hinkwayo!”

₂₀We HOSI, vanhu lava va ndzi vekaka nandzu ni ku ndzi lumbeta,

va be hi mindzhukano yeleyo!

₂₁Ndzi lamulele hikwalaho ka vito ra wena, we HOSI N'wini wanga;

leswi u nga ni rirhandzu ni vunene, ndzi ponise,

₂₂hikuva ndzi xisiwana ni mupfumari,

mbilu ya mina yi twa ku vava ngopfu.

₂₃Ndzi ya eku nyamalaleni kukota mindzhuti nimadyambu,

va ndzi dzudzile ku fana ni njiya.

₂₄Ndzi ondzile ngopfu, matsolo ya mina ma gudlagudla,

hikuva ndzi le ku titsoneni, a ndzi dyi nchumu.

₂₅Eka valala va mina, ndzo va xihlekiso,

loko va ndzi vona, va hlakahla tinhloko va ntlokola.

₂₆We HOSI Xikwembu xanga, ndzi pfune,

ndzi ponise, hikuva u ni rirhandzu.

₂₇Valala va fanele ku swi tiva

leswaku hi wena la tirhaka swilo leswi, we HOSI, hi wena la ndzi pfunaka.

₂₈Hambi loko va ndzi rhukana, wena wa ndzi katekisa,

loko va lwa na mina, va ta khomiwa hi tingana,

kutani mina nandza wa wena ndzi ta tsaka.

₂₉Lava va ndzi hehlaka a va khomiwe hi tingana,

a va ambexiwe tona ku fana ni xiambalo.

₃₀Ndzi ta tlakusa rito ndzi tlangela HOSI ndzi vuyelela,

ndzi yi dzunisa exikarhi ka ntshungu,

₃₁hikuva yi yima ni mupfumari ehubyeni,

yi n'wi lwela eka lava va n'wi avanyisaka.