Marka 13

₁Loko Yesu a ha ku huma eTempeleni, un'wana wa vadyondzisiwa va yena a ku ka yena: “Mudyondzisi, languta ku kula ni ku hlamarisa ka maribye lawa ni ka tindlu leti!” ₂Yesu a n'wi hlamula a ku: “Xana wa ti vona tindlu letikulu leti ke? A ku nga sali ribye ehenhla ka ribye rin'wana; hinkwawo ma ta hindzimuxiwa.”

₃Kuteloko a tshamile eNtshaveni ya Mitlhwari, a langutene ni Tempele, Petro na Yakobo swin'we na Yohane na Andriya, va n'wi tekela tlhelo, va n'wi vutisa va ku: ₄“Hi byele, xana timhaka leti ti ta humelela rini xana? Ni xikombiso xi ta va xihi xa leswaku hinkwaswo leswi swi le kusuhi ni ku humelela ke?”

₅Hiloko Yesu a sungula ku va dyondzisa a ku: “Tivoneleni leswaku mi nga tshuki mi xisiwa hi munhu. ₆Lavo tala va ta ta hi vito ra mina, un'wana ni un'wana a ku: ‘Mina ndzi yena’, kutani va ta xisa lavo tala. ₇Kutaku loko mi twa huwa ya tinyimpi ni mahungu-ndlela ya tinyimpi, mi nga chaveni, hikuva sweswo swi fanela ku humelela; kambe a hi wona makumu. ₈Tiko rin'wana ri ta pfukela tiko rin'wanyana, mfumo wun'wana wu ta lwa ni mfumo wun'wanyana; ku tsekatseka ka misava ku ta va kona ematlhelweni layo tala, ni tindlala ti ta va kona. Sweswo i ku sungula ka mahlomulo.

₉“Loko mi ri n'wina, tivoneleni; va ta mi nyiketa etihubyeni; mi ta biwa emasinagogeni, mi ta yimisiwa emahlweni ka tindhuna ni tihosi hikwalaho ka mina, mi va timbhoni eka tona. ₁₀Kambe Evhangeli yi fanele ku rhanga yi twarisiwa ematikweni hinkwawo. ₁₁Kutani siku va nga ta mi khoma, va mi yisa eku avanyisiweni, mi nga tshuki mi vilela hi leswi mi nga ta vula swona, kambe vulani leswi mi nga ta nyikiwa swona enkarhini wolowo, hikuva a hi n'wina mi nga ta vulavula, kambe i Moya lowo Kwetsima.

₁₂“Munhu ú ta nyiketa makwavo eku dlaweni, tatana ú ta endlisa sweswo eka n'wana wa yena; ni vana va ta pfukela vatswari va vona, va va dlaya. ₁₃Mi ta vengiwa hi vanhu hinkwavo hikwalaho ka vito ra mina, kambe loyi a tiyiselaka ku fika makumu hi yena loyi a nga ta ponisiwa.

₁₄“Kutaku loko mi vona ‘xilo xa manyala lexi onhetelaka’ xi ri laha xi nga faneriki ku va kona (la hlayaka a a twisise), enkarhini wolowo, lava nge Yudiya a va tsutsumele etintshaveni; ₁₅la nge henhla ka lwangu, a nga tshuki a xika ku ya nghena ndlwini a ya teka xa nchumu kona; ₁₆la nge masin'wini, a nga tshuki a tlhelela kaya ku ya teka xiambalo xa yena. ₁₇Va ta va ni khombo vavasati lava tikeke ni lava mamisaka eminkarhini yoleyo. ₁₈Khongelani leswaku swilo leswi swi nga humeleri hi vuxika. ₁₉Hikuva eminkarhini yoleyo, ku ta va ni nhlomulo lowu nga si tshamaka wu humelela, hi mpfhuka Xikwembu xi tumbuluxa hinkwaswo, ku fikela namuntlha; naswona nhlomulo lowo tano wu nga ka wu nga ha vi kona. ₂₀Loko Hosi a yi nga hungutanga masiku walawo, a ku nga ta pona munhu ni un'we; kambe yi ma hungutile hikwalaho ka vahlawuriwa va yona.

₂₁“Enkarhini wolowo, loko munhu a mi byela a ku: ‘Vonani, Mesiya hi loyi’, kumbe: ‘Hi luya’, mi nga tshuki mi pfumela; ₂₂hikuva ku ta humelela Vamesiya va mavunwa, ni vaprofeta va mavunwa; va ta endla mahlori ni swihlamariso ku hambukisa na vona vahlawuriwa va Xikwembu, loko swi endleka. ₂₃Loko mi ri n'wina, tlharihani! Ndzi mi byerile hinkwaswo swi nga si humelela.

₂₄“Eminkarhini yoleyo, endzhaku ka nhlomulo wolowo,

₂₆“Hi kona a nga ta vona N'wana-wa-Munhu a ta hi mapapa, a ri ni matimba lamakulu ni ku kwetsima. ₂₇Kutani ú ta rhuma tintsumi ta yena ku ta hlengeleta vahlawuriwa va yena; va ta huma ematlhelweni ya mune ya misava, ku sukela emakun'wini ya yona ku yisa emakun'wini ya tilo.

₂₈“Dyondzani leswi hi murhi wa nkuwa: Loko marhavi ya wona ma sungula ku olova ni loko matluka ya wona ma hluka, mi tiva leswaku ximumu xi le kusuhi. ₂₉Hi mukhuva wolowo, loko mi vona swilo sweswo swi humelela, tivani leswaku nkarhi wu le kusuhi, wu le nyangweni. ₃₀Ndzi tiyisile ndzi ri ka n'wina: Rixaka leri ri nga ka ri nga hundzi, ku nga si humelela swilo leswi hinkwaswo. ₃₁Tilo ni misava swi ta hundza, kambe marito ya mina ma nga ka ma nga hundzi.

₃₂“Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le tilweni, hambi a ri N'wana; swi tiviwa hi Tatana ntsena. ₃₃Tlharihani mi hiteka, hikuva a mi tivi leswaku nkarhi wu ta va rini. ₃₄Swi fana ni munhu loko a endza, a suka emutini wa yena, a siyile hinkwaswo emavokweni ya malandza ya yena, un'wana ni un'wana entirhweni wa yena, a lerisile ni mulanguteri wa nyangwa leswaku a hiteka. ₃₅Hitekani ke, hikuva a mi tivi nkarhi lowu n'wini wa muti a nga ta ta ha wona; ku nga va nimadyambu, kumbe nivusiku lebyikulu, kumbe loko nkuku wu ringa, kumbe nimixo; ₃₆loko a fika hi xitshuketa, a nga mi kumi mi etlele. ₃₇Kutani leswi ndzi mi byelaka swona, ndzi byela hinkwavo, ndzi ri: Hitekani!”