Luka 17

₁Yesu a ku ka vadyondzisiwa va yena: “Loko swi ri swikhunguvanyiso a swi nga pfumaleki, kambe ú ni khombo loyi swikhunguvanyiso swi humelelaka ha yena. ₂Swi nga va swinene loko ribye ra ku sila ri boheleriwa enhan'wini ya yena a hoxiwa lwandle, ku ri ni loko a khunguvanyisa un'wana wa lavatsongo lava. ₃Tivoneleni ke!

“Loko makwenu a dyohile, n'wi tshinye; loko a tisola, n'wi rivalele. ₄Ni loko a ku dyohela ka 7 hi siku rin'we, kutani a tlhelela eka wena ka 7, a ku: ‘Ndza tisola’, n'wi rivalele.”

₅Vaapostola va ku ka Hosi: “Hi engetelele ku pfumela.” ₆Hosi yi ku: “Loko mi ri ni ku pfumela loku ringanaka ni ndzhoho ya murhi wa sinapi, a mi ta ku ka murhi wa nkuwa lowu: ‘Tisimule, u ya tisimeka elwandle!’ Kutani a wu ta mi yingisa.

₇“Un'wana wa n'wina a nga va ni nandza la n'wi rimelaka masimu, kumbe la n'wi riselaka swifuwo. Loko nandza loyi a vuya hi le masin'wini, xana n'wini wa yena ú ta ku ka yena: ‘Hatlisa u ta haleno, u ta tshama eswakudyeni’ xana? ₈Nikutsongo! Kambe ú ta ku ka yena: ‘Ndzi lunghisele swakudya, kutani u tikhama, u ndzi tirhela ndzi ri karhi ndzi dya, ndzi nwa; endzhaku ka swona, na wena u ta dya, u nwa!’ ₉Xana nandza loyi, ú ta nkhensiwa loko a endlile lexi a nga lerisiwa xona xana? E-e! ₁₀Hi mukhuva wolowo, na n'wina, loko mi hetile hinkwaswo leswi mi lerisiweke swona, vulani mi ku: ‘Hi malandza lama nga faneriki hi ku nkhensiwa, hi endlile ntsena leswi a hi fanela ku swi endla.’ ”

₁₁Loko Yesu a ri karhi a kongoma Yerusalema, a lulama ni ndzilekana wa matiko ya Samariya na Galeliya. ₁₂A a ri karhi a nghena emutini wun'wana loko vanhlokonho va khume va hlangana na yena. A va yimile kulenyana, ₁₃kutani va huwelela, va ku: “Yesu, n'wini wa hina, hi twele vusiwana!” ₁₄Loko Yesu a va vona, a ku ka vona: “Fambani, mi ya tikomba eka vaprista.” Kakuloko va ha ya kona, va basisiwa. ₁₅Un'wana wa vona, loko a vona leswaku ú hanyisiwile, a vuyela ndzhaku, a ri karhi a dzunisa Xikwembu hi rito leri tlakukeke. ₁₆Kutani a tiwisa hi mombo emilengeni ya Yesu, a n'wi tlangela. Munhu yoloye a a ri Musamariya. ₁₇Hiloko Yesu a vutisa a ku: “Xana a va basisiwanga va ri khume ke? ₁₈Lava va 9 va kwihi xana? Xana a ku kumekanga na van'wana lava nga vuyela endzhaku ku ta dzunisa Xikwembu, ehandle ka munhu loyi wa rixaka rimbe xana?” ₁₉Kutani a ku ka yena: “Pfuka, u yima, u tifambela, ku pfumela ka wena ku ku hanyisile.”

₂₀Vafarisi va vutisa Yesu, va ku: “Xana Mfumo wa Xikwembu wu ta ta rini ke?” Kutani a va hlamula a ku: “Mfumo wa Xikwembu a wu humeleli wu ri karhi wu voniwa hi mahlo; ₂₁a ku nga vuriwi leswaku: ‘Vonani, hi wolowu!’ kumbe: ‘Hi lowuya!’ hikuva Mfumo wa Xikwembu wu kona exikarhi ka n'wina.”

₂₂A engeta a ku ka vadyondzisiwa: “Ku ta ta masiku lawa mi nga ta navela ku vona rin'we ntsena ra masiku ya N'wana-wa-Munhu, kambe a mi nga ri voni. ₂₃Va ta ku ka n'wina: ‘Langutani lahaya!’ kumbe: ‘Langutani haleno!’ Kambe mi nga tshuki mi ya kona, mi nga tsutsumeli kona. ₂₄Hikuva kukotisa rihati loko ri hatima, ri voninga ku sukela etlhelweni rin'wana ra tilo ku yisa eka lerin'wanyana, N'wana-wa-Munhu ú ta endlisa sweswo hi siku ra yena. ₂₅Kambe eku sunguleni ú fanele ku twisiwa ku vaviseka lokukulu, a nyenyiwa hi va rixaka leri.

₂₆“Hilaha swilo swi humeleleke hakona emasikwini ya Nowa, swa ha ta humelerisa xisweswo emasikwini ya N'wana-wa-Munhu. ₂₇A va dya, va nwa, va hlomisa ni ku hlomiselana, ku ko ku fika siku leri Nowa a ngheneke engalaveni ha rona, kutani ndhambi ya mati yi fika, yi va lovisa hinkwavo. ₂₈Naswona swi humelerise xisweswo emasikwini ya Lota; a va dya, va nwa, va xava ni ku xavisa, va byala, va aka tindlu; ₂₉kambe siku leri Lota a humeke eSodoma ha rona, ndzilo ni xivavula swi wa hi le tilweni, swi va lovisa hinkwavo. ₃₀Swi ta va tano hi siku leri N'wana-wa-Munhu a nga ta humelela ha rona.

₃₁“Hi siku rero, loyi a nge henhla ka yindlu, nhundzu ya yena yi ri ndlwini, a nga tshuki a xika, a ya yi teka; ni loyi a nge masin'wini a nga tshuki a vuyela kaya. ₃₂Tsundzukani ta nsati wa Lota. ₃₃Un'wana ni un'wana loyi a nga ta lava ku tihlayisela vutomi bya yena, ú ta lahlekeriwa ha byona; kambe un'wana ni un'wana loyi a lahlekeriwaka hi vutomi bya yena, ú ta byi ponisa. ₃₄Ndza mi byela, ndzi ri: Hi vusiku bya kona, eka vavanuna vambirhi lava nga ta va va etlerile endhawini yin'we, ku ta tekiwa un'wana, un'wana a siyiwa. ₃₅Eka vavasati vambirhi lava nga ta sila swin'we, ku ta tekiwa un'wana, un'wana a siyiwa. [ ₃₆Eka vanhu vambirhi lava nga ta va emasin'wini, ku ta tekiwa un'wana, un'wana a siyiwa.]” ₃₇Kutani va n'wi vutisa va ku: “Hosi, swi ta va kwihi ke?” A ku ka vona: “Laha ntsumbu wu nga kona, hi laha makoti ma nga ta hlengeletana kona.”