Luka 15

₁Kutani valuvisi ni vadyohi hinkwavo va n'wi tshinelela ku ta n'wi yingisa. ₂Kambe Vafarisi ni vatsari va n'unun'uta va ku: “Munhu loyi ú amukela vadyohi, ú dya na vona.” ₃Hiloko a va byela xifaniso lexi, a ku: ₄“Loko un'wana wa n'wina a ri ni dzana ra tinyimpfu, kutani a lahlekeriwa hi yin'we ya tona, xana a nga ka a nga siyi leta 99 enhoveni, a ya lava leyi lahlekeke, a kondza a yi kuma xana? ₅Kutaku loko a yi kumile, a yi tlakula, a yi pakatsa a tsakile. ₆Loko a fika kaya, a rhamba vanghana ni vaakelani, a ku ka vona: ‘A hi tsakeni swin'we, hikuva ndzi kumile nyimpfu ya mina leyi a yi lahlekile.’ ₇Ndza mi byela leswaku hi mukhuva wolowo, ku ta va ni ku tsaka etilweni hikokwalaho ka mudyohi a ri un'we la hundzukaka, ku tlula ku tsaka loku nga ta va kona hikokwalaho ka lava lulameke va 99 lava nga ha riki na fanelo ya ku hundzuka.

₈“Loko wansati a ri ni khume ra macheleni, kutani a lahlekeriwa hi rin'we ntsena, xana a nga ka a nga lumeki rivoni, a kukula yindlu, a lavisisa swinene a kondza a ri kuma xana? ₉Kutaku loko a ri kumile, a rhamba vanghana ni lava va akelaneke na yena, a ku ka vona: ‘A hi tsakeni swin'we, hikuva ndzi kumile cheleni ra mina, leri a ri lahlekile.’ ₁₀Ndza mi byela leswaku, hi mukhuva wolowo, tintsumi ta Xikwembu ta tsaka swinene loko mudyohi hambi a ri un'we a hundzuka.”

₁₁Yesu a engeta a ku: “A ku ri ni munhu un'wana loyi a a ri ni vana vambirhi va xinuna; ₁₂loyi wa ndzisana a ku ka tata wa yena: ‘Tatana, ndzi avele xuma lexi nga ta va xa mina.’ Kutani tata wa vona a va avela rifuwo ra yena. ₁₃Kuteloko ku hundzile masiku ma nga ri mangani, n'wana loyi wa ndzisana a hlengeleta hinkwaswo, a rhurhela etikweni ra le kule, a ya hangalasa xuma xa yena hi vusopfa. ₁₄Loko a dyile hinkwaswo, ku wa ndlala leyikulu etikweni rero, kutani a sungula ku pfumala. ₁₅Kutani a famba a ya namarhela munhu wa tiko rero; munhu yoloye a n'wi rhuma emasin'wini ya yena ku ya risa tinguluve. ₁₆Kutani a a navela ku xurha hi makamba lama dyiwaka hi tinguluve, hikuva a ku nga ri na munhu la n'wi nyikaka nchumu.

₁₇“Hiloko a tiehleketa, a ku: ‘Malandza layo tala ngopfu ma kona eka tatana, lama dyaka ma xurha; kasi mina haleno ndza fa hi ndlala. ₁₈Ndzi ta pfuka, ndzi ya eka tatana, ndzi ta fika ndzi ku ka yena: Tatana, ndzi dyohele Tilo na wena, ₁₉a swa ha ndzi faneri ku vuriwa n'wana wa wena; u ndzi endla ku fana ni un'wana wa malandza ya wena.’ ₂₀Kutani a pfuka, a ya eka tata wa yena.

“Loko a ha ri kule, tata wa yena a n'wi vona, a n'wi twela vusiwana; kutani a tsutsuma, a ya n'wi vukarha, a n'wi ntswontswa. ₂₁Kutani n'wana a ku ka yena: ‘Tatana, ndzi dyohele Tilo na wena, a swa ha ndzi faneri ku vuriwa n'wana wa wena.’ ₂₂Kambe tata wa yena a ku ka malandza ya yena: ‘Hatlisani mi tisa nguvu leyo saseka ngopfu mi n'wi ambexa, mi nghenisa xingwavila eritihweni ra yena, mi n'wi ambexa ni tintanghu. ₂₃Tisani rhole leri noneke, mi ri tlhava, hi dya, hi tsaka; ₂₄hikuva n'wana loyi wa mina a a file, kambe sweswi wa hanya; a a lahlekile, kambe sweswi ú kumiwile.’ Kutani va sungula ku tsaka.

₂₅“Kambe n'wana wa yena lonkulu a a ri emasin'wini; loko a vuya a fika kusuhi ni yindlu, a twa ku yimbelela ni ku cina. ₂₆A vitana un'wana wa malandza, a n'wi vutisa a ku: ‘Swi lo yini?’ ₂₇Yoloye a n'wi hlamula a ku: ‘Makwenu ú vuyile, kutani tata wa wena ú tlhavile rhole leri noneke, hikuva ú n'wi kumile a ha hanya.’ ₂₈Kambe n'wana lonkulu a kariha, a ala ku nghena.

“Tata wa yena a huma, a ya n'wi khongotela. ₂₉Yena a hlamula a ku ka tata wa yena: ‘Vona, ndzi ku tirherile malembe layo tala ngopfu, ndzi nga tluri na xin'we xa swileriso swa wena, kambe ku hava ni siku ni rin'we leri u tshamaka u ndzi nyika ximbutana leswaku ndzi tsaka ni vanghana va mina. ₃₀Kasi n'wana wa wena loyi, ú dyile rifuwo ra wena hinkwaro a ri ni tinghwavava, kutani loko a vuya, u n'wi tlhavela rhole leri noneke!’ ₃₁Kambe tata wa yena a ku ka yena: ‘N'wananga, u tshama na mina masiku hinkwawo; hinkwaswo leswi nga swa mina, i swa wena; ₃₂kambe a hi fanele ku tsaka, hi ba minkulungwana, hikuva makwenu loyi a a file, kutani sweswi ú hanyile; a a lahlekile, kutani sweswi ú kumiwile.’ ”