Luka 14

₁Hi siku ra Savata, Yesu a nghena endlwini ya nkulukumba un'wana wa Vafarisi, ku ya dya swakudya kona. Vanhu a va n'wi xiyaxiya swinene. ₂Kutani munhu wo vabya hi xirhumbe-rhumbe, a a ri kona kwalaho. ₃Yesu a vutisa vadyondzisi va Nawu ni Vafarisi a ku: “Xana swa pfumeleriwa ku hanyisa munhu hi siku ra Savata, kumbe a swi pfumeleriwi xana?” ₄Vona va miyela. Kavaloko Yesu a teka muvabyi, a n'wi hanyisa, kutani a n'wi tshika a famba. ₅Kutani a ku ka vona: “Xana i mani eka n'wina la nga ta ka a nga hatlisi ku humesa n'wana wa yena kumbe homu ya yena ekheleni ra mati, loko swi wele kona hi siku ra Savata xana?” ₆Kutani va tsandzeka ku hlamula marito lawa.

₇Loko Yesu a vona hilaha lava rhambiweke enkhubyeni va tihlawulelaka hakona switshamu swa le mahlweni, a va dyondzisa hi xifaniso lexi nge: ₈“Loko munhu a ku rhamba enkhubyeni wa vukati, u nga yi u ya tshamisa exitshan'wini xa le mahlweni; hikuva swi nga kumeka leswaku un'wana loyi a ku tlulaka hi ku chaviseka ú rhambiwile na yena hi n'wini wa nkhuvo; ₉kutani loyi a nga mi rhamba hi vumbirhi bya n'wina, ú ta ta, a ku ka wena: ‘Sukela munhu loyi exitshamu lexi.’ Kutani u ta ya tshama u ri ni tingana exitshan'wini xa le ndzhaku. ₁₀Kambe loko u rhambiwile, yana u ya tshamisa exitshan'wini xa le ndzhaku, leswaku loko ku ta loyi a ku rhambeke, ú ta ku ka wena: ‘Nakulorhi, tshinela haleno henhla.’ Hi mukhuva wolowo, u ta dzunisiwa emahlweni ka hinkwavo lava tshameke eswakudyeni swin'we na wena. ₁₁Hakunene un'wana ni un'wana loyi a tikurisaka, ú ta tsongahatiwa; kambe loyi a titsongahataka ú ta kurisiwa.”

₁₂Kutani a ku ka loyi a n'wi rhambeke: “Loko u endla nkhuvo wa xifihlulo kumbe wa xilalelo, u nga rhambi vanghana va wena, kumbe vamakwenu, kumbe maxaka ya wena, kumbe swifumi leswi u vandzakaneke na swona ntsena, hikuva na vona va ta ku rhamba, kutani swi hundzuka xinkhenso eka wena. ₁₃Kambe loko u endla nkhuvo, rhamba vapfumari, ni swilema, ni vahluleki, ni lavo-fe-mahlo; ₁₄u ta kateka, hikuva a va na swa ku ku tlherisela va ku nkhensa ha swona, kutani hi siku ra ku pfuka ka lavo lulama u ta tlheriseriwa swona.”

₁₅Loko un'wana wa lava tshameke eswakudyeni, a twa timhaka teto, a ku ka Yesu: “Ku katekile loyi a nga ta dya swakudya eMfun'weni wa Xikwembu!” ₁₆Kambe Yesu a ku ka yena: “Munhu un'wana ú tshama a endla nkhuvo lowukulu wa swakudya, a rhamba vanhu lavo tala eka wona. ₁₇Kutani hi nkarhi wa ku dya a rhuma nandza wa yena ku ya tivisa lava rhambiweke a ku: ‘Tanani, swilo hinkwaswo swi lunghisiwile.’ ₁₈Kambe hinkwavo va va nomo wun'we ku tilandzula. Lowo sungula a ku ka nandza: ‘Ndzi xavile nsimu, kutani ndzi fanele ku ya yi vona; ndzi kombela leswaku u ya va byela va ndzi khomela.’ ₁₉Un'wana a ku: ‘Ndzi xavile khume ra tihavi, kutani ndzi ya eku ti ringeteni; ndzi kombela leswaku u ya va byela va ndzi khomela.’ ₂₀Un'wana a ku: ‘Ndza ha ku teka nsati, hikokwalaho a ndzi koti ku ta.’ ₂₁Nandza a tlhela, a ya tivisa n'wini wa yena timhaka teto. Kavaloko n'wini wa yindlu a kariha, a ku ka nandza wa yena: ‘Hatlisa, u famba, u ya eswitarateni, ni le tindleleni ta muti, u tisa haleno vapfumari, ni swilema, ni lavo-fe-mahlo, ni vahluleki.’ ₂₂Kutani nandza a ku: ‘Hosi, ku endliwile hilaha u leriseke hakona, kambe vutshamo bya ha ri kona.’ ₂₃Kutani n'wini a ku ka nandza: ‘Yana etindleleni, u rhendzeleka ni lomu ku biyiweke hi rihlampfu, u hluhlurheta vanhu ku nghena leswaku yindlu ya mina yi tala. ₂₄Hikuva ndzi ri ka n'wina: A ku na munhu ni un'we wa lava rhambiweke la nga ta nantswa nkhuvo wa mina.’ ”

₂₅Mintshungu leyikulu a yi famba na yena, kutani a hundzuluka a yi languta, a ku: ₂₆“Loko un'wana a ta ka mina, kambe a nga ndzi rhandzi ku tlula tata wa yena, ni mana wa yena, ni nsati, ni vana, ni makwavo, hambi byi ri vutomi bya yena, a nga ka a nga vi mudyondzisiwa wa mina. ₂₇Kutani loyi a nga rhwariki xihambano xa yena a ndzi landza, a nge koti ku va mudyondzisiwa wa mina.

₂₈“Xana i mani exikarhi ka n'wina, la nga rhangiki hi ku tshama hansi loko a lava ku aka xihondzo, a hlaya leswi a nga ta humesa swona, ku vona loko mali ya yena yi ta ringana ku heta ntirho xana? ₂₉Loko a nga endlanga sweswo, ú ta aka masungulo ntsena, kutani swi ya n'wi tsandza ku heta; hinkwavo lava nga ta swi vona va ta sungula ku n'wi hleka, va ku: ₃₀‘Munhu loyi ú sungurile ku aka, kambe ú tsandzekile ku heta.’

₃₁“Kumbe hi yihi hosi leyi humaka ku ya lwa ni hosi yin'wana, yi nga rhanganga hi ku tshama hansi, yi vona leswaku, xana hi vanhu va yona va 10 000 yi nga ya lwa ni hosi leyi taka yi ri ni vanhu va 20 000 xana? ₃₂Loko vanhu va yona va nga ringananga, yi ta rhuma tintsumi ku ya kombela eka nala a ha ri kule, leswaku ku nga vi na ku lwa. ₃₃Kutani ke un'wana ni un'wana exikarhi ka n'wina la nga tshikiki leswi a nga na swona, a nga ka a nga koti ku va mudyondzisiwa wa mina.

₃₄“Munyu i xilo lexo nandziha, kambe loko wu phyama, wu ta lungiwa hi yini ke? ₃₅A wa ha pfuni nchumu, hambi ku nonisa misava, kumbe ku hundzuka quva; wu cukumetiwa ehandle. La nga ni tindleve ku yingisa, a a yingise!”