Tinhlayo 27

₁Selofihada n'wana Hefere wa Giliyadi wa Makiri wa Manase wa Yosefa, a a ri ni vana va xisati ntsena, va nga lava: Mahela, na Nowa, na Hogila, na Milika, na Tirisa. ₂Siku rin'wana va ya yima emahlweni ka Muxe na muprista Eliyazara, ni varhangeri, ni ntshungu hinkwawo, enyangweni ya Ntsonga lowo Hlawuleka, va ku: ₃“Tata wa hina ú fele emananga a nga ri na vana va xinuna; a a nga ri kona exikarhi ka vanghana va Kora lava nga hlengeletana va sandza HOSI Xikwembu; yena ú lo fela swidyoho swa yena ntsena. ₄Xana leswi tatana a pfumalaka vana va xinuna, vito ra ndyangu wa yena ri ta nyamalalela makumu xana? Hi nyikeni misava leyi nga ta va ya hina exikarhi ka va ka hina.”

₅Kutani Muxe a hundzisela mhaka ya vona eka HOSI Xikwembu. ₆Hiloko HOSI Xikwembu xi ku ka Muxe: ₇“Mhaka leyi vana va Selofihada va yi vulaka, ya twala: u fanele ku va avela misava leyi yi nga ta va ndzhaka ya vona, exikarhi ka va ka vona; u tlhela u va nyika leswi tata wa vona a feke a swi siya. ₈Kutani u byela Vaisraele, u ku: ‘Loko wanuna a lova a nga ri na n'wana wa xinuna, ndzhaka ya yena mi ta yi nyika n'wana wa yena wa xisati. ₉Loko a nga ri na n'wana wa xisati, ndzhaka ya yena mi ta yi nyika vamakwavo wa yena va xinuna. ₁₀Loko a nga ri na vamakwavo va xinuna, ndzhaka ya yena mi ta yi nyika vamakwavo va tata wa yena. ₁₁Loko tata wa mufi a nga ri na vamakwavo, ndzhaka yi ta nyikiwa un'wana wa va ka vona, yi va ya yena.’ Mhaka leyi yi ta va nawu lowu nga ta boha eka Vaisraele, hilaha mina HOSI ndzi ku lerisaka hakona, wena Muxe.”

₁₂HOSI Xikwembu xi ku ka Muxe: “Tlhandlukela entshaveni leyi ya Abarimi, u vona tiko leri ndzi ri nyikeke Vaisraele. ₁₃Kutaku loko u ri vonile, u ta tifela u landza vatata wa wena, u fana ni makwenu Aroni, ₁₄hikuva a mi ndzi tshembanga loko mi ri emananga ya Sini, nkarhi lowu ntshungu wu nga ndzi sandza le Meriba, kutani mi arile ku va komba matimba ya mina layo hlawuleka.” (Meriba i xihlovo xa mati le Kadexe, emananga ya Sini.)

₁₅Muxe a ku ka HOSI Xikwembu: ₁₆“We HOSI, Xikwembu xa swilo hinkwaswo leswi hanyaka, hlawula wanuna loyi a nga ta fambisa ntshungu lowu, ₁₇a rhangela mavuthu ni ku ma letela loko ma ya enyimpini, ni loko ma vuya. Hi ndlela leyi, ntshungu wa wena HOSI a wu nga fani ni ntlhambi wa tinyimpfu leti pfumalaka murisi.” ₁₈Kutani HOSI Xikwembu xi ku ka Muxe: “Vitana Yoxuwa n'wana Nuni, u n'wi tlhandleka mavoko, hikuva i wanuna loyi Moya wu nga eka yena. ₁₉U ta n'wi yimisa emahlweni ka muprista Eliyazara ni ntshungu hinkwawo, u n'wi veka entirhweni va ri karhi va swi vona. ₂₀U ta n'wi pfumelela ku tirha mintirho yin'wana leyi tirhiwaka hi wena ntsena, leswaku ntshungu wa Vaisraele wu ta n'wi yingisa. ₂₁Yoxuwa ú ta pfuniwa hi muprista Eliyazara loyi a nga ta n'wi vutisela timhaka eka mina HOSI, hi ku tirhisa ‘Urimi’. Muprista hi yena la nga ta letela mavuthu leswaku ma ya enyimpini, kumbe ma nga yi; Yoxuwa ni ntshungu hinkwawo va ta yingisa yena.” ₂₂Muxe a endla hilaha HOSI Xikwembu xi n'wi leriseke hakona; a vitana Yoxuwa, a ya n'wi yimisa emahlweni ka muprista Eliyazara ni ntshungu hinkwawo, ₂₃kutani a n'wi tlhandleka mavoko, a n'wi veka entirhweni hilaha HOSI Xikwembu xi leriseke hakona.