Matewu 12

₁Enkarhini wolowo Yesu a hundza exikarhi ka masimu hi siku ra Savata. Vadyondzisiwa va yena a va twa ndlala, kutani va sungula ku tshova min'oko, va dya. ₂Loko Vafarisi va swi vona, va ku ka yena: “Vona! Vadyondzisiwa va wena va endla leswi nga pfumeleriwiki ku endliwa hi siku ra Savata.” ₃Kambe Yesu a ku ka vona: “Xana a mi hlayanga leswi endliweke hi Davhida, siku a nga twa ndlala, yena ni lava a va ri na yena ke? ₄Ú tshama a nghena na vona endlwini ya Xikwembu, va dya swinkwa swa mhamba leswi a swi nga fanelanga ku dyiwa hi yena ni lava a va ri na yena, kambe a swi dyiwa hi vaprista ntsena. ₅Kumbe, a mi hlayanga eNawini xana leswaku, hi siku ra Savata, vaprista va tlula nawu wa Savata hi ku tirha eTempeleni, kambe va nga ri na nandzu? ₆Ndza mi byela leswaku ku ni leswi tlulaka Tempele kwala. ₇Loko onge mi twisisile rito leri nge: ‘Ndzi tsakela tintswalo, ku nga ri timhamba’, ingi mi nga solanga lava nga riki na nandzu, ₈hikuva N'wana-wa-Munhu i Hosi ya Savata.”

₉Loko Yesu a sukile kwalaho, a ya nghena esinagogeni ra vona. ₁₀Kona kwalaho, a ku ri ni munhu wo khwanyala voko. Kutani va vutisa Yesu hi ku lava xo n'wi veka nandzu hi xona va ku: “Xana swa pfumeleriwa ku hanyisa munhu hi siku ra Savata ke?” ₁₁Yena a ku ka vona: “Hi wihi munhu exikarhi ka n'wina loyi a nga ni nyimpfu yin'we ntsena, kungaku loko yi wela ekheleni hi siku ra Savata, a nga ta ka a nga yi tlakuli, a yi humesa hi siku rero ke? ₁₂Kasi munhu ú tlula ngopfu tinyimpfu. Hikokwalaho, ku endla leswinene hi siku ra Savata, swa pfumeleriwa.” ₁₃Kutani a ku ka munhu yoloye: “Tshambuluta voko ra wena!” A ri tshambuluta; kutani ri tlhela ri ololoka ri fana ni lerin'wana. ₁₄Vafarisi va humela ehandle, va ya tshama Yesu xikungu, ku vona hilaha va nga ta n'wi dlaya hakona.

₁₅Kambe loko Yesu a swi tiva, a suka kwalaho. Lavo tala va n'wi landzelela, kutani a va hanyisa hinkwavo. ₁₆Kambe a va laya ngopfu leswaku va nga tshuki va n'wi tivisa evanhwini; ₁₇a ku ri ku hetisa leswi vuriweke hi muprofeta Esaya, loko a te:

₂₂Kavaloko va tisa munhu wa mademona la feke mahlo, naswona a ri mbheveve. Yesu a n'wi hanyisa, kutani lowa mbheveve a vulavula, na ku vona a vona. ₂₃Ntshungu hinkwawo wu hlamala swona, vanhu va vutisana va ku: “Xana munhu loyi a nga va yena N'wana Davhida ke?” ₂₄Loko Vafarisi va swi twa, va hlamula va ku: “Munhu loyi a nge koti ku hlongola mademona loko ku nga ri hi Belzebule, hosi ya mademona.”

₂₅Kambe Yesu, hi ku tiva miehleketo ya vona, a ku ka vona: “Mfumo wun'wana ni wun'wana lowu avanaka hi le xikarhi, wu hundzuka wa hava; muti wun'wana ni wun'wana, hambi wu ri ndyangu, lowu avanaka hi le xikarhi, a wu nga tiyi. ₂₆Ni loko Sathana a hlongola Sathana, wa tilwisa; hikokwalaho mfumo wa yena wu nga ka wu nga tiyi. ₂₇Ni loko kunene ndzi hlongola mademona hi Belzebule, xana vana va n'wina vona va ma hlongola hi mani xana? Loko swi ri tano va ta va vaavanyisi va n'wina. ₂₈Kambe loko ndzi hlongola mademona hi Moya wa Xikwembu, swi vula leswaku Mfumo wa Xikwembu wu tile eka n'wina. ₂₉Kumbe munhu a nga nghenisa ku yini endlwini ya nhenha ya matimba a phangha xuma xa yona, loko a nga sungulanga hi ku boha nhenha yoleyo ke? Hi kona a nga ta phangha yindlu ya yena. ₃₀Loyi a nga yimiki na mina, ú lwa na mina; kutani loyi a nga hlengeletiki na mina, wa hangalasa.

₃₁“Hi laha ndzi nge ka n'wina: Vanhu va ta rivaleriwa xidyoho xihi ni xihi, hambi ri ri rito ra ku sandza Xikwembu; kambe loko va sandza Moya lowo Kwetsima, va nga ka va nga rivaleriwi; ₃₂un'wana ni un'wana la nga ta dyohela N'wana-wa-Munhu hi ku n'wi sandza, ú ta rivaleriwa; kambe la nga ta dyohela Moya lowo Kwetsima hi ku wu sandza, a nga ka a nga rivaleriwi, hambi ku ri enkarhini wa sweswi, hambi ku ri enkarhini lowu taka.

₃₃“Vonani murhi lowunene: Na yona mihandzu ya wona hi leyinene. Vonani murhi lowo biha: Na yona mihandzu ya wona hi leyo biha; hikuva murhi wu tiviwa hi mihandzu ya wona.

₃₄“N'wina rixaka ra timhiri, mi nga swi kotisa ku yini ku humesa marito lamanene, leswi mi nga lavo biha ke? Nomo wu vula leswi mbilu yi teleke swona. ₃₅Munhu lonene ú humesa swilo leswinene exumeni xa yena lexinene, kambe munhu lowo biha ú humesa leswo biha exumeni xa yena lexo biha. ₃₆Hikokwalaho ndza mi byela leswaku, hi siku ra ku avanyisiwa, vanhu va ta tihlamulela eka rito rin'wana ni rin'wana ra hava leri va tshamaka va ri vula, ₃₇hikuva wena, u ta hlayiwa la lulameke hi marito ya wena; naswona, u ta avanyisiwa hi marito ya wena.”

₃₈Enkarhini wolowo, van'wana va vatsari ni Vafarisi va ku ka Yesu: “Mudyondzisi, hi lava ku ku vona u endla mahlori.” ₃₉A va hlamula, a ku: “Rixaka leri ro biha, leri sandzaka Xikwembu, ri kombela mahlori, kambe ri nga ka ri nga nyikiwi wona, loko ma nga ri ya muprofeta Yonasi. ₄₀Hikuva hilaha Yonasi a heteke hakona masiku manharhu ni vusiku bya kona ekhwirini ra nhlampfi leyikulu, N'wana-wa-Munhu na yena ú ta heta masiku manharhu ni vusiku bya kona emarhumbyini ya misava. ₄₁Hi siku ra ku avanyisiwa, vavanuna va Ninivha va ta humelela swin'we ni rixaka leri, va ri avanyisa, hikuva va hundzukile, loko va khongoteriwa hi Yonasi; kutani maswivo, leswi nga kwala i swikulu ku tlula Yonasi. ₄₂Hi siku ra ku avanyisiwa, hosi ya wansati ya le dzongeni yi ta pfuka eku feni swin'we ni rixaka leri, yi ri avanyisa, hikuva yi sukile emakun'wini ya misava ku ta yingisa vutlhari bya Solomoni, kutani maswivo, leswi nga kwala i swikulu ku tlula Solomoni.

₄₃“Loko moya wa thyaka wu sukile eka munhu, wu ya emananga ku ya lava ku wisa, kambe wu tsandzeka ku ku kuma; ₄₄hiloko wu ku: ‘Ndzi ta tlhelela endlwini ya mina leyi ndzi humeke eka yona.’ Kutani loko wu fika, wu yi kuma yi nga ri na nchumu, yi kukuriwile, yi lunghisiwile. ₄₅Hiloko wu tlhela wu ya teka mimoya yin'wana ya 7 leyo biha ku tlula wona, kutani yi nghena, yi tshama endlwini leyi; kutani matshamele yo hetelela ya munhu loyi, ma tlula layo sungula hi ku biha. Swi ta va tano eka rixaka leri ro biha.”

₄₆A ku a ha vulavula ni mintshungu, ku humelela mana wa yena ni vamakwavo, va yima ehandle, va lava ku vulavula na yena. ₄₇Kutani munhu un'wana a ku ka yena: “Vona, mana wa wena ni vamakwenu, hi lava la handle, va lava ku vulavula na wena.” ₄₈Kambe Yesu a hlamula loyi a nga n'wi tivisa sweswo a ku: “Manana i mani xana, ni vamakwerhu i vamani xana?” ₄₉Kutani a komba vadyondzisiwa va yena hi voko, a ku: “Manana ni vamakwerhu hi volava; ₅₀hikuva un'wana ni un'wana la endlaka ku rhandza ka Tata wa mina la nge tilweni, hi yena makwerhu wa xinuna, ni wa xisati, na manana.”